¿Imaraykun guerraman mana rinkuchu?
Kaypin willakushan imarayku guerraman mana risqaykuta:
Diosta kasukusqaykurayku. Biblian willaranña Diosta serviqkunaqa ‘espadankumanta yapuna rejakuna’ ruwanankuta, manaña jayk’aqpas ‘maqanakunankutapas’ (Isaías 2:4).
Jesusta kasukusqaykurayku. Jesusmi juj kutin Pedrota niran: “Espadaykita waqaychay churananman, espadawan maqanakuqkunaqa espadawan wañuchisqallataqmi kanqaku”, nispa (Mateo 26:52). Chaypin Jesús yachachisharan discipulonkunaqa manapuni ima armawanpas maqanakunankuta.
Jesusmi discipulonkunamanta niran: “Manan kay pachamantachu kanku”, nispa. Chaymi política nisqapi mana chaqrukuykuchu (Juan 17:16). Ichaqa manan jark’akuykuchu ejercitopi serviy munaqkunata, tiyasqayku nacionpi ejercitoq ruwasqantapas.
Runamasiykuta munakusqaykurayku. Jesusmi discipulonkunata kamachiran: “Qankunapura munanakuychis”, nispa (Juan 13:34, 35). Cheqaq cristianokunaqa pachantinpin kashanku, juj familia jinataqmi munanakunku. Chaymi manapuni wayqe-pananku contraqa ima armatapas oqarinkumanchu (1 Juan 3:10-12).
Ñaupaq cristianokunapas manapunin guerraman rirankuchu. Juj libron nin: “Jesuspa discipulonkunaqa manan guerraman riqkuchu nitaq ejercitopi serviqkuchu”, “Jesusqa munakuq kaytan yachachiran, kamachirantaqmi enemigokunata munakunapaq”, nispa (Encyclopedia of Religion and War). Historiamanta yachaq runan nillantaq: “Cristianokunaqa manapunin Dios serviyninkuta saqeyta munarankuchu [...] soldado kanankurayku”, nispa (Historia de la decadencia y caída del Imperio romano).
Llaqtaykuq allinninpaqmi imatapas ruwayku
Testigokunaqa kallpachakuykun sumaqta kausanaykupaq, manataqmi llaqtaykuq mana allinninpaqqa imatapas ruwaykuchu. Respetaykun autoridadkunaq kamachikusqanta. Biblian kamachiwanku:
“Kamachikuqkunataqa llapa runan kasukunan”, nispa (Romanos 13:1).
“Roma rey Cesarpa kaqtaqa payman qopuychis, Diospa kaqtataq Diosman qopuychis”, nispa (Mateo 22:21).
Chaymi llaqtaykupi leykunata kasukuyku, impuestokunata pagayku, llaqtaykuq allinninpaq autoridadkunaq kamachikusqantapas kasukuyku.