Umalliq T’aqapi churakun iskay hermanokunatawan

2024 watapin 5 p’unchay octubre killapi, reunión anual aparikushaqtin willakamurqan imaynas hermano Jody Jedele jinallataq hermano Jacob Rumph Umalliq T’aqapi kanankupaq nombrasqa karqanku chayta. Paykunaqa sapankankun unayña tukuy sonqonkuwan Jehová Diosta servishanku.

Hermano Jody Jedelemanta rimasun. Payqa Estados Unidospi Misuri llaqtapin nacesqa. Paymanqa papanwan mamitanpiwansi yachachisqaku Diospa simintaqa. Paypa tiyasqan llaqtapiqa pisillas kasqa Jehová Diospa testigonkunaqa. Chayraykus hermanokunaqa lliu ladomanta risqaku chaypi Diosmanta willaypi yanapakuq, chhaynapis hermanonchis Jodyqa askha hermanokunata reqsisqa. Chaymantapas allintas payqa rikusqa imaynas Diospa llaqtanpiqa juj sonqolla kausanchis chayta. Jinas 1983 watapi 15 p’unchay octubre killapi bautizakapusqa. Paymanqa gustaqpunis Diosmanta willayqa, chaysi colegionta tukuspaqa precursor regular kapusqa. Chayqa 1989 watapi setiembre killapin karqan.

Paypas hermananpas juch’uyllaraq kashaqtinkuqa papankuqa apallaqkupunis Betelman. Jinas paykuna nisqaku: “Kaypipunin Diosta serviyta munayman”, nispa. Chhaynapunitaqsi kasqapas, iskayninkus Betelman invitasqa kasqaku. Hermano Jodyqa 1990 watapin setiembre killapi Wallkillpi kaq Betelpi llank’ananpaq invitasqa karqan. Payqa ñaupaqtaqa Departamento de Limpieza nisqapin llank’arqan, chaymantataq Servicios Médicos nisqapi.

Chay tiempopiqa chay qayllapi kaq español rimaypi iñiq t’aqakunaqa allintan wiñarisharqan, jinan munasharqanku qhari hermanokunata. Chayta yachaspan hermano Jodyqa jujnin iñiq t’aqapi yanapakuq rirqan, yacharqanmi español simitapas. Chay qhepallamanmi payqa reqsisqa Dámaris sutiyoq precursora hermanata. Tiempowanqa casarakapurqankun paykunaqa, jinan paypas hermano Jodywan kuska Betelpi llank’ayta qallarirqan.

2005 watapiqa lloqsirqankun Betelmanta hermanaq mamitanta hermanoq papanta mamitantawan cuidaq. Chay tiempopiqa precursor regularmi paykunaqa karqanku. Hermano Jodyqa askha kutitan Precursorkunapaq Escuelapi yachachirqan. Chaymantapas payqa Comité de Enlace con los Hospitales nisqapi, tiyasqan ladopi kaq Comité Regional de Construcción nisqapi iman yanapakurqan.

2013 watapiqa jujmantan invitallarqankutaq Betelpi llank’anankupaq, kay kutipiqa Warwick ladopi Betel ruwakusqanpin yanapakurqanku. Chaymantaqa Pattersonpi Wallkillpi iman servirqanku. Hermano Jodyqa, Departamento Local de Diseño y Construcción nisqapi, Servicios de Información sobre Hospitales nisqapi iman llank’arqan. 2023 watapitaq marzo killapi nombrasqa karqan Comité de Servicio nisqapi yanapakunanpaq. Chay llank’anakunapi yanapakusqanmanta rimaspan kay hermanonchis nin: “Mayninqa yaqapaschá ima mosoq ruwanatapas chaskispaqa llakisqa kasunman. Ichaqa chhaynapi tarikuspan astawanraq Jehová Diospi confiananchis, paymi imatapas ruwananchispaq kallpata yachayta ima qowasun”, nispa.

Hermano Jacob Rumphmanta rimasun. Payqa Estados Unidospi California llaqtapin nacesqa. Pay juch’uyllaraq kashaqtinqa mamitanqa manas allinchu iñiypi kashasqa. Chaywanpas mamitanqa tukuy atisqantas ruwasqa payman Diosmanta yachachinanpaq. Chaymantapas payqa sapa watansi abuelanta visitaq, chaypis abuelanqa Diosmanta rimapayaq. Payqa tukuy kallpas Diosta servishasqa. Jinas hermano Jacobqa 13 watanpi kashaspa valekusqa Bibliamanta yachachinankupaq. Payqa 1992 watapin 27 p’unchay setiembre killapi adolescentellaraq kashaspa bautizakapusqa. Chaymantapas mamitanqa jujmantas tukuy kallpawan Diosta serviyta qallaripusqa. Llapa familiansi kallpata jap’ispa iñiypi wiñaripusqaku jinaspa bautizakapusqaku.

Waynallaraq kashaspaqa hermano Jacobqa kusisqallatas precursorkunataqa rikuq. Chaysi paypas segundarianta tukuspa 1995 watapi setiembre killamantapacha precursor kapusqa. 2000 watapis payqa Ecuador nacionman ripusqa. Chaypiqa maypichá munasharanku predicaqkunata chaymansi astakusqa. Chay ladopi servishaspas payqa reqsisqa Canadá nacionmanta Inga sutiyoq precursora hermanata, jinas tiempowanqa casarakapusqaku. Casarakusqanku qhepamanqa juj juch’uy grupopis Diosta servisqaku. Chay grupoqa kunanqa juj jatun congregacionñan kapun.

Tiempowanqa precursor especialmi paykunaqa kapurqanku. Chaymantataq hermano Jacobqa watukuq umalliq kapurqan. 2011 watapin Galaad escuelaman clase 132 nisqaman paykunataqa invitarqanku. Chay escuelamanta lloqsimusqanku qhepamanqa lliu ladomanmi paykunataqa kacharqanku. Juj tiempoqa Betelpin llank’arqanku, chaymantataq misionerokuna karqanku; iñiq t’aqakunata watukuspa iman purirqanku. Chaymantapas hermano Jacobqa Diosmanta willaqkunapaq escuelapi iman yachachirqan.

Coronavirus onqoy mast’arikushaqtinmi paykunaqa Estados Unidosman kutimpuranku. Chayman kutimuspaqa Wallkillpi kaq Betelpin paykunaqa llank’ayta qallarirqanku. Hermano Jacobqa Departamento de Servicio nisqapin capacitacionta chaskirqan. Chaymantataq Ecuadorpi sucursalman kacharqanku, chaypin payqa Comité de Sucursal nisqapi servirqan. 2023 watapitaq Warwickpi oficina central nisqaman wajachirqanku. 2024 watapi enero killapiqa Comité de Servicio nisqapi yanapakunanpaqmi nombrasqa karqan. Maykunapichus Diosta servirqan chaymanta rimaspan payqa nirqan: “Astawanqa piensananchis manan maypichus Diosta servishanchis chaypichu, aswanpas pikunawansi servishanchis chaypin, paykunaqa hermanonchiskunan kanku”, nispa.

May admiraymi chay hermanokunaq llapa imachus ruwasqankuqa, paykunataqa “sumaqtan qhawarinanchis” (Filip. 2:29).