Ama iskayaychu, Jehová Diosqa perdonasunkiñan

1, 2. ¿Imatan Jehová Dios ruwan juchanchiskunamanta arrepientekuqtinchis? ¿Imaynan kanchis Diospa perdonapuwasqanchis qhepaman? (Qhaway tapanpi kaq dibujota).

REY Davidmanta rimasun, payqa sinchi llakisqan kasharqan juchapakusqankunamanta (Sal. 40:12; 51:​3, qhaway qallariyninta). Ichaqa sonqomantan payqa arrepientekurqan, jinan Jehová Diosqa perdonapurqan (2 Sam. 12:13). Davidqa Diospa perdonasqanta reparaspaqa kusisqan kapurqan, sonqonpas thajmi kapurqan (Sal. 32:1).

² ¡May munaymi Jehová Diospa perdonakuq kasqanta yachayqa! Ichaqa pay perdonawananchispaqqa sut’intan juchanchista willakunanchis, arrepientekunanchistaqmi chaymanta. Chaymantapas tukuy atisqanchistan kallpachakunanchis amaña juchaman urmanapaq (Prov. 28:13; Hech. 26:20; 1 Juan 1:9). Jehová Diosqa pitapas perdonaspaqa llapantan perdonapun, borrashanmanpas juchanchista jinan chayqa, manapas jayk’aqpas juchapakusunmanchu karqan jinaraqmi. ¡May kusikunapaqmi chayta yachayqa ¿riki?! (Ezeq. 33:16).

3, 4. ¿Imaynan tarikurqan hermana Jennifer? ¿Imamantan kaypi yachasunchis?

³ Ichaqa, mayninqa yaqapaschá nisunman: “Cheqaqtapunichu Jehová Dios perdonawanman karqan”, nispa. Chaypaq yachasun Jennifer sutiyoq hermananchismanta. Payqa Diosta serviq familiapis wiñasqa, adolescencianman chayaspas ichaqa chay ñanmanta t’aqakapusqa, jinaspa mana allin kausayman jaykupusqa. Tiempowansi ichaqa jujmanta Diosta serviyta qallarisqa, jinaspa bautizakapusqa. Paymi nin: “Noqaqa qhelli kausaytan apasharqani, qolqellamanmi qokuqpas kani. Nishu machaqmanmi tukupurqani, millay genioyoqmi karqanipas. Jinan Diosman kutipushaspaqa nirqani: Ñataq juchaykunamanta arrepientekuniña chayqa perdontapas mañakuniñataq chayqa Diosqa ñachá Cristoq yawarninwan limpiapuwanña, nispa. Sonqoypin ichaqa mana chay cabewaqchu, manapas Dios perdonawanmanchu karqan jinan kaq kani”, nispa.

⁴ ¿Qanri imaynan kashanki, juchachashallasunkichu sonqoyki? ¿Manapas Jehová Dios perdonasunkimanchu karqan jinachu tarikushanki? Chhayna kashanki chayqa kayta yuyariy: Jehová Diosqa may khuyapayakuq may perdonakuq kasqanpi confianaykitan munan. Chaymi kaypi yachasunchis imaraykus manapuni iskayananchischu Jehová Dios perdonakuq kasqanmanta, imas yanapawasunman mana iskayananchispaq chaymantawan.

¿IMARAYKUN MANA ISKAYANAYKICHU JEHOVÁ DIOS PERDONASQASUYKIMANTA?

5. ¿Imayna piensananchistan Satanás munashan? Juj ejemplota willay.

