¿Imaynatan Dios munakusqanchista rikuchisunman?

1, 2. ¿Imaynatan Jehová Dios yachachiwarqanchis munakuq kananchispaq?

YAQA llapa taytakunan ninku ruwayninkuwan wawankuta yachachisqankuta. Chaytan Jehová Diospas ruwarqan. Apóstol Juanmi nirqan: “Ñoqanchisqa Diostan munakunchis, ñawpaqtaraq pay munakuwasqanchisrayku”, nispa (1 Juan 4:19). Diosqa munakuyninta rikuchiwaspanchismi munakuyta yachachiwarqanchis.

² ¿Imaraykun Biblia nin “ñawpaqtaraq” Dios munakuwasqanchista? “Huchasaparaq kashaqtinchis” churinta wañunanpaq kachamusqanrayku (Rom. 5:8). Jehová Diosmi chay sacrificiota ruwarqan huchamanta wañuymantawan kacharichiwananchispaq, chhaynapin ruwayninwan yachachiwarqanchis munakuq qoykukuq kananchispaq (1 Juan 4:10). Hinaspapas chay sacrificioraykun Diospa amigon kayta atinchis, munakusqanchistataq rikuchiyta atinchis.

3, 4. ¿Imaynatan Jehová Diosta munakunanchis?

³ Jehová Diosqa ancha munakuyniyoqmi. Chaymi Jesusqa nirqan: “Señor Diosniykitan munakunki tukuy sonqoykiwan, tukuy almaykiwan, tukuy yuyayniykiwan, tukuy kallpaykiwan ima”, nispa. Chaymi aswan importante kamachikuyqa (Mar. 12:30). Jehová Diosqa munan tukuy sonqonchiswan munakunanchistan. Manan paymanta astawanqa pitapas imatapas munakunanchischu, mana hinaqa phiñakunmanmi. Ichaqa munakunallanchistaqmi piensayninchiswan ruwayninchiswanpas (leey Miqueas 6:8).

⁴ Chhaynaqa vidanchiswan, tukuy kaqninchiskunawan iman Diostaqa munakunanchis. Sichus cheqaqtapuni munakusun chayqa, paymi vidanchispi aswan importante kanqa. Ñawpaq estudiopin yacharqanchis imaynata Jehová Dios munakuwasqanchista rikuchisqanta, kunantaq yachasun imaynatan Dios munakusqanchista rikuchisunman chayta.

AGRADECEKUQ KASUN

5. ¿Imatan ruwananchis Diospa qowasqanchispi piensaspa?

⁵ Pipas huk regalota qowaqtinchisqa agradecekunchismi. Chaytan rikuchinchis regalawasqanchista utilizaspa. Biblian nin Diosqa imaymana allinkuna qowasqanchista (Sant. 1:17). Jehová Diosmi tukuy necesitasqanchista qowanchis kusisqa kawsananchispaq, chaymi ancha agradecesqa kanchis. Chaykunan reparachiwanchis Diosqa ancha munakuwasqanchista, chaymi ñoqanchispas munakusqanchista rikuchiyta munanchis.

6. ¿Imatan Israel runakuna ruwananku karqan Jehová Diosmanta allin kaqkunata chaskishanallankupaq?

⁶ Jehová Diosqa Israel runakunamanmi imaymana allinkunata qorqan. Pachak-pachak watakunan kawsanankupaq imachus necesitasqankuta qorqan, leykunatan qorqan chhaynapi imachus ruwanankuta yachanankupaq (Deut. 4:7, 8). Kamachikuy simin nirqan “allinnin ñawpaq rurusqanta” Diosman qonankuta (Éx. 23:19). Jehová Diosmanta allin kaqkunata chaskishanallankupaqqa, kasukuqmi kananku karqan, allin kaqninkutataq Diosman qonanku karqan. Chhaynapin rikuchinanku karqan Diosman agradecido kasqankuta (leey Deuteronomio 8:7-11).

7. ¿Imaynatan ‘tukuy kaqninchiskunawan’ Dios munakusqanchista rikuchisunman?

⁷ Ñoqanchisqa manañan Israel runakuna hinachu ofrendakunata Diosman haywanchis, ichaqa ‘tukuy kaqninchiskunawanmi’ Dios munakusqanchista rikuchisunman (Prov. 3:9). ¿Imaynatan chayta ruwasunman? Qolqenchista churaykuspan, chhaynapin iñiq t’aqanchista yanapashanchis pachantinpi Diospa llaqtantapas. Wakchaña kanchis chaypas, llapanchismi atisunman kaqninchiskunawan Dios yupaychayta, chay hinapin rikuchisun munakusqanchista (2 Cor. 8:12). ¿Imatawanmi ruwasunman Dios munakusqanchista rikuchinapaq?

8, 9. a) ¿Imatawanmi ruwananchis Jehová Dios munakusqanchista rikuchinanchispaq? b) ¿Imatan huk cristiano familianwan kuska ruwarqan?

