Jehová Diospa yachachikuyninta chaskikusun

1, 2. a) ¿Imaynatan Testigokuna qhawarinchis Bibliata? b) ¿Ima librokunata leeymi astawan gustasunki?

JEHOVÁ DIOSPA testigonkunaqa anchatan Bibliata respetanchis. Biblian willawanchis jamuq tiempopi sumaq kausay kananmanta, kallpachawanchismi sasachakuykunapi tarikuqtinchis, allin ñannintataqmi pusariwanchis (Rom. 15:4). Chaymi Bibliataqa “Diospa siminta jinapuni” rikunchis (1 Tes. 2:13).

² Bibliaqa llapa runakunapaqmi qelqasqa kashan. Wakinqa evangelio librokunatan gustanku leeyta, chaypi Jesusmanta yachaspa Jehová Diosta astawan reqsisqankurayku (Juan 14:9). Wakinqa profeciakunamanta willaq librokunatan gustanku leeyta, chay librokuna ‘yaqaña sucedenan kaqkunamanta’ willasqanrayku (Apo. 1:1). Wakinqa ancha kallpachasqan sientekunku Salmos librota leespa, wakintaq Proverbios librota leenku allin yachachikuykunata tarinankupaq. ¿Ima librokunata leeymi astawan gustasunki?

3, 4. a) ¿Imaynatan qhawarinki qelqanchiskunata? b) ¿Pikunapaqmi Jehová Dios qelqakunata ruwachishan?

³ Chaymantapas llapa qelqanchiskunatan anchata respetanchis Bibliaq nisqanman jinapuni yachachisqanrayku. Jehová Diospa regalonta jinapunin rikunchis librokunata, folletokunata, revistakunatapas. Chay qelqakunan yanapawanchis Jehová Diospa amigon kananchispaq, iñiyninchispi qaqata sayananchispaqpas (Tito 2:2).

⁴ Chay qelqakunaqa llapa Testigokunapaqmi ruwasqa kashan. Ichaqa kallantaqmi wayna-sipaskunapaq, tayta-mamakunapaq, jujkunapaqpas. Jinaspapas askha qelqakunan kan mana Testigo kaqkunapaq. Chaykunan sut’ita rikuchin Jehová Dios prometesqanman jina ‘sumaq añaka mijunakunata’ llapa runaman apachimusqanta (Is. 25:6).

5. ¿Imaynatan Dios qhawarin qelqanchiskuna estudianapaq kallpachakusqanchista?

⁵ Maytan llapanchispas munasunman llakhi tiyaruspa Biblianchista qelqanchiskunatapas qallariyninmanta tukukuykama leeyta. Ichaqa manan mayqenninchismanpas tiempo aypawanchischu. Chaywanpas Jehová Diosqa anchatan kusikun Bibliata qelqakunatapas estudiananchispaq kallpachakusqanchista rikuspa (Efes. 5:15, 16). Ichaqa, ¿ima piensaymantan cuidakunanchis?

6. ¿Imayna piensaymi iskayachiwasunman llapa qelqakuna estudiayta?

⁶ Yaqapaschá nisunman: “Kay textokunaqa otaq kay willakuyqa manan noqapaqchu”, nispa. Otaq juj qelqa chayaramuqtin nisunman: “Kayqa wayna-sipasllapaqmi” otaq “mana iñiqkunapaqmi”, nispa. Chhaynata piensaspaqa jawa-jawallantan leerusunman otaq pasarullasunman. Chayta ruwasunman chayqa manan yachasunmanchu chaypi sumaq consejokuna kasqanta. Jinaspapas kaytan yuyarinanchis: Bibliapas llapa qelqakunapas Diospa ruwachisqanmi. Diosmi niwanchis: “Noqan Diosniyki Señor Diosqa kani, noqan allinniykipaq yachachiyki”, nispa (Is. 48:17). Kay estudiopin kinsa yanapaykunata yachasun Bibliatapas qelqakunatapas aswan allinta estudianapaq.

¿IMAYNATAN BIBLIATA LEENA?

7. ¿Imaraykun sonqonchista kicharinanchis Bibliata leenapaq?

⁷ Sonqonchistan kicharinanchis. Biblian nin: “Diospa Simin Qelqakunaqa llapallanmi Diospa yuyaychasqan, chayraykun allinpuni”, nispa (2 Tim. 3:16). Bibliapi wakin librokuna ñaupa tiempopi runakunapaqña qelqakuran chaypas, sonqonchista kicharispa leesun chayqa, noqanchistapas yanapawasunmi. Juj iñiqmasin nin: “Bibliata leespaqa imaymana yachachikuykuna kasqanpin piensani”, nispa. Chaypaqmi ichaqa ñaupaqta Diosmanta mañakunanchis, paymi sonqonchista kicharinqa yachachiwasqanchista entiendenapaq (Esd. 7:10; leey Santiago 1:5).

8, 9. a) ¿Imakunatan tapukunanchis Bibliata leespa? b) ¿Imatan Diosmanta yachachiwanchis umalli kayta munaqkunapaq texto?