⁵ Sichus tukuy sonqo confiasun Jehová Dios perdonawasqanchispi chayqa, manan Satanaspa trampanman urmasunchu. Yachasqanchis jinapas Satanasqa manan munanchu Jehová Diosta servinanchista. Chaymi payqa imapipas juchapakuqtinchisqa “manasuna Jehová Diosqa jayk’aqpas perdonawanmanchu” nispa piensananchista munan. Corinto llaqtapi qhelli juchapi urmaq runapi piensasunchis. Payqa Diospa llaqtanmantan t’aqasqa kapurqan (1 Cor. 5:​1, 5, 13). Chaymantan ichaqa arrepientekapurqan. Satanasqa manan munasharqanchu hermanokuna payta perdonanankuta ni Diospa llaqtanman jujmanta jaykuchinankutapas. Sichus Satanaspa munayninman jina imapas ruwakunman karqan chayqa, yaqapaschá chay arrepientekuq iñiqqa ninman karqan “mana perdonana juchatachá ruwarqani”, nispa. Chhaynapitaq payqa “llakiq ñit’isqan” tarikuspa Jehová Diosmanta astawan karunchakapunman karqan. Satanasqa kaqllan kashan, payqa manan munanchu Diosta servinanchista. Ichaqa noqanchisqa “allintan yachanchis imakunatachus Satanás piensashan” chaytaqa (2 Cor. 2:​5-11).

6. ¿Iman yanapawasun juchapakusqanchismanta amaña ñishuta llakikunanchispaq?

⁶ Tukuy sonqo confiasun Jehová Dios perdonawasqanchispi chayqa, manañan nishutachu llaki ñit’iwasun. Ichaqa mayninqa llakikusunmi ima juchatapas ruwaspaqa (Sal. 51:17). Chayqa mayninqa allinmi. Chhayna llakisqa kaspa, sonqo nanasqa kaspan aswan facilta Diosman kutipuyta atinchis (2 Cor. 7:​10, 11). Ichaqa, sichus arrepientekurqanchisña chaywanpas ñishuta llakikushallasunman, ñishuta sonqonchista nanachikushallasunman chayqa manan allinchu kanman, pisipapusunman iman. Diospa perdonapuwasqanchispi piensaspan ichaqa mana chhaynachu kasunchis, aswanmi sonqonchista tiyaykachispa ñaupaqman puririsunchis. Chaymantapas thajmi kusisqan Jehová Diosta servisunchis (Col. 1:​10, 11; 2 Tim. 1:3). Ichaqa, ¿imatan ruwasunman Jehová Diospa perdonawasqanchispi confiananchispaq, sonqonchispi chayta jap’ikunanchispaq? Qatiqpi chayta yachasunchis.

¿IMAN YANAPASUNKIMAN DIOSPA PERDONASQANPI TUKUY SONQO CONFIANAYKIPAQ?

7, 8. a) ¿Imanirqanmi Jehová Dios paymanta Éxodo 34:​6, 7 textopi? b) Chhaynataq chayqa, ¿imamantan mana jayk’aqpas iskayananchischu?

⁷ Jehová Dios pay kikinmanta imachus nisqanpi piensay. Yaqapaschá piensawaq Sinaí orqopi imatachus Moisesta nirqan chaypi (leey Éxodo 34:​6, 7).a Chaypi nisqan jina, “noqaqa khuyapayakuq, sumaq sonqo Diosmi kani” nispan Moisesta rimapayayta qallarirqan. Chhaynataq Diosninchis kanman chayqa, ¿jinatachu qhawarparinman tukuy sonqomanta arrepientekuq runata? Manan ¿riki? Payqa manan mana sienteq chiri sonqo Dioschu aswanpas payqa sumaq sonqon, perdonanmi pipas arrepientekuqtaqa.

⁸ Arí, payqa “khuyapayakuq Diosmi kani” nispaqa sut’illantan nishan. Payqa manan jayk’aqpas llullakunmanchu (Sal. 31:5). Chhaynaqa sichus nishanki “Jehová Diosqa manasuna perdonawanmanchu” nispa chayqa, kaypi piensay: ¿Imaynatan qan Diosta qhawarinki? ¿Khuyapayakuqta sumaq sonqota, perdonakuqta jinachu icha manachu? “Chhaynan Diosqa” ninki chayqa, ¿manachu qantapas pay perdonasunkiman? Arí, qantapas Diosqa perdonapusunkiñan.

