1925: pachaj wata ñaupaqta

IMACHUS SUYAKUSQANKU MANA JUNT’AKUNCHU

Biblia estudiaqkunaqa 1925 watapi kay pacha paraisoman tukupunanpaqmi piensarqanku. Chaymanta rimaspan Umalliq t’aqamanta Albert Schroeder sutiyoq hermano nirqan: “Chay tiempopiqa chay watapi llapa Jesusta qatikuqkuna janaq pachaman ripunankupaqmi piensakurqan, paywan kuska Diospa gobiernonpi gobiernanankupaqmi piensakurqan. Chaymantapas ñaupa tiempopi Diosta serviq Abrahanwan, Davidwan juj runakunapiwan kausarispa kay pachapi gobiernanankupaqmi piensakurqan. Paykunaqa Diospa gobiernon partemantachá kanqaku nispan nikurqan”, nispa. Ichaqa manan chayman jinachu imapas karqan, chaymi wakin hermanokunaqa chaywan pisipapurqanku (Prov. 13:12).

Manaña piensasqankuman jinachu imapas karqan chaypas, Biblia estudiaqkunaqa yaqa llapankupas willashallarqankun Diosmantaqa. Paykunaqa pisi-pisimantan allinta entienderqanku imaynas astawanraq Diosmantaqa willananku karqan chayta. Chayta ruwanankupaqqa radiowanmi astawanqa yanapachikurqanku, ¿imaynatan chayta ruwankuman karqan? Chayta qhawarisun.

JUJ RADIOKUNATAWAN RANTIKUN

1924 watapin WBBR radiota rijurichikurqan, chhaynapin askha runakuna Jehová Diosmanta yacharqanku. Chaymi Biblia Estudiaqkunaqa juj radiotawan ruwarqanku Illinois ladopi kaq Chicago llaqtapi, chaytan suticharqanku WORD nispa. Chay radio ruwaypin llank’arqan Ralph Leffler sutiyoq ingeniero. Paymi nirqan: “Chiri tutakunapas runakunaqa uyariqkun chay radiota, karu llaqtakunapiraqmi chaytaqa uyariqku”, nispa. Chaypaq yachasun juj familiamanta, paykunaqa Alaska ladopi kaq Pilot Station ladopin tiyarqanku, chayqa chay radioq kasqanmantaqa 5.000 kilometropi jinaraqmi kashan. Paykunan ñaupaq programakunata uyarisqaku, chayta uyarispan paykunaqa juj cartata qelqamusqaku chay radiopi llank’aqkunaman; chaypin agradecekamusqaku Diosmanta yachachikuykuna mast’arimusqankumanta.

1925 watamanta diciembre killamanta kay revistapin willakurqan maykamachus WORD nisqa radio chayasharqan chayta. Chay revistapin nirqan: “WORD nisqa radioqa Estados Unidospi juj radiokuna jinan karu llaqtakunamanraq chayan, chhayna karuman chayaq radiokunaqa pisillan kanku. Estados Unidospi inti lloqsimuy ladomanta hasta inti jaykuy ladokamaraqmi chayan. Uraymanqa Cuba nacionkamaraqmi chayan, wichaymantaq Alaska nisqakamaraq chayan. Diosmanta willakuyta mana jayk’aq uyariqkunapas astawanmi yachayta munashanku”, nispa.

Canadá nacionpipas Biblia estudiaqkunaqa radiowan iman Diosmanta willayta munasharqanku. Jinan 1924 watapi ruwakurqan CHUC nisqa radio, chayqa kasharqan Saskatchewan ladopin Saskatoon llaqtapi. Chay kutikamaqa manan ima radiopipas Diosmantaqa rimakurqanraqchu. Ichaqa juch’uyllan karqan chay radioq kasqan wasiqa. Chaymi 1925 watapi rimanakurqanku juj ladoman astakunankupaq. Chaymi Sociedad Watch Tower nisqaqa Saskatoon llaqtapi Regent Building nisqapi rantirqan juj teatro nisqata; chaytan allicharqanku jinaspa chayman chay radiota astapurqanku.

