¿Imaynapin Jesús wañusqanwan “askha runakunata kacharichirqan”?

¿Imaninmi Biblia?

Jehová Diosmi wawan Jesusta kachamurqan juchamanta wañuymantawan runakunata librawananchispaq. Jesusqa yawarninta jich’aspan juj pagota jina qorqan juchamanta wañuymantawan librawananchispaq (Efesios 1:7; 1 Pedro 1:18, 19). Arí, Jesusqa “vidanwan pagaspa askha runakunata kacharichinanpaqmi” jamurqan (Mateo 20:28).

¿Imanaqtinmi askha runakuna necesitarqanku kacharichinata?

Ñaupa taytanchis Adanqa mana ima juchayoq perfecton karqan, atirqanmi wiñaypaq kausaytapas. Ichaqa Diosta mana kasukusqanraykun payqa chay kausayta chinkachipurqan (Génesis 3:17-19). Jinaspa llapa mirayninkunaman juchata herenciata jina saqewarqanchis (Romanos 5:12). Chaymi Bibliaqa nin llapanchispas juchaman vendesqa kasqanchista, chayraykun llapanchispas kunanqa juchayoq kanchis wañunchis ima (Romanos 7:14). Chay juchamantaqa manan pipas librayta atiwarqanchischu (Salmos 49:7, 8).

Diosmi ichaqa Adanpa wawankunata mana allinpi tarikusqankuta rikuspa anchata llakikurqan, jinaspa khuyapayarqan (Juan 3:16). Chaymantapas Diosninchisqa chanin Diosmi, chaymi payqa mana jinallatachu qhawarqan Adán Evaq juchallikusqanta. Aswanpas payqa ancha munakuq kasqanraykun yuyaykurqan imaynatachus runakunata juchamanta wañuymantawan librananpaq, jinan wawan Jesusta kachamurqan Adán Evaq juchallikusqanmanta juj preciota pagananpaq (Salmos 89:14; Romanos 3:23-26; Romanos 5:6-8).

¿Imaynatan kacharichiwarqanchis?

Juj runata kacharichinapaqqa kinsa ruwaykunatan ruwakunan:

1. Preciotan pagakunan (Números 3:46, 47).

2. Preciota pagakuqtintaq kacharichisqa kapun (Éxodo 21:30).

3. Chay precioqa jayk’achus valesqanman jinan kanan.a

Kunan yachasunchis imaynapis Jesuspa wañusqan chay kinsa ruwaykunaman tupan chayta.

1. ¿lman chay precio karqan? Biblia willan Jesuspi iñiqkuna juj “preciowan rantisqa” kasqanchista (1 Corintios 6:20; 7:23). Chay precion karqan Jesuspa yawarnin, paymi Diospaq runakunata rantirqan “llapa ayllukunamanta, llapa rimaykunamanta, llapa llaqtakunamanta, llapa nacionkunamantawan” (Apocalipsis 5:8, 9).

2. ¿Imaynapin kacharichisqa kapunchis? Jesuspa wañusqanraykun juchamanta kacharichisqa kapurqanchis (1 Corintios 1:30; Colosenses 1:14; Hebreos 9:15).

3. ¿Imaynapin valesqanman jina pagakurqan? Adanqa mana ima juchayoq perfecto runan karqan, chhaynan Jesuspas mana ima juchayoq perfecto runa kallarqantaq, chhaynapin jayk’achus valesqanman jina preciota pagakurqan (1 Corintios 15:21, 22, 45, 46). Chaymi Biblia nin: “Imaynan juj runallaq mana kasukusqanrayku askha runakuna juchasapa kapurqanku, chhaynallataqmi juj runallaq [Jesuspa] kasukusqanrayku askha runakuna chaninpaq jap’isqa kapunqaku”, nispa (Romanos 5:19). Chhaynaqa Jesuspa ch’uya vidanta entregasqanraykun askha runakuna kacharichisqa kanku. Ichaqa, ¿pikunaq allinninpaqmi Jesuspa wañusqan? Llapa Jesuspi iñiqkunapaqmi, paypa kamachikuyninkunata kasukuqkunapaqmi (1 Timoteo 2:5, 6).