Cristoq wawqenkunata yanapasun

1, 2. a) ¿Ima willakuykunatan Jesús amigonkunaman willarqan? (Kay paginapi dibujota qhaway.) b) ¿Imakunatan yachananchis ovejakunamanta cabrakunamantawan willakuypi?

JESUSMI amigonkunawan rimasharqan, paykunan karqanku Pedro, Andrés, Santiago, Juan. Chaypin huntˈaq kamachimanta willarqan, 10 sipaskunamanta, bolsa qolqemantawan. Hinamanmi huk willakuytawan willallarqantaq, chaypin ‘runaq churinmanta’ rimarqan, runakunata juzgananpaq hamunanmantawan. Chay willakuypin ‘runaq churinqa’ 2 tˈaqapi runakunata tˈaqanqa. Huknin kaq tˈaqatan “ovejakuna” nispa sutichanqa, huk kaq tˈaqatataq “cabrakuna” nispa. Chay willakuypin rimallarqantaq ‘reypa wawqenkunamanta’ (leey Mateo 25:31-46).

² Chay willakuypin Jesús nirqan wakin runakuna wiñay kawsayta chaskinankuta, wakintaq wañuchisqa kanankuta. Chaymi ñoqanchispas yachananchis imatas chay willakuy nishan, imatas ruwananchis wiñay kawsayta chaskikunanchispaq chaytawan. Hinaspapas kaykunatan yachananchis: ¿Imaynatan Jehová Dios chay willakuyta entiendechiwanchis? ¿Imaynapin chay willakuy predicacionwan tupan? ¿Pikunan predicananku? ¿Imaraykun huntˈaq sonqollapuni kananchis? ¿Imaraykun reypa wawqenkunata yanapananchis?

¿IMAYNATAN JEHOVÁ DIOS CHAY WILLAKUYTA ENTIENDECHIWANCHIS?

3, 4. a) ¿Imakunatan yachananchis ovejakunamanta cabrakunamantawan willakuyta entiendenapaq? b) ¿Imaynatan 1881 watapi entienderqanchis ovejakunamanta cabrakunamantawan willakuyta?

³ Ovejakunamanta cabrakunamantawan willakuyta allinta entiendenanchispaqqa kaykunatan yachananchis: 1) ¿Pitan representan ‘runaq churin’, rey, reypa wawqenkuna, ovejakuna, cabrakunapas? 2) ¿Haykˈaqmi runaq churin decidin pikunachus ovejakuna kasqankuta, pikunachus cabrakuna kasqankuta? 3) ¿Imaynatan runaq churin decidin wakin runakuna oveja kasqankuta wakintaq cabrakuna kasqankuta?

⁴ Qhawaq revistan 1881 watapi nirqan ‘runaq churinpas’, reypas Jesusta representasqanta. Reypa wawqenkunataq hanaq pachapi Jesuswan kuska kamachikamuq cristianokunata representasqanta, kay pachapi tiyaq perfecto runakunatawan. ¿Haykˈaqmi Jesús decidinan karqan pikunachus ovejakuna kasqankuta, pikunachus cabrakuna kasqankutapas? Jesuspa kamachikamusqan 1.000 wata ukhupin. ¿Imaynatan Jesús decidinan karqan wakin runakuna oveja kasqankuta? Tukuy ruwasqankupi Diospa munakuyninta rikuchiqtinkun.

5. ¿Imaynatan 1923 watapi Qhawaq revista sutˈinchamurqan ovejakunamanta cabrakunamantawan willakuyta?

⁵ Tiempowanmi ichaqa Jehová Dios yanapawarqanchis chay willakuyta aswan allinta entiendenanchispaq. 15 octubre 1923 Qhawaq revistan chay willakuymanta astawan sutˈinchamurqan. Chay revistaq nisqan hina, ¿pitan representan ‘runaq churin’? Jesustan. ¿Pitan representan reypa wawqenkuna? Hanaq pachamanta Jesuswan kamachikamuq cristianokunatan. ¿Pikunatan ovejakuna representan? Kay pachapi tiyanankupaq suyakuyniyoqkunata. ¿Haykˈaqmi Jesús decidinqa pikunachus ovejakuna kasqankuta? Manaraq 1.000 wata kamachikuynin qallarishaqtinmi. ¿Imarayku? Wakin wawqenkuna kay pachallapiraq kasqanraykun. Chay willakuymi nirqan kay pachapi tiyaq runakuna reypa wawqenkunata yanapasqankuta. ¿Imaynatan Jesús decidinqa oveja kasqankuta? Paypi creesqankuta rikuspan, kamachikuynin aswan allin kawsayta apamunanpi iñisqankutawan rikuspan.

6. ¿Imaynatan 1995 watapi astawan sutˈinchakamurqan ovejakunamanta cabrakunamantawan willakuy?

