LEEQKUNAQ TAPUKUSQAN

¿Imaraykun qelqanchiskunapi manaña nishutachu lloqsimun Bibliamanta willakuykunaq imachus representasqan?

15 mayo 1951 Qhawaq revistanchispin nikamurqan Bibliamanta willakuykunapi wakin runakuna otaq imapas sucedesqankunaqa hamuq tiempopi huntˈakunanpaq kasqanta. Chaymi ñawpa tiempopi qelqanchiskuna nirqanku Jeftepas, Jobpas, Rebecapas akllasqa cristianokunata representasqankuta. Nillarqantaqmi Deborawan, Rahabwanqa wak ovejakunata representasqankuta (Apo. 7:9). Kay qhepa watakunapin ichaqa manaña chay hinatachu ruwakushan, ¿imanaqtin?

Mayninpiqa Bibliapunin nin willakuykunapi wakin runakunaqa hamuq tiempopi imatapas representasqanta. Pablon Bibliapi huk willakuymanta nirqan “huk rikchˈanachiy” kasqanta, chayqa hamuq tiempopiraq huntˈakunan kasqanta. Chay willakuyqa karqan 2 warmikunamantan. Primer kaq warmiqa Abrahampa kamachinmi karqan Agar sutiyoq, payqa Israel naciontas representarqan. Hukninkaq warmitaq karqan Abrahampa esposan Sara, payqa hanaq pachapi Diospa familiantas representarqan, chaymi nikun Jehová Diospa esposan nispa (Gál. 4:21-31). Nillarqantaqmi Melquisedecqa Jesusta representasqanta (Heb. 6:20; 7:1-3). Hinaspapas nillarqantaqmi profeta Isaiaspas wawankunapas Jesusta akllasqa cristianokunatawan representasqanta (Heb. 2:13, 14). Jehová Diosmi chaykunata Bibliapi qelqachirqan, chaymi creenanchis.

Rikusqanchis hina, Bibliamanta willakuykunapi wakin runakunaqa hamuq tiempopaqmi imatapas representan, ichaqa manan tukuy ruwasqankuchu imatapas representan. Pablon willarqan Melquisedecqa Jesusta representasqanta. Huk kutinmi Abraham 4 reykunata maqanakuypi atiparqan, hinan Melquisedecqa tˈantata vinotawan Abrahamman aparqan. ¿Chay ruwasqanpas hamuq tiempopi imapas pasanantachu representan? Pabloqa manan ima ninpaschu, chaymi mana imawanpas tupachishananchischu (Gén. 14:1, 18).

Ichaqa chaytan ruwasharqanku religionmanta wakin qelqaqkuna. Jesuspa wañupusqan qhepamanmi Bibliapi willakuykunata hamuq tiempopi imakunawanpas tupachirqanku. Allin reqsisqa libroq nisqan hina, religionmanta wakin qelqaqkunaqa piensarqankus willakuykunapi tukuy kaq imatapas representasqanta. Ejemplopaq, Biblian willan Jesús kawsarimpuspa qatikuqninkunaman rikhurisqanmanta, chay tutapin 153 challwakunata hapˈirqanku. Chay libroq nisqan hina, wakin qelqaqkunaqa 153 numerotas imaymanawan tupachisqaku imatapas representasqanta piensaspanku.

Agustín de Hiponan estudiarqan 5 tˈantawan, 2 challwawan 5.000 runakunata Jesús mikhuchisqanta. Paymi nirqan cebadamanta 5 tˈantakunaqa Bibliapi 5 primer librokuna representasqanta. Hinaspapas chay tiempopiqa cebadatan trigomanta aswan menospaq qhawariqku, chaysi tupan Bibliapi antiguo testamentoqa mosoq testamentomanta menos valorniyoq kasqanwan. Nillarqantaqmi 2 challwakunaqa huk reyta huk sacerdotetawan representasqanta. Huk runataq estudiarqan Jacobpa Esaumanta phiwi churi kasqanta huk plato puka mikhunawan rantikusqanta, chaysi representan Jesús yawarninwan hanaq pachapaq runakuna rantikusqanta.

¿Cheqaqpaqchu chay nisqanku kanman? Chayta yachanapaqqa Bibliapin qhawarinanchis. Sichus Bibliapuni niwanchis ima willakuypas hamuq tiempopi huntˈakunanpaq kasqanta otaq imatapas pitapas representasqanta chayqa, creenanchismi. Sichus mana ima ninpaschu chayqa, manan creenanchischu nitaqmi imawanpas tupachinanchischu.

Chhaynaqa, ¿imaynapin Bibliapi willakuykuna allinninchispaq kanman? Pablon nirqan: “Ñawpa tiempopi qelqasqakunaqa yachaqananchispaqmi qelqasqa karqan, ahinapi chay qelqakunaq takyachisqan sonqochasqan kaspa suyakuyniyoq kananchispaq”, nispa (Rom. 15:4). Chay simikunata kasukuspan ñawpa tiempopi akllasqa cristianokunaqa Bibliapi willakuykunamanta yachaspa chayman hina kawsarqanku. Ñoqanchispas akllasqa cristianoña otaq wak ovejakunamantaña kanchis chaypas, imaymanatan yachasunman chay willakuykunamanta hinaspa chayman hina kawsasunman (Juan 10:16; 2 Tim. 3:1).

¿Imatan chaykunamanta yachasunman? Bibliapi willakuykunaqa manan akllasqa cristianokunallapaqchu, wak ovejakunallapaqchu nitaq ñawpa cristianokunallapaqchu. Aswanpas ñawpa tiempomantapachan llapanchista yanapawarqanchis. Jobpa ñakˈariyninkunaqa manan Primera Guerra Mundial nisqapi ñakˈariq cristianokunatachu representarqan. Aswanpas lliw ñakˈariq cristianokunan Jobpa vidanmanta yachaspa sonqochakurqanku, warmiña, qhariña, akllasqa cristianoña, wak ovejakunaña karqanku chaypas. Llapankutaqmi Job hina rikurqanku Jehová Diospa munakuyninta khuyapayakuynintawan (Sant. 5:11).

Kay tiempopipas askha kurak cristianakunan Débora hina huntˈaq sonqo kanku, askha wayna umallikunataq Eliú hina allin yuyayniyoq kanku. Hinaspapas askha precursorkunan Jefté hina mana manchakuspa Diospa munayninta ruwanku, kallantaqmi Job hina pacienciayoq cristianokunapas. Chaymi Jehová Diosta mayta agradecekunchis ñawpa tiempopi huntˈaq sonqo runakunaq vidanta Bibliapi qelqachisqanmanta, chaykunan sonqochawanchis kallpachawanchispas.

Chaykunaraykun qelqanchiskunapiqa manaña nishutachu lloqsimun Bibliapi willakuykuna imachus representasqan. Aswanpas kunanqa yachachiwanchis imaynatachus Bibliapi willakuykunaman hina kawsananchistan.