9. Salmos 32:5 textopi nisqanman jina, ¿imaynatan Jehová Dios juchanchista perdonawanchis?

⁹ Imaninsi Biblia Dios perdonakuq kasqanmanta chaypi piensay. Chaymanta rimaspan David Jehová Diosta nirqan: “Jinan qanqa llapa juchaykunata perdonarqanki”, nispa (leey Salmos 32:5). Hebreo rimaypiqa kay textopiqa “perdonay” nisqa simitaqa “oqariy” “apay” nillanmantaqmi. Chhaynaqa Jehová Diosqa Davidta perdonaspaqa, juj llasa q’epitapas wasanmanta oqarishanman jinan karqan, chaytapas apapushanman jinan karqan. Chayta reparaspan Davidqa thaj karqan, kusisqataqmi karqanpas (Sal. 32:​2-4). Sichus noqanchispas David jina cheqaqtapuni arrepientekusun chayqa pay jinan kusisqa kasunchis. Chhaynaqa manañan yanqa juchanchista q’epishananchischu, ñan Jehová Diosqa juchanchista oqarispa apapunña. Arí, Jehová Diosqa ñan perdonapuwanchisña.

10, 11. Salmos 86:5 textopi nisqan jina ¿imaynan Jehová Diosqa?

¹⁰ (Leey Salmos 86:5). Salmos libropi nisqan jina, Davidmi Jehová Diosta nirqan: “Liston kashanki juchata perdonanaykipaq”, nispa. Bibliamanta rimaq juj libropi nisqan jina, chay textoqa rimashan “Jehová Diosqa perdonakuq Diospuni kasqanmantas, chhaynapunis Diosqa”. Ichaqa, ¿imaraykutaq Jehová Diosri chhayna kanman? ¿Imaraykun arrepientekuq runakunata sumaqta qhawarinman? Chay textopin nillantaq: “Qanta wajakamuqkunapaq mana tukukuq munakuyniykipas may jatunmi”, nispa. Chaypi nisqan jina, jinallataq 33 yachachikuypi yachamusqanchis jina, Jehová Diosqa maytapunin kamachin runakunataqa munakun, chay munakuyninqa wiñaypaqmi. Chayraykun payqa pipas arrepientekuqtinqa khuyapayaspa perdonapun (Isa. 55:7). Manapunichus Jehová Dios perdonakuq kasqanpi creeyta atinki chayqa, yaqapaschá sonqoykita niwaq: “Jehová Diosqa llapa perdonta mañakuqtataq perdonan chayqa, llapankutataq khuyapayan chayqa, ¿manachu noqatapas perdonawanman?”, nispa.

¹¹ Chaymantapas Bibliapiqa willashanmi imaynas Jehová Diosqa allinta reqsiwanchis chayta. Arí, payqa allintan yachan runalla, jallp’alla kasqanchista. ¿Manachu chayta yachay kallpachawanchis? (Sal. 139:​1, 2). Qatiqpi chaymanta astawan yachasunchis, chaypaqqa Davidpa qelqasqan juj Salmos librotañataq t’aqwirisunchis. Chaypin rikusunchis imaynas Jehová Diosqa may jatun perdonakuq chayta.

JEHOVÁ DIOSPA YUYASQALLANTA YUYAY

12, 13. Salmos 103:14 textopi nisqan jina, ¿imatan Jehová Diosqa yuyashallanpuni, imata ruwananpaqmi listo chayrayku kashan?

¹² (Leey Salmos 103:14). Davidqa Jehová Diosmantan nillarqantaq: “Payqa yachanmi imayna kamasqa kasqanchista”, nispa. ¿Imaninantan chaywan David nisharqan? Jehová Diosqa allintan reqsiwanchis, chaymi payqa listo kashan perdonawananchispaq. Arí, payqa allintan yachan imaynas juchasapa kayninchispi mayninqa pantanchis chayta. Chayta astawan kaypi t’aqwirisunchis.