⁸ Tapukunanchismi. Bibliata leeshaspaqa jujrato sayaykuspan tapukunanchis: “¿Imatan kaypi Jehová Diosmanta yachani? ¿Imaynatan kay texto otaq kay willakuy yanapawanman? ¿Imaynatan kaypi yachasqaywan jujkunata yanapayman?”, nispa. Chay tapukuykunan sonqonchista kicharinqa aswan allinta entiendenanchispaq. Chaypaq juj ejemplota qhawarisun. Bibliapin kamachikuykuna kashan umalli kayta munaqkunapaq (leey 1 Timoteo 3:2-7). Yaqapaschá chay textota leespa ninchis: “Kayqa umalli kayta munaqkunapaqmá, manan noqataqa yanapawanmanchu”, nispa. Ichaqa chay kinsa tapukuykunapi piensaspa leesun chayqa, reparasunmi noqanchispaqpas allin kasqanta.

⁹ “¿Imatan kaypi Jehová Diosmanta yachani?” Jehová Diosqa munanmi umallikuna allin ejemplo kanankuta, chaymi chay kamachikuykunata qoran. Jinaspapas ‘Jesucristoq yawarninwan rantikusqan’ ovejakunatan anchata munakun, chaymi sapanka umallikunata cuentata mañanqa (Hech. 20:28). Chaypin yachanchis umallikunaqa allin cuidasqa kananchispaq churasqa kasqankuta (Is. 32:1, 2). Chhaynaqa, ¿imatan chay texto yachachiwanchis? Jehová Dios llapa iñiqkunapi interesakusqanta.

10, 11. a) ¿Imaynatan umalli kanapaq kamachikuykuna yanapawanchis? b) ¿Imaynatan chay textokunawan jujkunata yanapasunman?

¹⁰ “¿Imaynatan kay texto otaq kay willakuy yanapawanman?” Umalli kaqkunaqa sapa kutillanmi chay kamachikuykunata yuyarinanku imayna kashasqankuta qhawarikunankupaq. Sichus umallikuna allin ejemplo kanqaku chayqa, llapa cristianokunan ‘iñiyninkuta qatikusunchis’ (1 Ped. 5:3; Heb. 13:7). ‘Umalli kayta munaqkunapas’ leeshanallankun chay textokunata, chaypi kamachikuykunata junt’anankupaq (1 Tim. 3:1). Ichaqa llapallanchismi chay kamachikuykunata junt’ananchis. Noqanchispas umallikuna jinan ‘sumaq sonqo’, ‘allin yuyayniyoq’ kananchis (Filip. 4:5; 1 Ped. 4:7).

¹¹ “¿Imaynatan kaypi yachasqaywan jujkunata yanapayman?” Chay textokunatan qhawachisunman Bibliamanta yachay munaqkunaman otaq estudiantekunaman. Chaypin paykuna reparanqaku umallinchiskuna, juj religionkunapi umallikunamanta jujniray kasqankuta. Jinaspapas chay textokunan yanapawasun umallikunata respetananchispaq llank’asqanta anchata valorananchispaq ima (1 Tes. 5:12). Chayta ruwasun chayqa, umallikunapas kusisqan llank’anqaku (Heb. 13:17).

12, 13. a) ¿Imakunatan tapukunanchis estudiasqanchismanta astawan yachanapaq? b) Juj ejemplota willay Bibliata allinta t’aqwiy allinpuni kasqanmanta.

¹² T’aqwirinanchismi. Bibliata estudiashaspan kaykunata tapukunanchis:

• ¿Pin kay librota qelqaran?

• ¿Maypin qelqaran, jayk’aqmi qelqaran?

• ¿Imakunan pasaran kay libro qelqakushaqtin?

Chay tapuykunaman kutichinapaqqa astawanmi t’aqwirinanchis kanqa. Chaymi yanapawasun leesqanchista aswan allinta entiendenapaq.

¹³ Chayta entiendenapaq leesun Ezequiel 14:13, 14 textota, chaypin nin: “Suyuntin runachus noqa contra juchallikunkuman wasanchawankumantaq chayqa, noqan makiyta jaywarispa llapantapuni mijunankuta qechusaq. Paykunamanmi yarqayta kachaykusaq, jinan runakunapas uywakunapas wañuranqaku. Chay suyupitaqchus tiyanman Noepas, Danielpas, Jobpas chayqa, paykuna kinsantillanmi qespichisqa kankuman chanin kasqankurayku. Noqa Apu Señor Diosmi chayta nini”, nispa. Chay textomanta astawan t’aqwirispan yachanchis chay simikuna 612 watapi, manaraq Jesús jamushaqtin qelqakusqanta. Chaypaqqa Noepas Jobpas wañupurankuñan, chaywanpas Diosqa yuyashallaranmi junt’aq sonqo kasqankuta. Danielmi ichaqa kausasharan, yaqapaschá 20 watanpi jina kasharan. Paytapas Noeta Jobta jinan Jehová Diosqa chaninpaq qhawariran. ¿Imatan chaymanta yachanchis? Jehová Diosqa qhawamushanmi tukuy sonqowan serviq wayna-sipaskunata kuraqkunatapas, ancha allinpaqtaqmi qhawarin chay ruwasqankuta (Sal. 148:12-14).