⁶ Askha watakunan piensarqanchis huk runa oveja kaspaqa predicacionninchista uyarikusqanta, mana uyarikuqtintaq nirqanchis cabrakuna kasqankuta, chay hinapin juzgasqa kasharqanku. 1995 watapin ichaqa manaña chay hinatachu piensarqanchis. Chay watapi Qhawaq revistan tupanachirqan Mateo 24:29-31 textota Mateo 25:31, 32 textowan (leey). Chaymi nirqan manchay ñakˈariy tiempopi “lliphlli-kayninpi” Jesús hamuspa runakunata juzganan kasqanta.a

7. ¿Imaynatan kunan entiendenchis ovejakunamanta cabrakunamantawan willakuypi?

⁷ Kunanqa aswan allintan entiendenchis chay willakuyta. ¿Pitan representan ‘runaq churinpas’, reypas? Jesustan. ¿Pitan representan reypa wawqenkuna? Akllasqa cristianokunatan, paykunan hanaq pachamanta Jesuswan kamachikamunqaku (Rom. 8:16, 17). ¿Pikunatan ovejakunapas cabrakunapas representan? Llapa runakunatan. ¿Haykˈaqmi juzgasqa kanqaku? Manchay ñakˈariy tukukushaqtinmi. ¿Imaynatan Jesús decidinqa ovejakuna otaq cabrakuna kasqankuta? Imaynatachus wawqenkunata yanapasqankuta qhawarispan. ¡Maytan Jehová Diosta gracias ninchis Mateo 24, 25 textokunapi willakuykunata entiendechiwasqanchismanta!

¿IMAYNATAN KAY WILLAKUY RIKUCHIN PREDICANANCHISPUNI KASQANTA?

8, 9. ¿Imanaqtinmi Jesús ‘chaninpaq’ qhawarinqa oveja kaqkunata?

⁸ Manaña chay willakuypi Jesús nirqanchu predicaychis nispapunichu chaypas, sutˈitan reparanchis predicananchispaq kallpachawasqanchista. ¿Imanaqtinmi chayta ninchis?

⁹ Chay willakuyqa huk ejemplollan, manan cheqaq ovejakunamantachu nitaq cheqaq cabrakunamantachu rimashan. Runakuna oveja hina qhawarisqa kanankupaqqa manan cheqaq pˈachatachu, nitaq cheqaq mikhunatachu akllasqa cristianokunaman qonanku karqan, nitaq onqosqa kashaqtinkuchu cuidananku karqan, nitaq carcelmanpaschu visitananku karqan. Aswanpas oveja kanankupaqqa akllasqa cristianokunatan yanapananku, Jesuspa wawqenkuna kasqankupitaq creenanku. Chaymi Jesusqa ‘chaninpaq’ paykunata qhawarinqa (Mat. 10:40-42; 25:40, 46; 2 Tim. 3:1-5).

10. ¿Imaynatan ovejakuna Cristoq wawqenkunata yanapankuman?

¹⁰ Ichaqa, ¿imapin akllasqa cristianokunata yanapananku karqan? Predicacionpin. Manaraq ovejakunamanta cabrakunamantawan willashaspan Jesusqa rimasharqan tukukuy pˈunchaykunapi imakuna pasananmanta (Mat. 24:3). Nillarqantaqmi Diospa gobiernonmanta allin willakuykunata predicananku kasqanta (Mat. 24:14). Hinaspapas bolsa qolqemantan willallarqantaq. Chaywanmi Jesusqa akllasqa cristianokunata nisharqan predicacionpi anchata llankˈanankupaq. Ichaqa, ¿imaynatan pachantinpi predicankuman pisilla kashaspanku? Ovejakunamanta cabrakunamantawan willakuypin Jesús nirqan ovejakuna akllasqa cristianokunata yanapanankuta. Chhaynaqa, ¿simillankuwanchu kallpachananku karqan? Otaq, ¿predicanankupaq qolqeta donaspallachu?

¿PIKUNAN PREDICANANKU?

11. ¿Imatan tapukusunman?

¹¹ Kunanqa 8 millonñan Jesusta qatikuqninkuna kanchis, yaqa llapankutaqmi wak ovejakunamanta kanku. Jesusqa manan paykunatachu predicanankupaq encargarqan, aswanpas akllasqa cristianokunallamanmi chay ruwayta qorqan (Mat. 25:14-18). Chhaynaqa, ¿predicanankuchu wak ovejakuna? Arí. ¿Imarayku?

12. ¿Imatan yachasunman Mateo 28:19, 20 textopi Jesuspa nisqanmanta?

¹² Jesusmi llapa qatikuqninkunata predicanankupaq kamachirqan. Kawsarimpusqan qhepatan Jesusqa kamachirqan ‘lliw kamachikuyninkunata’ hukkunaman yachachinankupaq. Jesuspa qatikuqninman tukupuqkunapas predicanallankutaqmi karqan (leey Mateo 28:19, 20). ¿Imatan chaymanta yachasunman? Llapanchismi predicananchis akllasqa cristianokunamantaña kasunman manaña chaypas (Hech. 10:42).

13. ¿Imatan Apocalipsis libro rikuchiwanchis?

