Jehová Diosllan gobiernaqqa kanan

1, 2. ¿Imamantan mana jayk’aqpas iskayananchischu? (Kay paginapi dibujota qhaway.)

ÑAUPAQ estudiopi yachamusqanchis jina, Satanaspa nisqanman jinaqa manas Diosqa derechonpichu kashan gobiernananpaq. Runakunapas paykunallamantas allin kankuman. Ichaqa, ¿cheqaqchu chay nisqan? Chaypaq kaypi piensasun, gobiernaq runakuna wiñaypaq kausankuman chayri, ¿allinchu kanman kay pachapi kausay? ¿Diospa gobiernonmanta aswan allinchu kanman? Wiñaypaq gustonchisman jina kausasunman chayri, ¿allinchu kausayninchis kanman? ¿Kusisqachu kausasunman?

² Sapankanchismi allinta chaypi piensananchis. Manan pipas iskayananchischu Jehová Dioslla gobernante kananmantaqa, payllatataqmi apoyananchispas. Chaymantapas imaymana razonkunan kan Jehová Dioslla gobernante kananpaqqa, Bibliapin chaykunata willashan. Chaykunamantan kunan astawan yachasunchis.

JEHOVÁ DIOSQA DERECHONPIN KASHAN GOBIERNANANPAQ

3. ¿Imaraykun Jehová Dios derechonpi kashan paylla gobierno kananpaq?

³ ¿Imaraykun Jehová Dios derechonpi kashan paylla gobierno kananpaq? Tukuy atiyniyoq kasqanrayku tukuy imata pay kamasqanrayku ima (1 Crón. 29:11; Hech. 4:24). Janaq pachapaq ajllasqa 144.000 runakunan ninku: “Qanqa, Jehová Diosniyku, alabaytapas, jatunchaytapas, atiytapas chaskinaykipaq jinapunin kanki, tukuy imatapas qan kamasqaykirayku, arí, qanpa munayniykipin tukuy imapas kashan, munayniykipin kamasqapas karanku”, nispa (Apo. 4:11). Chhaynaqa Jehová Diostaq tukuy imata kamaran chayqa derechonpin kashan gobiernananpaq.

4. ¿Imaraykun mana jayk’aqpas Dios contra jatarinanchischu?

⁴ Satanasqa manan imatapas kamaranchu. Chaymi mana ima derechonpas kanchu gobiernananpaq. Orgulloso kaypin payqa ñaupaq runakunawan kuska Dios contra jatariranku (Jer. 10:23). Arí, paykunaqa libren kasharanku ima munasqankutapas ruwanankupaq. Ichaqa, ¿chayraykuchu Dios contra jatarinanku karan? ¿Allintachu chayta ruwasharanku? Manan. Noqanchispas libren kashanchis imata ruwananchispaqpas ichaqa manan chayraykuchu Dios contra jatarinanchis. Yachasqanchis jina Diosllawanmi allin kausaytaqa tarisunchis.

5. ¿Imaraykun nisunman “Diospa ima decidisqanpas chaninmi” nispa?

⁵ Kanmi juj razonpas Jehová Dioslla gobernante kananpaqqa. Payqa chanin Diosmi, pay kikinmi nin: “Noqa Señor Diosmi kani khuyapayakuqqa, kay pachapi chaninchaqpas kuskachaqpas, chaytapunin noqaqa munani”, nispa (Jer. 9:24). Chaypi nisqan jina, Diosmi justicia ruwaqqa. Manan payqa runaq orqomusqan leytaraqchu qhawan justiciata ruwananpaqqa. Paypa ñanninkunaqa chaninpunin ch’uyapunin; chayman jinan runakunamanpas leyta qoran. Bibliapipunin Diosmantaqa nin: “Chaninchaspan allinta ruwaspan kamachishallankipuni”, nispa. Chhaynaqa Diospa ima ley orqomusqanpas, ima decisión ruwasqanpas chaninmi (Sal. 89:14; 119:128). Satanaspan ichaqa simillan waputa imatapas riman, manataq khaytukuy wata gobiernasqanpiqa thaj kausayta apamunchu.

