¿Kutichimunchu Dios mañakusqanchisman?
¿Ima ninmi Biblia?
Arí kutichimunmi, chaytan Biblia willan. Chaymantapas kashallantaqmi kay tiempopi experienciakuna mañakusqanchisman Dios kutichimusqanmanta. Biblian nin: “Manchakuqninkunaq munasqantan junt’an, waqyakusqankutan uyarin, paykunatan qespichin”, nispa (Salmos 145:19). Mañakusqanchisman Dios kutichimunanpaqqa Diospa munasqanman jinan mañakunanchis.
¿Imakunatan Dios mañakunanchispaq kamachiwanchis?
Salmos 65:2 textopin willan Jehová Dios ‘mañakuykunata uyariq Dios’ kasqanta. Chayraykun Jehová Diosllaman mañakunanchis, manan Jesusmanchu, Mariamanchu, angelkunamanchu nitaq idolokunamanchu mañakunanchis.
Jehová Diospa munayninman jinan mañakunanchis, manan kamachikuyninpa contranpiqa mañakunanchischu (1 Juan 5:14).
Jesuspa sutinpin mañakunanchis, Jesuspunin niran: “Noqallantapunin pipas Yayamanqa chayanqa”, nispa (Juan 14:6).
Iñinanchismi, pisi iñiyniyoq kaspataq aswan iñiyta mañakunanchis (Mateo 21:22; Lucas 17:5).
Juch’uyaykukuspan sonqomanta mañakunanchis. Biblian nin: “Qanqa ancha jatunña kanki chaypas k’umuykukuqtan yuyarikamunki, jatunchakuqtataq karullamantaraq reqsimunki”, nispa (Salmos 138:6).
Mañakushanallanchismi. Jesusmi niran: “Mañakushallaychis, chaskinkichismi”, nispa (Lucas 11:9).
¿Imakunatan Dios mañakuyninchispi mana qhawarinchu?
Diosqa manan qhawarinchu may nacionmantachus ima colorniyoqchus kasqanchistaqa. ‘Lliutapas igual-llatan rikun, payta manchakuspa allin kaqta ruwaq runakunataqa may nacionmantaña kanku chaypas sumaqtan chaskin’ (Hechos 10:34, 35).
Mañakusunmanmi tiyaspa, pampakama k’umuykuspa, qonqorikuspa, sayaspapas (1 Crónicas 17:16; Nehemías 8:6; Daniel 6:10; Marcos 11:25).
Mañakusunmanmi alto kunkawan otaq ch’inllapas. Diosqa uyarinmi sonqonchis ukhullapi mañakusqanchistapas (Nehemías 2:1-6).
Llakikuyninchiskuna sinchi jatunña juch’uyña kanman chaypas Biblian kayta nin: ‘Tukuy llakipakuyniykichista Diosman saqeychis, payqa qankunamantan llakikun’, nispa (1 Pedro 5:7).