¿Juj religionmantapunichu kananchis?

¿Ima ninmi Biblia?

Arí, Jehová Diosqa munanmi runakuna juñunakuspa adoranankuta. Bibliapin nishan: “Jujkuna-jujkunawan allintapuni reqsinakusun, chhaynapin kallpachanakusunchis astawan munanakunanchispaq ancha allin ruwaykunatapas ruwananchispaqwan. Amapuni juñunakuyninchiskunatapas saqesunchu”, nispa (Hebreos 10:24, 25).

Jesuspas discipulonkunata nirqan: “Qankunapura munanakusqaykichispin lliupas yachanqaku discipuloykuna kasqaykichista”, nispa (Juan 13:35). Jesuspa discipulonkunaqa paykunapura allinta reqsinakuspallan munanakusqankuta rikuchiyta atirqanku. Chaypaqmi iñiq t’aqakunapi juñunakuspa kuska Diosta adorananku karqan (1 Corintios 16:19). Chaytaqa pachantinpi ruwananku karqan, chhaynapi llapa iñiqmasikunawan jujllachasqa kanankupaq (1 Pedro 2:17).

¿Imatawanmi ruwana Diosta kusichinapaq?

Bibliapi nisqan jina Diostaqa adorananku juj religionpi juñunakuspan. Ichaqa, ¿chayllatachu ruwana Diosta kusichinapaq? Manan, aswanpas chay juñunakuykunapi yachamusqanchisqa yanapawananchismi vidanchispi. BibIiapin nishan: “Yayanchis Diospa qhawarisqanman jinaqa, chu’ya mana ima qhelliyoq adorayqa ñak’ariypi tarikuq wajcha wawakunata viudakunatawan cuidaymi, kay pacha kausaywanpas mana qhellichakuymi”, nispa (Santiago 1:27).