6. ¿Ima razonmi kallantaq Jehová Dioslla gobierno kananpaq?

⁶ Kallantaqmi juj razonpas Jehová Dioslla gobiernaq kananpaqqa. Payqa allintan yachan imayna kamasqas kashan lliu imapas chayta, lliutan payqa reqsin. Paymi Jesusmanpas atiyta qoran, chay atiywanmi doctorkunaq mana qhaliyachisqan warmitapas qhaliyachiran (Mat. 4:23, 24; Mar. 5:25-29). Diospaqqa manan milagrochu karan Jesuspa chay ruwasqanqa. ¿Imarayku? Payqa allintan yachan imayna kamasqas runa kashan chayta. Chaymantapas yachanmi runakuna imayna kausarichiyta, terremotokunata, lloqllakunata imayna sayachiytapas.

7. ¿Pillan allinta yachan thaj kausay imayna apamuyta?

⁷ Satanaspa gobiernasqan mundopiqa imaymanakunatan runakunaqa ruwashanku thaj kausay kananpaq. Ichaqa Jehová Diosllan yachan thaj kausayta imayna apamuytaqa (Is. 2:3, 4; 54:13). Chaymi astawan paymanta yachananchis, chhaynapin apóstol Pablo jina nisun: “¡May jatunpunin Diospa qokuyninpas, yachayninpas, yuyayninpas! ¡Manapunin pipas llapantaqa yachanmanchu imachus piensasqantaqa, manataqmi pipas llapantaqa entiendenmanchu imachus ruwasqankunatapas!”, nispa (Rom. 11:33).

JEHOVÁ DIOSPA GOBIERNONMI ASWAN ALLIN GOBIERNO

8. ¿Imayna gobiernaqmi Dios?

⁸ Yachasqanchis jina, Diosqa derechonpin kashan gobiernananpaq, ichaqa manan común gobiernaqchu payqa. Bibliaq nisqan jina, munakuywanmi gobiernan; manan pipas pay jinaqa kanchu. Dios kikinmi nin: “¡Khuyapayakuq sumaq sonqo Diosmi kani! Manan usqhaylla phiñakuqchu kani, tukuy tiempo munakuqmi cheqaqtaqmi kani”, nispa (Éx. 34:6). Arí, payqa sumaq sonqo Diosmi, sumaqtan tratan serviqninkunatapas. Satanasña nin: “Diosqa manan runakunapi piensanchu”, nispa chaypas, Diosqa papanchis jinan cuidawanchis, noqanchisraykun wawantapas kachamuran (leey Salmos 84:11; Romanos 8:32).

9. ¿Imaynapin yachanchis sapanka serviqninta Dios cuidasqanta?

⁹ Jehová Diosqa allintan cuidan llaqtanta. Ichaqa manan llaqtallantachu cuidan, sapanka serviqninkunatawanmi payqa cuidan. Chaypaq yachasun Israel llaqtapi juezkunaq tiemponpi imachus pasasqanta. Kinsa pachaj watan Diosqa chay llaqtapiqa juezkunata jatarichiran enemigonkunamanta llaqtanta librananpaq. Chay tiempopin Rut-tapas yanaparan. Payqa manan Israel llaqtamantachu karan ichaqa imaymanakunatan saqeran chay llaqtamanta kananpaq. Chaymi Diosqa sumaq sonqo qosata qoran, chaymantataq juj munay wawata. Paypa mirayninmantan Mesiaspas jamuran. Paypa sutintan Bibliapi juj libropas apan. ¡Rutqa maytachá kusikunqa chaykunata yachaspaqa! (Rut 4:13; Mat. 1:5, 16).

10. ¿Imayna gobiernaqmi Jehová Dios? Explicay chayta.

¹⁰ Jehová Diosqa sumaq sonqon, gobiernasqan runakunapas kusisqan kanku, libretaqmi kankupas (2 Cor. 3:17). Chaymi Davidpas Diosmanta niran: “Lliflli-kaywan manchana atiywanmi muyuykun, wasintaqa atiywan kusikuywanmi junt’aykun”, nispa (1 Crón. 16:7, 27). Etanpas nillarantaqmi: “Señor Diosníy, kusisamiyoqmi fiestapi kusisqa yupaychamuqniyki llaqtaqa, kusisamiyoqmi k’anchayniykiq k’anchaykusqan puriqqa, qanwanmi kusikushallanpuni, chaninchayniykiwantaq q’ochukun”, nispa (Sal. 89:15, 16).

