Aman jujkunataqa qonqankichu

1. ¿Imaraykun nisunman “Diospaqqa ancha allinpunin paymanta mañakusqanchisqa” nispa?

DIOSMANTA mañakuy atisqanchisqa may jatun regalopunin. ¿Imarayku? Yachasqanchis jinapas, Jehová Diosqa imaymana ruwaykunatan qorqan angelkunaman, wawan Jesusmanpas (Sal. 91:11; Mat. 28:18). Mañakusqanchistan ichaqa pay kikin uyariwanchis (Sal. 65:2). Manan Jesustachu ni angelkunatachu nirqan “chayta uyariychis” nispa. Diosqa pay kikinpunin imachus rimapayasqanchista uyariyta munawanchis.

2. ¿Ima ejemplotan apóstol Pablo saqewarqanchis?

² Jehová Diosmanqa atisunmanmi llapa imachus llakichiwanchis chayta willakuyta, jujkunapaqpas mañapusunmanmi. Apóstol Pablopas chaytan ruwarqan. Éfeso llaqtapi iñiqkunaman cartata apachishaspan paykunata nirqan: “Diosmanta mañakuspayqa yuyarillaykichispunin qankunataqa”, nispa (Efes. 1:16). Chaymantapas wakin hermanokunapaqqa sutinkumantan mañapuq. Chaytan Timoteopaqpas ruwarqan. Payman qelqasqan cartapin nirqan: “Diostan gracias nini [ . . . ]. Noqaqa yuyarillaykipunin tuta-p’unchay Diosmanta rogakuspay”, nispa (2 Tim. 1:3). Rikusqanchis jina, Pabloqa mañakullaqpunin jujkunapaqqa. Arí, ima llakipiña pay tarikusharqan chaypas, jujkunataqa yuyarillaqpunin, t’aqaqmi tiempota paykunapaq mañapunanpaq (2 Cor. 11:23; 12:​7, 8).

3. ¿Imaraykun mayninpi qonqasunman jujkunapaq mañakuyta?

³ Ichaqa yaqapaschá mayninqa qonqapusunman jujkunapaq mañakuyta. ¿Imarayku? Chaymanta rimashaspan Sabrinaa sutiyoq hermana nin: “Kay vidapiqa imaymanan ruwana kan, manan tiempo aypakunchu. Chaymi mayninqa noqallanchispiña piensayninchis kapunman, noqallanchismantan Dioswanpas rimasunman”, nispa. Chay nisqanqa cheqaqmi. Sichus noqanchispas chhaynapi tarikushanchis chayqa, kaypi yachasqanchisqa allintan yanapawasunchis. Chaymi kaypi yachasunchis imaraykus allinpuni jujkunapaq mañakuy chayta. Yachasunmi imaynatas chayta ruwasunman chaytapas.

¿IMARAYKUN ALLINPUNI JUJKUNAPAQ MAÑAKUY?

4, 5. ¿Imaraykun nisunman “jujkunapaq mañakusqanchisqa yanapanmanmi paykunata” nispa? (Santiago 5:16).

⁴ Jujkunapaq mañakusqanchisqa yanapanmanmi paykunata. (leey Santiago 5:16). ¿Jujkunata yanapanmanchu paykunapaq Diosmanta mañapusqanchis? Arí yanapanmanmi. Chaymi Jesuspas jujkunapaqqa mañapuqpuni. Payqa yacharqanmi apóstol Pedro negananta, jinan paypaq mañapurqan. Paytan nirqan: “Noqan ichaqa rogakuniña iñiyniykipi ama pisipanaykipaq”, nispa (Luc. 22:32). Apóstol Pablopas allintan yacharqan imaynas jujkunapaq mañakuyqa allinpuni chayta. Chaymi Roma llaqtapi presochasqa kashaspa Filemonman apachisqan cartapi nirqan: “Yaqapas noqapaq mañakusqaykichiswan libre kapuyman, chhaynapi qankunata watukuq jamunaypaq”, nispa (Filem. 22). Chhaynapunitaqmi karqanpas, pisi tiempollamantan payqa libre kapurqan, chhaynapin jujmanta predicayta qallarirqan.

⁵ Ichaqa kaytan allinta entiendenanchis: Manan noqanchisqa Jehová Diostaqa obligasunmanchu imatapas ruwananpaqqa. Chaywanpas payqa mañakuqtinchisqa allintan rikunqa imakunas llakichiwanchis chayta. Mayninqa mañakusqanchisman jinan imatapas ruwanqa. ¡¿Manachu chayta yachay kallpachawanchis paymanta astawanraq mañakunanchispaq?! Kallpachawanchismi ¿riki? Mañakuspaqa paypi confiasun, payñan yachan imapas imayna ruwayta ima ratu ruwaytapas (Sal. 37:5; 2 Corintios 1:11).