Chay radioq yanapayninwanmi Saskatchewan ladopi karu llaqtakunapi Diosmanta willakuyta primera vez uyarirqanku. Chay lado llaqtakunapi kaq Graham sutiyoq señoramanta yachasun, payqa radioq kasqanmantaqa karupiraqsi tiyasqa. Payqa chay radiota uyarispas juj cartata qelqamusqa librokunata, qelqakunata mañakuspa. Chay carta apachikamusqanmantan George Naish hermanonchis nirqan: “Payqa desesperasqa jinan chay cartata qelqamusqa, chaymi Estudios de las Escrituras nisqa llapa qelqakunata apachirqayku”, nispa. Manaraq unaypin chay Señoraqa Diosmanta willakuyta juj ladokunamanraq aparisharqan.

YACHACHIKUYTA ASTAWAN SUT’INCHAKUN

1925 watapi 1 marzo killapi lloqsimuq kay revistapin inglés simipi juj yachachikuy lloqsimurqan, chaypin nirqan: “Nacimiento de la nación”, nispa. ¿Imaraykun allinpuni kanman karqan chay yachachikuy? Bibliata estudiaqkunaqa unayñan yacharqanku imaynas Satanaspaqqa kan juj llaqtan chayta. Chay llaqta ukhupin kashanku mana kasukuq angelkuna, kay pachapi pantasqa religionkuna, gobiernokuna, qolqewan dominaqkuna ima. Chay revistapin “allin yuyayniyoq junt’aq kamachiqa” willallarqantaq imaynas Jehová Diospaqpas kan juj llaqtan chayta, chay llaqtaqa Satanaspa llaqtanmantaqa jujniraypunin (Mat. 24:45). Chaymantapas chay revistapin chay junt’aq kamachiqa willallarqantaq imaynas 1914 watapi Diospa churasqan Jesús janaq pachapi kamachikuyta qallarirqan chayta, imaynas chay watallapitaq chaypi juj guerra karqan chaytapas. Chaypin Satanaswan angelninkunapiwan, Jesuswan angelninkunapiwan maqanakurqanku. Jesusmi chay guerrata atiparqan, jinaspa Satanasta angelninkunatawan kay pachaman wijch’uykamurqan (Apo. 12:​7-9).

Wakin Biblia estudiaqkunapaqqa manan facilchu karqan chayta entiendeyqa. Ichaqa, chay revistapin nirqanña: “Kay revistapi sunt’inchakamusqanta pipas mana faciltachu entiendenqa chayqa, pacienciakuchun Señorpitaq suyakuchun, ch’uya sonqolla payta suyakuchun”, nispa.

Gran Bretaña nacionmanta Tom Eyre sutiyoq hermanomanta yachasun. Payqa colportor nisqan karqan, kunanqa precursor nikunmi paykunataqa. Paymi willakurqan imaynatas chay willakuyta Biblia estudiaqkuna chaskikurqanku chayta, nirqanmi: “Hermanokunaqa kusisqan chaskikurqanku Apocalipsis 12 capitulota explicakusqanta. Cielopi Diospa gobiernon churakusqanta yachaspaqa tukuy sonqowanmi chayta runakunaman willayta qallarirqayku, chayta yachaymi yanapawarqanku Diosmanta willayta astawan aparinaykupaq. Allintan repararqayku imaynas Jehová Diosqa llaqtanta jatun ruwaykunaman pusarisharqan chayta”, nispa.

DIOSMANTA WILLAKUYTA ASTAWAN MAST’ARIKUN

Kunanqa allintañan yachanchis imamantas Isaías 43:10 textopi rimashan chayta, chaypin nishan: “Qankunan testigoykunaqa kankichis, ajllakusqay kamachiymi kankichis”, nispa. Ichaqa chay textotaqa 1925 watakamaqa manan ñishutaraqchu t’aqwikurqan. Chay watapin ichaqa 11 revistakunapi Isaías 43:​10, 12 textomanta rimakurqan.

1925 watapin agosto killa tukuyta jina Biblia estudiaqkunaqa Indiana ladopi kaq Indianápolis llaqtapi juj asambleata aparirqanku. Chay asambleapaq programapin hermano Rutherfordpa imachus nisqanta qelqasqaku, chaypin nisqa: “Kaypiqa kashanchis Señorpa kallpanta astawan chaskinanchispaqmi, chhaynapi kutipuspaqa aswan kallpawanqraq paymanta willamunanchispaq”, nispa. Chay asambleaqa pusaq p’unchaymi aparikurqan, llapa chay p’unchaykunapin hermanokunata kallpachakurqan maypiña kaspapas Diosmanta willanankupaq.