11. ¿Imatan ruwananchis Diospa gobiernonta astawan munakunanchispaq?

¹¹ Jehová Dios munakuq kasqanpi allinta piensasun chayqa, astawanmi munasun paypa gobiernonpi kayta. Salmos librota qelqaq jinan nisunchis: “Aswan chaniyoqmi patioykikunapi juj p’unchay kashay jawapi waranqa p’unchay kashaymantaqa”, nispa (Sal. 84:10). Jehová Diosmi kamaqninchisqa, paymi yachan imas kusichiwasunman chayta, imaynapis sumaqta kausasunman chaytapas. Chaymi imataña kamachiwaqtinchispas kasukunanchis. Mayninpiqa manapaschá facilchu kanqa, chaywanpas kusisqa kausayta munanchis chayqa kasukunanchismi (leey Isaías 48:17).

12. ¿Imaraykun Diospa gobiernollanta apoyananchis?

¹² Bibliaq willasqan jina, Jesús waranqa wata gobiernasqan qhepamanqa askha runakunan Diospa contranpi churakunqaku (Apo. 20:7, 8). Ichaqa, ¿imaynapitaq chayri pasanman? Ñaupaqpi jinan Satanasqa runakunata engañanqa. Yaqapaschá yapamanta ninqa: “Qankunallamanta kausaychis, manan Diostaqa necesitankichischu”, nispa. ¿Chayta noqanchis creesunchischu? Manachá. Sichus Jehová Diosta munakusun paypa gobiernollantataq apoyasunpas chayqa, manan jayk’aqpas traicionasunchu. Chaymantapas payllan derechonpi kashan gobiernananpaqqa. Chaymi kunanmantapacha paypa gobiernollanpi confiananchis.

TUKUY SONQO APOYASUN DIOSPA GOBIERNONTA

13. ¿Imaynatan rikuchisunman Diospa gobiernon apoyasqanchista?

¹³ Kaypi yachasqanchis jina, Jehová Diosllan derechonpi kashan gobierno kananpaqqa. Chaymi noqanchisqa tukuy sonqo apoyananchis gobiernonta. ¿Imaynatan chayta ruwasunman? Payllata servispanchis, kasukuspanchis ima. Chaymantapas kallpachakunanchismi pay jina imatapas ruwananchispaq. Chaykunata ruwaspan rikuchisunchis Diosta munakusqanchista gobiernonta apoyasqanchistapas (leey Efesios 5:1, 2).

14. ¿Imaynan kananku familiapi umallikuna iñiq t’aqapi umalliqkunapas?

¹⁴ Bibliaq willasqan jina, Jehová Diosqa munakuywanmi gobiernan. Chhaynan kananku familiapi umallikunapas iñiq t’aqapi umalliqkunapas. Manan gustonkumanchu imatapas kamachikunanku, aswanmi Dios jina munakuq kananku. Chaymantapas apóstol Pablo jinan kananku, paypas Diospa ejemplonta Jesuspa ejemplonta iman qatikuran (1 Cor. 11:1). Chaymi iñiqmasikunataqa sumaqllata kallpacharan, manan paykunataqa p’enqachiqchu ni sintichiqpaschu (Rom. 12:1; Efes. 4:1; Filem. 8-10). Chaytan ruwananku Diospa gobiernonta apoyaqkunaqa.

15. ¿Imaynatan rikuchillasunmantaq Diospa gobiernon apoyasqanchista?

¹⁵ Diospa churasqan umalliqkunatan respetananchis kasukunanchis ima, chhaynapin rikuchisun gobiernon apoyasqanchista. Mayninpiqa manapaschá ima decisión ruwasqankutapas allintachu entiendesunchis, chaywanpas kasukushanallanchismi paykunataqa. Manan kay pacha runakuna jinachu kananchis, paykunaqa mana kasukuqmi kanku (Efes. 5:22, 23; 6:1-3; Heb. 13:17). Chaymantapas kasukuq kasun chayqa noqallanchistaqmi allin kasunchis.