⁸ Hinaspapas Diosta munakusqanchistan rikuchisunman paypi confiaspa. ¿Imatan Jesús nirqan qatikuqninkunata? Nirqanmi p’achamanta, mikhunamanta ama llakikunankuta. Serviqninkunamanqa Diosmi chaykunata qonan karqan (Mat. 6:31-33). Chaypin ñoqanchispas confiananchis, munakusqanchis runapiqa confianchismi. Chay hinan Dioswanpas kanan, paypi astawan confiasun chayqa munakusqanchistan rikuchisun (Sal. 143:8). Chaymi tapukunanchis: “¿Tiempoytapas kallpaytapas Dios munakusqayta rikuchinaypaqchu utilizashani? ¿Sapa p’unchaypaq necesitasqayta qowananpichu confiani?”, nispa.

⁹ Mike cristianomanta yachasun. Paymi wayna kasqanmantapacha predicaqkunaq necesitakusqan llaqtaman riyta munarqan. Casarakuspa iskay wawayoqña kashaspapas kaqllan chay ruwayta munasharqan. Chaymi familianwan kuska leerqanku revistanchiskunapi lloqsimuq experienciakunata. Chaypin yacharqanku predicaqkunaq necesitakusqanman yanapakuq riq cristianokunamanta. Chaymi imachus necesitasqallankuwan kawsanankupaq decidikurqanku, hinan wasinkuta vendespa huk huch’uy wasiman astakurqanku. Payqa limpiezapaq productokunatan askha runaman vendeq, ichaqa pisi runakunallamanña vendenanpaqmi decidikurqan, hinaspapas internet-ta utilizaspa vendenanpaqmi yacharurqan. Kunanqa paypas familianpas kusisqan huk nacionpi Diosta servishanku. Paymi nin: “Cheqaqpunin Mateo 6:33 textoq nisqanqa”, nispa.

DIOSPA YACHACHIWASQANCHISPI PIENSASUN

10. ¿Imaraykun David hina Jehová Diospa kamasqankunapi, yachachikuyninkunapipas piensananchis?

¹⁰ Rey Davidqa Diospa kamasqankunapi piensaspan nirqan: “Diospa qhapaq-atiyninmantan hanaq pachaqa sut’ita willakun”, nispa. Diospa yachachikuyninkunapi piensaspataq nirqan: “Diospa yachachikuyninqa chaninpunin, sonqotan llanllachin [...], mana yachaqtan yachayniyoqman tukuchin”, nispa. Chaykunapi piensasqanraykun Davidqa Diosta astawan munakurqan, chaymi nirqan: “Diosníy, hatun Qaqaymi, qespichiqniymi kanki, simi rimarisqaykunapas yuyaykusqaykunapas sonqoykipaq hinapuni kachun”, nispa (Sal. 19:1, 7, 14). Ñoqanchispas rey David hinan Diospa kamasqankunapi, yachachikuyninkunapi piensananchis, chay hinapin Dioswan aswan amigontin kasun munakusqanchistataq rikuchisun.

11. ¿Imaynatan Diospa yachachiwasqanchisman hina ruwasunman? (27 paginapi fotokunata qhaway.)

¹¹ Kay tiempopiqa astawanmi Diospa munayninmanta, kamasqankunamantapas yachanchis. Askha runakunan universidadpi imaymanata yachayta munanku. Chay yachaymi ichaqa Diosmanta karunchan. Jehová Diosqa manan yachaylla-yachananchistachu munan, aswanpas yachasqanchisman hina allinninchispaq hukkunaq allinninpaqpas ruwananchistan munan (Prov. 4:5-7). ¿Imaynatan chayta ruwasunman? Runakunaman ‘cheqaq-kaqta’ yachachispan, chhaynapi salvakunankupaq (1 Tim. 2:4). Sichus llapa runakunaman Diospa gobiernonmanta yachachisun chayqa, Diostapas runamasinchistapas munakusqanchistan rikuchisun (leey Salmo 66:16, 17).

12. ¿Ima nirqanmi Shannon cristiana?

¹² Wayna-sipaskunapas espiritual mikhuna chaskisqankumantan agradecekunku. Shannon cristianan yuyarin “Dios Sonqo” nisqa asambleata, payqa 11 watanpis kasharqan ñañantaq chunka watanpi. Chay asambleapis llapa wawakunata nisqaku huk sitiollapi tiyanankupaq. Payqa manchasqas kashasqa ichaqa anchatas kusikusqa Los jóvenes preguntan librota chaskikuspa. Paymi nin: “Chay regalowanmi sut’itapuni rikurqani Diospa munakuwasqanta. Maytan kusikuni sumaq regalokuna qowasqanchismanta”, nispa.

DIOSPA WANACHIYNINTA CHASKIKUSUN

13, 14. ¿Imatan ruwananchis Dios wanachiwaqtinchis?

