¿Jayk’aqmi fin del mundo kanqa?

¿Ima ninmi Biblia?

Jayk’aqchus fin del mundo kanqa chayta yachananchispaqqa, ñaupaqtan allinta entiendenanchis Bibliapi “mundo” nisqa simi ima ninansi chayta. Griego rimaypi kósmos nisqa simiqa “mundo” nispan nikun, chaymi rimashan llapa runakunamanta, astawanqa rimashan Diospa munayninta mana ruwaq runakunamantan (Juan 15:18, 19; 2 Pedro 2:5). Mayninpiqa Bibliapi kósmos nisqa simiqa rimashan imayna kay pachapi runakuna organizasqa kashanku chaymantan (1 Corintios 7:31; 1 Juan 2:15, 16).a

¿Imataq fin del mundori?

“Fin del mundo” nisqa simikunaqa askha Bibliakunapin rijurin, wakin Bibliakunapin khaynata nin: “Kay tiempopas tukukapunanpaqña kashaqtin” otaq “kay pacha p’uchukapunanmanta”, nispa (Mateo 24:3). Manan kay allpa chinkapunanmantachu nitaq llapa runakuna chinkapunanmantachu rimashan, aswanpas Diospa munayninta mana ruwayta munaq runakunaq chinkapunanmantan rimashan (1 Juan 2:17).

Biblian willawanchis ‘millay runakuna chinkapunanmanta’, chhaynapi chanin runakuna kay allpapi thajpi, kusisqa kausanankupaq (Salmos 37:9-11). Millay runakunaqa chinkapunqaku “manchay ñak’ariy” tiempopin, chay tiempotaq tukupunqa Armagedón nisqa Diospa guerranpi (Mateo 24:21, 22; Apocalipsis 16:14, 16).

¿Jayk’aqmi fin del mundo kanqa?

Jesusmi niran: “Chay p’unchaymanta chay horamantawanmi ichaqa mana pipas yachanchu, ni janaq pachapi angelkunapas ni Churipas, aswanpas Yayallan yachan”, nispa (Mateo 24:36,42). Chaymantapas niranmi fin del mundo qonqaylla chayamunanmanta ‘mana piensasqanchis horata’ (Mateo 24:44).

Manaña yachanchischu ima p’unchaypi ima horapi fin del mundo chayamunanta chaypas, Jesusmi ichaqa willaran ima ‘señalkunata’ rikunanchismanta, chhaynapi tukukuy tiempopiña kausashasqanchista yachananchispaq (Mateo 24:3, 7-14). Bibliapin chay tiempomanta nin: ‘P’uchukay tiempo’, “tukukuy tiempo”, chaymantapas “tukukuy p’unchaykuna”, nispa (Daniel 12:4; 2 Timoteo 3:1-5).

Fin del mundopiqa manan kay allpaqa chinkanqachu

Kay allpaqa kashallanqan, Biblian yachachin kay allpa ‘mana jayk’aqpas kuyurinanta’ (Salmos 104:5). Chaymantapas Bibliapin Diosqa prometewanchis kayta: “Chanin runakunaqa kay allpatan jap’ikapunqaku, chaypin wiñaypaq tiyanqaku”, nispa (Salmos 37:29). Diosqa junt’anqapunin qallariypi kay allpapaq munasqanta:

• Kay allpan sumaq paraíso kapunqa (Isaías 35:1; Lucas 23:43).

• Mana manchakuspa, thajpin kausasunchis (Miqueas 4:4).

• Llapa runan llank’anayoq kanqa, kusisqataq llank’anqakupas (Isaías 65:21-23).

• Manan onqoykunapas ni machuyaypas kanqañachu (Job 33:25; Isaías 33:24).