LLAPA QELQAKUNATA LEESUN

14. a) ¿Imaynatan qelqanchiskuna wayna-sipaskunata yanapashan? b) ¿Imapin yanapawasun wayna-sipaskunapaq qelqakunata leey? (27 paginapi fotota qhaway.)

¹⁴ Wayna-sipaskunapaq qelqakuna. Biblia jinan qelqanchiskunapas llapanchista yanapawasunman. Qayna watakunallan wayna-sipaskunapaq askha qelqakuna lloqsimuran.^[1] Wakinmi willan escuelapi sasachakuykunamanta, wakintaq adolescencia nisqaman chayaqtinku ima sasachakuykuna kasqanmanta. ¿Imaynatan chay qelqakuna llapanchista yanapawasunman? Chay qelqakunata leespaqa yachasunmi wayna-sipaskuna ima sasachakuykunapi kasqankuta, chayman jinataq paykunata yanapasun otaq kallpachasun.

15. ¿Imaraykun llapallanchis wayna-sipaskunapaq kaq qelqakunata leenanchis?

¹⁵ Chay qelqakunapi yachachikuykunaqa manan wayna-sipaskunallapaqchu. ¿Imarayku chayta ninchis? Llapallanchismi wayna-sipaskuna jina pruebakunapi tarikunchis, mana allin runakunamanta t’aqakunanchis, allin kusirikuykunata ajllakunanchis otaq genionchista cambiananchis. Jinaspapas chay qelqakunaqa Bibliaq nisqanman jinan ruwasqa kashan, chaymi llapanchispaq allinpuni.

16. ¿Imaynatan wayna-sipaskunapaq qelqakuna kuraqkunatapas yanapashan?

¹⁶ Chay qelqakunaq yanapayninwanmi askha wayna-sipaskuna Diosninchisman astawan k’askakushanku (leey Eclesiastés 12:1, 13). Noqanchistapas yanapawasunmi Diosninchisman astawan k’askakunanchispaq. 2009 abril killamanta ¡Despertad! revistapin lloqsimuran: “Los jóvenes preguntan. ¿Cómo disfrutar la lectura de la Biblia?”, nisqa tema. Chaypin askha yanapaykuna lloqsimuran, jinaspapas juj recuadron kashan k’utuchispa waqaychanapaq. Chay qelqamantan wawayoq cristiana nin: “Biblia leesqaytan mana entiendeqchu kani. Chaymi chay revistapi lloqsimuq yanapaykunawan yanapachikurani, chaypi recuadrotapas k’utuchirani. Kunanqa allintan entiendeni leesqayta. Chayraqmi entiendeni sumaq awasqa llijllaq q’aytunkuna jina Bibliapi librokuna llapallan sumaqtapuni tupasqanta”, nispa.

17, 18. ¿Imaynatan mana iñiqkunapaq qelqakunapas yanapawasunman?

¹⁷ Mana iñiqkunapaq qelqakuna. 2008 watamantapachan juñunakuypi estudianapaq Qhawaq revista lloqsimuran. Ichaqa, ¿leenchischu mana iñiq runakunapaq lloqsimuq revistakunata? Chay revistakunapas yanapawasunmanmi. Kaywan rijch’anachisun: ¿Imaynan sientekunki estudiachisqayki runa chayllaraq juñunakuyman jamuqtin? Kusikunkin riki. Estudianteykipi piensaspan discursota makilla uyarinki, yaqapaschá payta qhawarispa ninki: “Kay discursoqa anchatan yanapanqa”, nispa. Discurso tukuytan ninki: “Kay discursoqa sonqoymanmi chayarun”, nispa.

¹⁸ Chhaynatan sientekusun mana iñiqkunapaq kaq qelqakunata leespapas. Rimasun Qhawaq revistamanta jw.org nisqapi qelqakunamantawan. Chay qelqakunaqa llapa runakunapaq jinan fácil entiendena simikunapi ruwakamun. Chay qelqakunata leesun chayqa, Bibliapi yachachikuykunatan astawan entiendesun. Chaykunan yanapawasun jujkunaman aswan facilta yachachinapaq. ¡Rijch’ariy! revistapas yanapawasunmi Diospi astawan iñinapaq, imachus creesqanchispi tapukuqkunaman kutichinapaqpas (leey 1 Pedro 3:15).

19. ¿Imaynatan rikuchisun agradecido kasqanchista?

¹⁹ Jehová Diosqa allin kananchista munaspan tukuy necesitasqanchista qowashanchis (Mat. 5:3). Sichus chay qelqakunata estudiasun chayman jinataq kausasun chayqa, agradecido kasqanchistan rikuchisun (Is. 48:17).