¹³ Diosqa wanachin munakusqan runakunatan imaynan huk taytaqa wawanta wanachin hinata (Prov. 3:12). Yaqapaschá wanachisqa kaspaqa llakisqa tarikusunman, ichaqa chaskikunanchispunin Diospa wanachiynintaqa. Chhaynapin yachasun allin kaq ruwayta thaktaq tarikusunpas (Heb. 12:11). Wanachisqa kaspaqa manan hayk’aqpas phiñakunanchischu. Sichus Jehová Diosta uyarisun hinaspa cambiasun chayqa, munakusqanchistan rikuchisun.

¹⁴ Profeta Malaquiaspa tiemponpin Judá runakuna mana allin sacrificiokunata Diosman haywasharqanku, chaymi anyachikurqanku (leey Malaquías 1:12, 13). Askha kutipin Diosqa anyarqan paykunataq mana uyarikurqankuchu, chaymi castigasqa karqanku (Mal. 2:1, 2). ¿Imatan chaymanta yachasunman? Sichus Jehová Diospa wanachiyninta mana chaskikusunchu chayqa, manañan amigonchischu kanqa.

15. ¿Imatan mana ruwananchischu wanachisqa kaspa?

¹⁵ Yaqa llapa runakunan paykunallapi piensanku manataq munankuchu imachus ruwanankuta hukpa ninanta, nitaq pantasqankumanta correginankutapas. Wakintaq consejokunata sasata chaskikunku. Cristianokunan ichaqa mana chhaynachu kananchis, aswanpas Diospa nisqantan kasukunanchis (Rom. 12:2). Payqa llaqtantan utilizan necesitasqanchis ratopi consejawananchispaq. Yachachiwanchismi imaynata allin amigokunata tarinanchispaq, imakunawan kusirikunanchispaq, imaynata warmipas qharipas tratanakunanchista. Jehová Diospa wanachiwasqanchista chaskikuspa cambiasun chayqa, yachachiwasqanchismanta agradecekusqanchistan rikuchisun munakusqanchista ima (Juan 14:31; Rom. 6:17).

DIOSPA YANAPAYNINTA MAÑAKUSUN

16, 17. a) ¿Imaraykun manaraq imatapas decidishaspa Diospa piensasqanta yachananchis? b) ¿Imatan Israel runakuna ruwarqanku Jehová Diospi confianankumantaqa?

¹⁶ Wawakunaqa tayta-mamankutan maskhanku ima sasachakuypipas tarikuspa. Hatunña kaspapas mayninpiqa tayta-mamankuq yanapanantan mañakunku. ¿Imarayku? Allin consejokunata chaskinankurayku. Jehová Dioswanpas chay hinallataqmi. Payqa dejallawanchismi ñoqanchis kikinchismanta decidinanchista, ichaqa paypi confiasqanchisraykun yanapayninta mañakunanchis. Chayraykun manaraq imatapas decidishaspa paypa piensasqantaraq yachananchis. Diospa yanapayninta mañakuqtinchisqa, santo espiritunwanmi yanapawanchis allinta ruwananchispaq (Filip. 2:13).

¹⁷ Profeta Samuelpa tiemponpin Israel runakuna maqanakuypi ganachikusharqanku Filistea runakunawan. Chaymi Diospa arcanta maqanakuyman aparqanku yanapananpaq piensaspa, manataqmi Jehová Diosta tapurqankuchu imachus ruwanankuta. ¿Iman pasarqan? 30.000 Israel soldadokunan wañurqanku, Diospa arcantataq Filistea runakuna apapurqanku (1 Sam. 4:2-4, 10, 11; leey Proverbios 14:12).

18. ¿Ima ninmi Biblia Diospi confiaymanta?

¹⁸ Diosta sinchita munakuq runan qelqarqan: “Diosta suyakusaq [...] ¡Payqa Diosniymi, qespichiwaqniymi! Diosnilláy, sinchitapunin llakikushani, chaymi qanta yuyariyki”, nispa (Sal. 42:5, 6). ¿Chaytachu qanpas ninki? Yaqapaschá Diospiqa confiankiña. Chaywanpas llapanchismi yachasunman Diospi astawan confiayta. Biblian nin: “Tukuy sonqoykiwan Señor Diosman hap’ipakuy, amataq qan kikiykiq yuyayniykimanqa k’askakuychu. Tukuy ruwasqaykikunapi Señor Diosta yuyariy, paymi cheqan ñanninta pusasunki”, nispa (Prov. 3:5, 6).

19. ¿Imaynatan rikuchisun Jehová Dios munakusqanchista?

¹⁹ Rikusqanchis hina Jehová Diosmi ñawpaqtaqa munakuwarqanchis, chaywanmi yachachiwarqanchis munakuyta. Chaymi piensananchis ñoqanchisrayku tukuy imaymana ruwasqankunapi, sinchita munakuwasqanchispipas. Ñoqanchispas rikuchinanchismi tukuy sonqonchiswan, almanchiswan, yuyayninchiswan, kallpanchiswan ima munakusqanchista (Mar. 12:30).