¹³ Davidqa nillarqantaqmi: “Payqa yachanmi imayna kamasqa kasqanchista”, nispa. Arí, Diosqa yachanmi imayna kamasqa kasqanchista. Payqa “ñut’u jallp’amantan” Adantaqa kamarqan. Jallp’amanta ruwasqa kasqanchisraykun runakunaqa mana ima juchayoq ch’uyaña kasunman chaypas kausananchispaqqa necesitanchispuni samariyta, mijuyta, puñuyta ima (Gén. 2:7). Ichaqa, Adanwan Evapiwan juchapakusqankuraykun mana allinman kausayqa tukupurqan, “jallp’amantan ruwasqa kanchis” nisqa simipas jujniraymanmi cambiapurqan. Chhayna rimaymi rikuchin imaynas Adanmanta jamuq runakunaqa juchasapa kanchis chayta. Imaynas cuerponchisqa mana allinllamanpuni apayta munawanchis chayta. Davidpa nisqan jina, Jehová Diosqa allintan yachan chayta. Salmos 103:14 textopiqa hebreo rimaypiqa “yachanmi” nisqataqa “yuyan” nillanmantaqmi. Chhaynaqa Jehová Diosqa yuyashallanmi imayna kasqanchista. Ichaqa “yuyan” nispaqa Bibliapiqa manan Diosqa umanpi yuyasqallanmantachu rimashan, aswanpas yuyasqanrayku runakunapaq allin kaqkunata ruwasqanmantawanmi. Chhaynaqa Jehová Diosqa allintan yachan imaynas mayninpiqa juchapakusunpuni chayta. Chay juchanchismantachus perdonta mañakapusun chayqa, payqa listollapunin kashanqa perdonawananchispaq (Sal. 78:​38, 39).

14. a) ¿Imatan yachachiwanchis Salmos 103:12 texto Jehová Dios imayna perdonakuqchus kasqanmanta? b) Jehová Diosqa perdonaspaqa llapantan perdonawanchis, ¿imaynatan Davidpa ejemplon chayta rikuchin? (Qhaway “Jehová Diosqa perdonaspaqa qonqapunmi”, nisqa willakuyta).

¹⁴ ¿Imatawanmi yachasunman Salmos 103 capitulopi Jehová Dios perdonakuq kasqanmanta? (Leey Salmos 103:12). Chaypin Davidqa willarqan imaynas Jehová Diosqa perdonaspaqa juchanchista noqanchismanta karuman apan chayta, “imaynan inti lloqsimuy ladoqa inti jaykuy ladomanta sinchi karupi kashan” chhaynamansi apan. ¿Ima ninantan chaywan nishanman karqan? Juj libropin nin: “Chhaynaniraq karumantaq jucha apasqa kanman chayqa, manapunin imapas juj runapiqa qhepanmanchu, manapunin chay juchaqa yuyasqaqa kanmanchu”, nispa. (Charles Spurgeon runaq qelqasqan El tesoro de David nisqa libro, volumen 2, Samuel Vila nisqa sutiyoq runaq t’ijrasqan). Imaymanan jucha ruwasqanchistaqa yuyarichiwasunman, mayninqa juj q’apay iman yuyarichiwasunman. Ichaqa Jehová Dios perdonawanchis chayqa, manan imapas qhepanñachu chay juchamanta, manañan juj q’apaypas qhepanñachu. Arí, manan payqa ni imachatapas chay juchanchismantaqa yuyarichiwasunmanñachu (Ezeq. 18:​21, 22; Hech. 3:19).

15. ¿Imatan ruwasunman ñaupaqpi juchapakusqanchiskunamanta ñishu llakisqa kaspanchis?

¹⁵ Ñaupaqpi juchakuna ruwasqaykimanta llakisqaraq kashanki chayqa, Salmos 103 capitulopi allinta piensay. Chaypi piensaspan allinta yachanki imaynas Jehová Diosqa perdonapusunkiña chayta. Tapukuy: “Jehová Diosqa yuyarintaq juchasapa runa kasqayta chayqa, listotaq kashan arrepientekuqtiy perdonawananpaqpas chayqa, ¿manachu noqapas pay jina qhawarinay chaykunata? Jehová Diosqa qonqapuntaq ñaupaqpi juchapakusqaykunata chayqa, manataq jayk’aqpas yuyarichiwashanmanchu chaykunata chayqa, ¿imaraykutaq noqari yuyashanallay?”, nispa. Kaypi yachasqanchis jina, Jehová Diosqa perdonaspaqa manañan chay juchataqa yuyanñachu. Chhaynaqa, ¿imaraykutaq qanri yuyashanallayki? (Sal. 130:3). Amapuni Diospa perdonasqanmantaqa iskayaychu, manachus chaymanta iskayanki chayqa qanpas perdonakapunkin, chhaynapin thaj kausakapunki.