¹³ Apocalipsis libron rikuchin akllasqa cristianokunapas hukkunapas predicananku kasqanta. Huk rikhuriypin apóstol Juan rikurqan huk “noviata” runakunaman “kawsay unuta” ukyanankupaq invitashaqta. Noviaqa 144.000 akllasqa cristianokunatan representan, paykunan Jesuswan kuska hanaq pachamanta kamachikamunqaku (Apo. 14:1, 3; 22:17). Unutaq representan Jesuspa sacrificio ruwasqanta, chaywanmi runakuna huchankumanta pampachasqa kanku, wañuymantapas salvasqa (Mat. 20:28; Juan 3:16; 1 Juan 4:9, 10). Chay sacrificiomanta runakuna yachanankupaqmi akllasqa cristianokuna predicashanku (1 Cor. 1:23). Ichaqa kallantaqmi kay pachapi kawsayta suyakuq cristianokunapas. Paykunapas kamachisqan kanku hukkunata invitamunankupaq, chay hinapi kawsay unuta ukyanankupaq. Chaytan ruwanku predicaspa. Chaymi rikuchiwanchis allin willakuykunata llapa uyarikuqkuna predicanallankutaq kasqanta.

14. ¿Imata ruwaspan “Cristoq kamachikuy siminta” huntˈanchis?

¹⁴ “Cristoq kamachikuy siminta” huntˈaqkunaqa predicanankun (Gál. 6:2). Jehová Diosqa munan llapallanchis kaq kamachikuyllata kasukunanchistan. Imaynan ñawpa Israel llaqtanpas, chaypi tiyaq wak llaqtayoq runakunapas kaq kamachikuyllata kasukurqanku hinata (Éx. 12:49; Lev. 24:22). Kunanqa manañan ñawpa kamachikuy simitachu kasukunanchis, ichaqa kasukunanchismi “Cristoq kamachikuy siminta” akllasqa cristianokunaña otaq wak ovejakunaña kaspapas, chaypi huknin kamachikuymi munakuy (Juan 13:35; Sant. 2:8). Chaymi munakunanchis Jehová Diosta, Jesusta runakunatapas, chay munakuytan astawanqa rikuchisun hukkunaman predicaspa (Juan 15:10; Hech. 1:8).

15. ¿Imakunan rikuchiwanchis Jesuspa llapa qatikuqninkuna predicananku kasqanta?

¹⁵ Jesusqa pisi qatikuqninkunallamanmi wakin kamachikuykunata qorqan, chaywanpas llapankun kasukurqanku. 11 qatikuqninkunallawanmi Jesusqa rimanakurqan hanaq pachamanta paywan kamachikamunankupaq, ichaqa 144.000 runakunan Jesuswan kuska kamachikamunqaku (Luc. 22:29, 30; Apo. 5:10; 7:4-8). Kawsarimpusqan qhepamanpas Jesusqa pisi qatikuqninkunallamanmi nirqan predicamunankupaq (Hech. 10:40-42; 1 Cor. 15:6). Ichaqa chay tiempopi Jesusta llapa qatikuqkunan predicarqanku (Hech. 8:4; 1 Ped. 1:8). Chaymi ñoqanchispas predicananchispuni manaña Jesuspa kamachisqan ratupichu kasharqanchis chaypas. Kay tiempopiqa 8 millón Testigokunañan predicashanchis, chay hinapin Jesuspi iñisqanchista sutˈita rikuchishanchis (Sant. 2:18).

CRISTOQ WAWQENKUNATAN YANAPANANCHIS

16-18. a) ¿Imakunata ruwaspan Cristoq wawqenkunata yanapasunman? b) ¿Imaraykun kunanmantapacha Cristoq wawqenkunata yanapananchis?

¹⁶ Saqraqa pisi tiempollamantan manaña ima ruwaytapas atinqachu, chaymi kay pachapiraq kashaq Cristoq wawqenkuna contra astawan sayarishan (Apo. 12:9, 12, 17). Chaywanpas manan tatichiyta atinchu akllasqa cristianokunaq predicación aparichisqankuta, astawanraqmi predicacionqa yapakushan, askha runataq astawan Diosman achhuykamushan. Chaymi rikuchin Jesusqa akllasqa cristianokunata yanapashasqanta pusarishasqantapas (Mat. 28:20).

¹⁷ ¡Maytan kusikunchis akllasqa cristianokunata predicacionpi yanapaspa! Ichaqa, ¿imakunatawanmi ruwasunman yanapananchispaq? Huñunakuna wasikunata, sucursalkunata hatarichiypin llankˈaysikusunman, qolqetapas churasunmanmi. Hinaspapas umallikunatan kasukunanchis, Diospa llaqtanta pusarinankupaq umalli tˈaqaq churasqan iñiqmasikunatapas (Mat. 24:45-47; Heb. 13:17).

¹⁸ Pisi tiempollamantan kay pachapiraq kashaq akllasqa cristianokunaqa hukpaqkama sellasqa kanqaku, hinamanmi manchay ñakˈariy chayamunqa (Apo. 7:1-3). Manaraq Armagedón qallarishaqtintaqmi Jesusqa akllasqa cristianokunata hanaq pachaman pusapunqa (Mat. 13:41-43). Chaymi ovejata hina Jesús qhawariwananchispaqqa kunanmantapacha wawqenkunata yanapananchis.