¿Imanaqtinmi runamasita cheqnikuy astawanraq yapakushan? | ¿Imaninmi Biblia chaymanta?

Noticiakunapiqa sapa kutillanmi uyarikushan guerrakunamanta, juj grupo runakunata cheqnikuymanta, juj llaqtayoq runakunata maqasqankumanta wañuchisqankumantawan.

“Israel nacionwan Gaza nacionwan guerrapi kasqanraykun redes sociales nisqapi runaqa astawanraq q’oñirichishanku jujkuna cheqnikuyta” (The New York Times, 15 de noviembre de 2023).
“7 de octubre killamantapachan aswan askha runakuna runamasinkuta cheqnikuyta qallarirqanku, wakinqa jujkunaq contranpiraqmi imaymanata ruwayta qallarirqanku” (Dennis Francis, presidente de la Asamblea General de las Naciones Unidas, 3 de noviembre de 2023).

Runakunata cheqnikuypas, runamasita wañuchiypas, guerrakunapas manan kay tiempollapichu pasarqan. Bibliapiqa willanmi ñaupa tiempopipas askha runakuna guerrakunata jatarichisqankuta, runamasinkuta cheqnikusqankuta ima (Salmos 64:3; 120:7; 140:1). Chaymantapas Bibliapiqa willanmi imaraykuchus kay tiemponchispi jujkunata cheqnikuy astawanraq yapakusqanta.

Kay tiemponchispi runamasita cheqnikuyqa juj señalmi kanan karqan

Kay tiemponchispi runamasita cheqnikuy yapakusqanmantaqa iskay razonmi kashan, chaytan Bibliapi willawanchis.

1. Bibliaqa willarqanñan kay tiempopi mana allin kausay yapakusqanrayku “runakunaq munakuynin” chiriyapunanta (Mateo 24:12). Runakunaqa munakuq kanankumantaqa astawanraqmi cheqninakunanku karqan (2 Timoteo 3:1-5).
2. Runamasita cheqnikuy astawan yapakusqanmi rikuchin Satanás kay pachata kamachishasqanta. Bibliapin nishan lliu kay pacha Satanaspa makinpi kashasqanta (1 Juan 5:19; Apocalipsis 12:9, 12).

Chaymantapas Bibliapin Diosqa prometewanchis pisi tiempollamanta cheqninakuyta tukuchipunanta. Chaymantapas chay tiempopiqa cheqninakuy kasqanrayku ñak’ariq runakunaqa manañan chayta yuyanqakuñachu. Bibliapin kayta niwanchis:

“Diosmi runakunaq ñawinmanta tukuy weqeta pichanqa, manan wañuypas kanqañachu, manañataqmi llakikuypas, waqaypas, ni nanaypas kanqañachu. Arí, ñaupaq kaqkunaqa manañan kanqachu”, nispa (Apocalipsis 21:4).