16. ¿Imaraykun mana ñishutachu piensananchis ñaupaqpi juchapakusqanchiskunapi? (Qhaway kay parrafopaq dibujota).

¹⁶ Ñaupaqpi juchapakusqanchiskunata yuyashallasun chayqa chaymanta llakikushallasun chayqa, qhepata qhawaspapas carrota manejashasunman jinan kanman. Ichaqa allinmi juj ratu qhepata qhawariyqa, chhaynapi imachus qhepanchispi kashan chayta reparanapaq. Ichaqa, sichus allinta manejayta munanchis manataq ima accidentepas pasananta munanchischu chayqa, ñaupaqtan tukuy yuyay qhawananchis. Chhaynallataqmi juchanchiskunawanpas, allinmi juj chhikanta qhepata qhawariyqa chhaynapi ama chay juchakunaman jujmanta urmananchispaq, chaykunamanta allinta cuidakunanchispaq. Ichaqa, sichus tukuy tiempo chaykunallapi piensasun chayqa astawanmi llaki qatiriwasun; manan atisunchu Diosta tukuy sonqo serviytapas. Chhaynaqa ñaupaqllata qhaway, ñaupaqllapi yuyayniyki kachun. Diospa gobiernonpi piensay chaypiqa “ñaupaq kaqkunaqa manan yuyarisqañachu kanqa” (Isa. 65:17; Prov. 4:25).

KALLPACHAKUSHALLAY AMA ISKAYANAYKIPAQ

17. ¿Imaraykun mana jayk’aqpas iskayananchischu Jehová Dios perdonakuq kasqanmanta?

¹⁷ Manapunin jayk’aqpas iskayananchischu Jehová Diospa perdonakuq kasqanmantaqa, allintan sonqonchispi chayta waqaychakunanchis (1 Juan 3:19). ¿Imarayku? Satanasqa manan munanchu Diospi confiananchista; aswanpas perdonakuq kasqanmanta iskayananchistan munan. Diosqa “manan perdonawanmanchu” ninanchistan munan. ¿Imaraykun chayta ruwan pay? Payqa Diosmanta t’aqakunanchistan munan. Pisillañataq faltashan ch’usaqman tukuchisqa kanan tiempo chayqa, astawanraqmi chay enemigoqa Diosmanta t’aqayta munawasunchis (Apo. 12:12). Chayrayku amapuni gustota qosunchu chay enemigomanqa.

18. ¿Imatan ruwana Jehová Dios perdonakuq kasqanmanta ama iskayanapaq?

¹⁸ 33 yachachikuypin allinta entienderqanchis imaynas Jehová Diosqa munakuwanchispuni chayta. Kaypitaq yacharqanchis imaynas Jehová Diosqa perdonawanchispuni chayta. Chaykunataqa allintan sonqonchispi jap’ikunanchis. Kay yachasqanchista yuyanaykipaq allinta piensay imaninsi Jehová Dios pay kikinmanta chaypi; imaninsi Biblia Jehová Dios imayna perdonakuqchus kasqanmanta chaypipas. Amapuni qonqankichu, Jehová Diosqa allintan yachan juchasapa runa kasqanchista. Chaymantapas payqa may jatun khuyapayakuq Diosmi. Chaymantapas Jehová Diosqa perdonaspaqa llapantan imatapas qonqapun. Chaykunapi allinta piensanki chayqa, David jinan ninki: “¡Gracias Diosníy Jehová, qanqa llapa juchaykunatan perdonawarqanki!”, nispa (Sal. 32:5).