6. Jujkunapaq mañapusun chayqa, ¿imaynatan chay noqanchistapas yanapawasunchis? (1 Pedro 3:8).

⁶ Jujkunapaq mañakuspaqa llakipayakuq kasqanchistan rikuchishanchis (leey 1 Pedro 3:8). Khuyapayakuq llakipayakuq runaqa jujkunata ñak’ariqta rikuspaqa yanapaytapunin munan (Mar. 1:​40, 41). Chaymanta rimaspan Michael sutiyoq umalliq hermano nin: “Jujkunapaq mañakuspayqa imapichá tarikushanku chaypin masta piensani. Chaykunapi piensaspan astawanraq paykunata munakuni. Manapaschá paykunaqa reparankuchu, ichaqa paykunamanpas jujllachakushayman jinan kani”, nispa. Richard sutiyoq umalliq hermanon nillantaq: “Jujkunapaq mañapunki chayqa, astawanraqmi paykunata yanapayta munanki”, nispa. Nillantaqmi: “Pipaqchá mañapuranchis payta yanaparispaqa mañapusqanchis uyarisqa kananpaqpas yanapakushasunman jinan kanqa”, nispa.

7. ¿Imaraykun nisunman “jujkunapaq mañakuspaqa allin yuyaywanmi qhawarisunchis llakikuyninchiskunata”, nispa? (Filipenses 2:​3, 4; qhaway kay parrafopaq fotokunata).

⁷ Jujkunapaq mañapusun chayqa, allin yuyaywanmi qhawarisunchis ima llakipichus tarikushanchis chayta. (leey Filipenses 2:​3, 4). Kay kausaypiqa Satanastaq kamachikushan chayqa, llapanchismi tarikusunchis imaymana llakipi (1 Juan 5:19; Apo. 12:12). Chhaynataq chayqa, jujkunapaq mañapusun chayqa, allintan reparasunchis imaynas “lliu kay pachantinpi iñiqmasikunapas noqanchis jina ñak’arishanku” chayta (1 Ped. 5:9). Katherine sutiyoq precursora hermanan nin: “Jujkunapaq mañapuspaymi allinta reparani imaynas mana noqallachu ima llakipipas tarikushani chayta. Chaymi yanapawan ama noqallapichu piensanaypaq”, nispa.

¿PIKUNAPAQMI MAÑAPUSUNMAN?

8. ¿Pikunapaqmi mañapusunman?

⁸ ¿Pikunapaqmi mañapusunman? Imaymanapi tarikuq hermanokunapaqmi mañapusunman. Mañapusunmanmi onqosqa hermanonchiskunapaq, escuelallapiraq kashaq wayna-sipaskunapaq, kuraq hermanokunapaq ima. Escuelapi kaqkunaqa imaymana sasachakuytan pasanku. Chaymantapas wakin hermanonchiskunataqa familiankun jark’anku Jehová Diosta servinankuta, wakintaqa gobiernokunan jark’anku. Paykunapaqpas mañapusunmanmi (Mat. 10:​18, 36; Hech. 12:5). Wakin hermanonchiskunaqa qolqe pisiyasqanrayku, ch’aqwa kasqanrayku iman wasinkuta saqespa juj nacionkunaman ripurqanku. Manaña paykunata reqsinchischu chaypas, mañapusunmanmi paykunapaqpas. Chayta ruwaspaqa hermanonchiskunawan munanakusqanchistan rikuchishanchis, chaymantapas Jesuspa kamachisqantan kasukushanchis (Juan 13:34).

9. ¿Imaraykun Diospa llaqtanpi umalliq hermanokunapaq esposankupaqpas mañapunanchis?