Sábado 29 p’unchay agosto killapin hermano Rutherfordqa qorqan “Una llamada a la acción” nisqa discursota, chaypin willarqan imaynas may allinpuni Diosmanta willay chayta. Nirqanmi: “Jehová Diosmi nisunkichis: ¡Qankunaqa testigoykunan kankichis, noqataq Diosniykichis kani! , nispa. Chaymantataq nirqan: ¡Llaqtakunapaq juj señalta sayachiychis!”, nispa (Isa. 43:12; 62:10). Chay nisqan qhepamantaq nirqan: “Diosmanta willakuytaqa manan llapa runakunachu apayta atinku, aswanpas paypa yanapayninta chaskiqkunallan, paypa llaqtanpi kaqkunallan”, nispa.

Chay discurso qosqan qhepamanmi hermano Rutherfordqa “Mensaje de esperanza” nisqa willakuyta leerqan, chaypin willarqan imaynas Jehová Diospa gobiernollan kay pachaman “thaj kayta, allin kausayta, qhali kausayta, wiñay kausayta, kusikuytapas apamunqa chayta”. Chay willakuytaqa llapankun allinta chaskikurqanku. Chay willakuytaqa askha simikunamanmi t’ijrakurqan, chaywantaqmi runakunamanqa predicakuqpas. Llapanpiqa 40 millonesta jinan chay willakuytaqa rakikurqan.

Chay tiempopaqqa Biblia estudiaqkunaqa manaraqmi Diospa sutintaqa aparqankuraqchu, qhepamanñan Jehová Diospa testigonkuna nispaqa sutichakurqanku. Chaywanpas paykunaqa allintan yacharqanku imaynas Jehová Diosmantaqa willanankupuni karqan chayta.

RUNAKUNAMAN KUTINKU YACHACHINANKUPAQ

Biblia estudiaqkunaqa astawanmi yapakusharqanku, yapakusqanman jinan paykunata kallpachakurqan Diospa Siminta sumaqta chaskikuqkunaman kutinankupaq. “Mensaje de esperanza” nisqa willakuyta rakikusqan qhepamanmi Bulletina revistapi nirqan: “Wakinqa manapaschá chaskikurqankuchu librotapas juj qelqakunatapas, ichaqa chaskikurqankupaschá “Mensaje de esperanza” nisqa willakuytaqa, chhaynaqa paykunamanpas kutiychis”, nispa.

1925 watapi enero killapi lloqsimuq Bulletin nisqa qelqapin juj hermanoq willakusqan lloqsimurqan, payqa Texas ladopi Plano nisqa llaqtamantan. Paymi nirqan: “Askha kutita predicakusqan llaqtakunapiqa astawanmi runakunaqa uyarikunku, juj kutillata risqanchis llaqtakunapin ichaqa mana ñishutachu uyarikunku. Tiyasqayku ladopin juj llaqtachaman chunka watapi pisqa kutitaña kutirqayku. Qayninpakunallan hermana Hendrix mamitaywan kuska chay llaqtata kutisqaku, chaypin mana jayk’aq rakisqankuta jinaraq librokunata rakimusqaku”, nispa.

Panamá nacionmanta juj colportor hermanon qelqamusqa: “Ñaupaq kutita rishaqtiyqa wakin runakunaqa manan uyarikuyta munawaqkuchu, kutiqtiymi ichaqa sumaqta chaskiwarqanku. Kay wataqa paykunaman kutinaypaqmi astawan tiempota qokushani, chay ruwaypiqa allinmi riwashan”, nispa.

IMAYMANARAQMI RUWANA KASHARQAN

Colportorkunaman carta apachisqanpin hermano Rutherfordqa willakurqan imakunatas chay wata ruwakurqan chayta. Willarqanmi imatas jamuq watakunaman ruwananku karqan chaytapas. Paymi nirqan: “Qayna wataqa askha runakunatan Diosmanta willaspa sonqochamurqankichis, chayta ruwasqaykichisqa maytachá kusichirqasunkichis. Kay watapiqa astawanraqchá chay ruwaykunapiqa ñauparinkichis, astawanraqchá Diosmantapas, gobiernonmantapas willamunkichis. Chayta ruwaspaqa Diosmanta kaq señaltan sayarichishankichis chhaynapi runakuna rikunankupaq, chhaynaqa llapanchis juj kunkalla alabasun Diosninchista Reyninchista”, nispa.

1925 wata tukuytaqa hermanokunaqa astawanraqmi jatunyachiyta munasharqanku Brooklyn llaqtapi Sucursalta. Chhaynapin 1926 watapi mana jayk’aq ruwakusqanta ruwakurqan.