16. ¿Imapin rikuchillasuntaq Diospa gobiernon apoyasqanchista?

¹⁶ Jehová Diosqa manan llapantachu niwanchis imakuna ruwananchista ni mana ruwananchistapas. Sapankan mayninpiqa imatapas decidinanchis. Chaypin rikuchinallanchistaq Diospa gobiernon apoyasqanchista. P’achamanta rimasunchis. Diosqa manan juj listataraqchu churan imayna p’achawansi churakusun chaypaqqa. Aswanmi payqa munan allin yuyaywan, allin jap’iq p’achawan churakunanchista (1 Tim. 2:9, 10). Ichaqa manan munanchu gustonchisrayku jujkuna urmanankuta (1 Cor. 10:31-33). Chaymi tukuy imatapas ruwananchis Diospa munayninman jina, chhaynapin rikuchisun gobiernon apoyasqanchista.

17, 18. ¿Imaynatan casarasqakuna rikuchinkuman Diospa gobiernon apoyasqankuta?

¹⁷ Casarasqakunapas apoyankumanmi Diospa gobiernontaqa. ¿Imaynatan chayta ruwankuman? Diospa munayninman jina kausaspanku. Kay tiempopiqa sinchi sasapaschá wakinpaqqa kanman casado kausay. ¿Iman paykunata yanapanman? Diospa ejemplonmi. Payqa qosa jinan karan Israel llaqtapaq (Is. 54:5; 62:4). Chay llaqtan ichaqa sapa kutin Jehová Diosta phiñachiq. Chaywanpas Diosqa perdonashallaqmi paykunata, manataqmi kasqan ratochu paykunamanta t’aqakuran. Chhaynapin payqa junt’aran rimanakusqan simita (leey Salmos 106:43-45).

¹⁸ Jehová Diosta munakuq casarasqakunaqa paypa ejemplontan qatikunanku. Ima sasachakuyña kanman chaypas, manan divorciakunanraykuqa Bibliaq kamachisqan contrapi imatapas ruwanankuchu. Aswanmi kallpachakunanku Jehová Diospa ñaupanpi promesa ruwasqankuta junt’anankupaq. Bibliaq nisqanman jinaqa, mayqenninkupas jujwan pantallaqtinkun divorcianakuytaqa atinkuman (Mat. 19:5, 6, 9). Sichus tukuyta kallpachakunqaku casado kausayninkupi allin kanankupaq chayqa, Jehová Diospa gobiernontan apoyashanqaku.

19. ¿Imatan ruwananchis imapipas pantaspanchis?

¹⁹ Juchasapa runakunataq kanchis chayqa yaqapaschá mayninpiqa Diospa sonqonta k’irisunchis. Ichaqa juchanchismanta perdonawananchispaqmi Jesusta kachamuran. Chaymi imapipas pantaspaqa Diosmanta perdonta mañakunanchis (1 Juan 2:1, 2). Manan jayk’aqpas Jehová Diosmantaqa t’aqakunanchischu. Imaña juchanchis karan chaypas perdonawasunmi payqa, yanapawasuntaqmi chayta qonqananchispaq. Chhaynapin allin preparasqa kasun ima sasachakuypaqpas (Sal. 103:3).

20. ¿Imaraykun Diospa gobiernollanta apoyananchis?

²⁰ Kay millay kausay tukupuqtinqa Jehová Diosllan gobiernaq kanqa. Chay gobiernopiqa chanin kausayllan kanqa (Is. 11:9). Chaymi kunanmantapacha yachashananchis Diospa munayninman jina kausayta. Pisi tiempomantaqa manañan pipas Dioslla gobiernaq kananmantaqa iskayanqachu. Chhaynaqa tukuy atisqanchista kallpachakusun Diospa gobiernollanta apoyananchispaq, payllata servinanchispaq, pay jina kananchispaqwan.