⁹ ¿Pikunapaqmi mañapullasunmantaq? Diospa llaqtanta pusariq hermanokunapaqmi. Paykunan kanku Umalliq T’aqamanta hermanonchiskuna, yanapaqninkuna ima; sucursalkunapi encargakuq hermanokuna, watukuq umalliqkuna, iñiq t’aqapi umalliqkuna, yanapakuq kamachikuna ima. Paykunamanta wakinqa imaymana sasachakuypin tarikushanku, chaywanpas tukuy atisqankutan Diospa llaqtanpi yanapakushanku (2 Cor. 12:15). Mark sutiyoq hermanonchismanta yachasunchis. Payqa watukuq umalliqmi. Paymi nin: “Noqaqa papaymanta mamitaymanta karupin kashani, manan noqapaqqa facilchu chayqa. Paykunaqa kuraqñan kanku, onqosqataqmi kashankupas. Hermanaywan qosanpiwanmi paykunata qhawarishanku, ichaqa maytan sonqoy nanawan. Imallapipas paykunata yanapariyman ninin”, nispa (1 Tes. 5:​12, 13). Manaña allintachu yachasunman imakunapis tarikushanku chay hermanokuna chayta chaypas, Diosmantaqa mañapunanchismi paykunapaqpas. Esposankunapaqpas mañapunanchismi. Paykunaq yanapayninkuwanmi chay hermanonchiskunaqa tukuy atisqankuta llank’ashanku llapa iñiqkunapaq.

10, 11. ¿Chaskinchu Dios jujkunapaq mañakusqanchista manaña sutinkumantachu mañakunchis chaypas?

¹⁰ Rikusqanchis jina, imapichá tarikushanku chayman jinan llapa hermanokunapaq mañapusunman. Manapaschá paykunataqa reqsinchischu, ichaqa mañapusunmanmi carcelpi tarikuq hermanokunapaq, familianku wañupuq hermanokunapaqpas. Donald sutiyoq umalliq hermanon nin: “Askhan hermanonchiskunapas hermananchiskunapas imaymana llakipi tarikushanku. Manapaschá sapankapaqchu mañapunchis, ichaqa grupontinpaqqa mañapusunmanmi. Chhaynapi ama mayqentapas qonqananchispaq, aswanpas mañakusqanchisqa paykunata juj jatun paragua jina llapankuta pakaykunanpaq”, nispa.

¹¹ Ichaqa, ¿chaskinmanchu Jehová Dios chhayna mañakusqanchista? Arí payqa chaskinmi. Payqa allintan yachan imaynas mana llapa hermanonchiskunatachu reqsinchis chayta. Chhaynaqa mañakullasunmanmi chhayna grupo-grupo hermanokunapaq (Juan 17:20; Efes. 6:18). Chayta ruwaspan rikuchishanchis imaynas llapa hermanokunapi piensanchis chayta, imaynas llapankuta munakunchis chayta (1 Ped. 2:17).

¿IMAPIN PIENSANA SAPANKAPAQ MAÑAKUSPA?

12. ¿Imaraykun nisunman “jujkunata allinta qhawarispaqa sapankapaqmi mañapusunchis” nispa?

¹² Imaynapichus tarikushanku chayta qhawarisunchis. Mañakuspaqa manan grupo-grupo hermanokunallapaqchu mañakunanchis, mañakusunmanmi sapanka hermanokunapaqpas. ¿Imatan chaypaq ruwasunman? Chaypaqqa allintan qhawarinanchis imaynas hermanokuna kashanku chayta. Yaqapaschá onqosqa kashanku, yaqapaschá wakin wayna-sipaskunaqa escuelankupi imaymana sasachakuykunapi tarikushanku. Wakin taytakunaqa mamakunapas sapallankupaschá wawankuta uywashanku Jehová Diospa munayninman jina (Efes. 6:4). Chaykunapi allinta piensarisun chayqa, khuyapayasunmi paykunata, munasuntaq paykunapaq mañapuyta (Rom. 12:15).b

13. ¿Imaraykun nisunman “mana reqsisqanchis hermanokunapaqpas atisunmanmi mañakuytaqa”, nispa?

¹³ Sutinkumanta mañapusun. Wakin iñiqmasinchiskunata manaña reqsinchischu chaypas, atisunmanmi sutinkumanta mañapuytaqa. Chaypaqqa yaqapaschá jaykusunman jw.org nisqa paginaman. Chaypin willashan Crimea, Eritrea, Rusia, Singapur nacionkunapi carcelpi kaq hermanokunamanta, chaypin paykunaq sutin kashan.c Chaymanta rimaspan Brian sutiyoq watukuq umalliq nin: “Noqaqa chay carcelpi tarikuq hermanokunaq sutintan qelqani, jinaspa chay sutinkuta fuertechata leeni. Chhaynapin paykunaq sutinkuta umaypi grabakuni, mañakusqay ratupas faciltan chay sutikunata yuyarini”, nispa.

14, 15. ¿Iman yanapawasunman jujkuna imatachus necesitashanku chayman jina mañapunapaq?

