Anton Petrus/Moment via Getty Images
¡MAKILLAN KASHANA!
Imaymanakunaq pasasqanwan, ¿qallarinmanchu pachantinpi juj jatun guerra? | ¿Imatapas Biblia willashanmanchu chaymanta?
Kay último kinsa chunka watakunapi jinan runakunaqa piensarqanku wakin nacionkuna allinta apanakunankupaq, imapipas allinta entiendenakunankupaq. Ichaqa noticiakunapi willakamusqankuman jina, kay tiempopi imaymanakunaq pasasqanman jinaqa manan chhaynachu kashan.
2024 watapi 6 enero p’unchaypin Reuters nisqa willakuypi nimurqanku: “Askha runakunan llakisqa kashanku Gaza llaqtapi guerra astawanraq juj ladokunaman ch’eqerinanmanta, chayqa pasanman sichus Israel nación Líbano nacionpi kaq Hizbulá nisqa organizacionwan maqanakuyta qallariqtinmi”, nispa.
2024 watapi 7 enero p’unchaypin The New York Times nisqa willakuypi nimurqanku: “Irán nacionmi Rusia nacionwan China nacionwan juñukuspa Estados Unidos gobiernota chay gobiernota apoyaqkunatawan atacayta munashan. Ñan Irán nacionpa kamachisqan askha armasqa grupokuna atakashankuña Estados Unidos nacionta apoyaqkunata. Chaymantapas bombas nucleares nisqatan jujmanta ruwayta qallarishanku chaywan atakanankupaq”, nispa.
2024 watapi 11 enero p’unchaypin UN News nisqa willakuypi nimurqanku: “Rusia nación Ucrania nacionta atakasqanwanmi chay nacionpiqa imaymana sasachakuykuna kashallan”, nispa.
2024 watapi 9 enero p’unchaypin The Japan Times nisqa willakuypi nimurqanku: “China nación qhapaqyasqanwan, ejercitonpas mana atipana kasqanwan, Taiwán nación China nacionmanta t’aqakuyta munasqanwan, chaymantapas China nación Estados Unidos nacionwan problemapi kasqankuwanmi facil-llata guerra qallarinman” nispa.
¿Bibliapi imallatapas willanchu kay tiempopi imaymanakunaq pasasqanmanta? ¿Chaykunaq pasasqanwan kay pachapi juj jatun guerra qallarinmanchu?
Bibliaqa willarqanñan kay tiempopi imaymana pasananta
Bibliaqa manan willarqanchu maykunapis kay tiempopi guerrakuna pasanan karqan chaytaqa, ichaqa willarqanmi imaymana sasachakuykuna ch’aqwaykuna pasananmanta. Chaykunaraykun kay pachapiqa mana kanchu thaj kausayqa (Apocalipsis 6:4).
Daniel libropin willarqanña imaynas “tukukuy p’unchaykunapi” atiyniyoq gobiernokuna pachantinta kamachikuyta munaspa maqanakunanku karqan chayta. Chay maqanakuypin rikuchinanku karqan allin ejercitoyoq atiyniyoq kasqankuta. Chaypin paykunaqa askha qolqeta gastashanku (Daniel 11:40, 42, 43).
Pisi tiempollamantan juj jatun guerra qallarinqa
Biblian willan imaynas kay pachaqa aswan mana allinmanraq tukunqa chayta. Jesusmi kay pachapi kashaspa nirqan: “Chay tiempopiqa manchay ñak’ariymi kanqa, chay ñak’ariy jinaqa manan karqanchu kay pachaq qallariyninmantapacha kunankamapas”, nispa (Mateo 24:21). Chay “manchay ñak’ariyqa” Armagedón nisqa guerrawanmi tukunqa, chay guerratan nikullantaq “tukuy atiyniyoq Diospa jatun p’unchaynin” nispa (Apocalipsis 16:14, 16).
Chay Armagedón guerrapiqa manan runakunachu chinkachisqa kanqaku, aswanpas salvasqan kanqaku. Chay Armagedón guerrawanmi Jehová Diosqa kay pachapi gobiernokunata chinkachinqa, chay gobiernokuna mana allinta kamachisqankuraykun kay pachapi kan sasachakuykunapas guerrakunapas. Sichus astawan yachayta munanki imaynatas Armagedón guerra thaj kayta apamunqa chayta chayqa, leey:
Armagedonqa kusikunanchispaqmi kanqa, nisqa yachachikuykunata.