¹⁴ Imatachus necesitashanku chayman jina mañapusun. Chaymanta rimaspan soqta parrafopi rimamusqanchis Michael nin: “Jw.org nisqapin carcelpi kaq hermanokunamanta yachani. Paykunamanta leespaymi piensani imaynas kayman paykuna jina tarikuspa chaypi. Noqaqa maytachá llakikuyman esposaymanta, maytachá yachayta munayman imaynas kashan chayta. Chaykunapi piensaymi yanapawan imatachus necesitashanku chayman jina mañapunaypaq”, nispa (Heb. 13:3).

¹⁵ Carcelpi kaq hermanokuna imakunapichus tarikunku sapa p’unchaypas chaypi piensasun chayqa, imaymanan kanqa paykunapaq mañapunanchispaq. Yaqapaschá mañakusunman guardiakuna sumaqllata qhawarinankupaq, chay carcelpi autoridadkunapas Dios servinankuta ama jark’anankupaqpas (1 Tim. 2:​1, 2). Mañakusunmanmi chay hermanokunaq ejemplon chay ladopi iñiq t’aqakunata kallpachananpaqpas; Paykunaq ejemplonta rikuspa juj runakuna Diosmanta uyarikuyta munanankupaqpas (1 Ped. 2:12). Ichaqa manan Carcelpi tarikuq hermanokunallapaqchu chaytaqa ruwasunman, juj hermanokunapaqpas chhaynatan mañapunanchis. Chhaynapin rikuchisunchis paykunata anchata munakusqanchista (1 Tes. 3:12).

ALLIN YUYAYWAN MAÑAKUSUN

16. ¿Imaraykun jujkunapaq mañapuspa allin yuyaywan chayta ruwananchis? (Mateo 6:8).

¹⁶ Kaypi yachasqanchis jina, jujkunapaq mañapusun chayqa, imaymanapin paykunata yanapasunchis. Ichaqa jujkunapaq mañapuspaqa allin yuyaywanmi chayta ruwananchis. Manan mana yachasqantapas willashasunman jinachu Diosmanqa imatapas willananchis. Manataqmi ninanchischu: “Kaytaqa khaynatan allichawaq, otaq jaqaynatan ruwawaq”, nispaqa. Payqa allintan yachan imatas sapankanchis necesitanchis chayta. Manaraq reparakushaqtinchismi payqa yachanña chayta (leey Mateo 6:8). Chhaynaqa, ¿imaraykutaq jujkunapaqri mañapunanchis? Kaypi yachasqanchis jina, imaymanan razón kashan chaypaqqa. Ichaqa kallantaqmi juj razonpas. Jujkunapi piensaq runaqa paykunapaqpas mañapunmi. Arí, noqanchisqa jujkunapaqqa mañapunchis paykunata munakusqanchisraykun. Chayta rikuspaqa ¡maytachá Jehová Diosqa kusikun! Chaymantapas chayta ruwaspaqa pay jina munakuq kasqanchistan noqanchispas rikuchishanchis.

17, 18. ¿Imaraykun nisunman “Jehová Diosqa allintan qhawashan jujkunapaq mañapunchischus manachus chaytaqa” nispa? Juj ejemplota willay.

¹⁷ Mayninqa manapaschá mañakusqanchisqa imapipas jujkunata yanapanqachu. Chaywanpas hermanonchiskunapaq mañapuspanchisqa, paykuna munakusqanchistan rikuchishanchis. Jehová Diosqa kusikunmi chaywan. Chaypaq piensasun iskay wawachayoq taytapi. Yaqapaschá qharikaqcha onqosqa kashanman, chayta rikuspataq warmikaqchaqa papanta ninman: “Papáy, hermanochayta yanapay, nishu onqosqan kashan, yanapay”, nispa. Papanqa munakuntaq wawanta chayqa, cuidashanmi, yanapashanmi. Chaywanpas ¡maytachá payqa kusikun ususichan hermanochanmanta llakikusqanta rikuspaqa!

¹⁸ Chhayna kananchistan Jehová Diosqa munan, jujkunapi piensananchista paykunapaq mañapunanchistan munan. Chayta ruwaspan rikuchisun imaynas mana noqallanchispichu piensanchis chayta, imaynas hermanonchiskunaq hermananchiskunaq allin kanankupi piensanchis chayta (2 Tes. 1:3; Heb. 6:10). Chaymantapas kaypi yachasqanchis jina, mayninqa mañakuspaqa jujkunataqa allintan yanapasunman. Chhaynaqa, ¡amapuni jayk’aqpas qonqasunchu jujkunapaq mañapuytaqa! Arí, ¡amapuni qonqasunchu hermanonchiskunataqa!