¿Juchachu cigarrota pitay?

¿Ima ninmi Biblia?

Bibliapiqa manan willanchu cigarrota pitaymantaa nitaq juj drogakunata pitaymantapas otaq akulliymantapas. Ichaqa Bibliapiqa willashanmi cuerpota qellichaq ruwaykunata Dios cheqnikusqanta. Chhaynaqa Diospaqqa cigarrota pitayqa juchan.

• Vidaykita respetay. “Diosmi runakunaman qon kausayta, samayta” (Hechos 17:24, 25). Diostaq kausayta qowanchis chayqa, manan imawanpas cuerponchista malogrananchischu nitaq cigarrota pitaywanpas. Cigarrota pitayqa askha runakunatan wañuchishan.

• Runamasiykita munakuy. “Runamasiykitan munakunki qan kikiykita jina” (Mateo 22:39). Runakunaq ladonpi cigarrota pitaqkunaqa manan runamasinkuta munakushankuchu. Cigarroq q’osninmi chay runakunata onqochishan.

• Ch’uyan kananchis. “Cuerpoykichista Diosman jaywaychis kausashaq sacrificiota jina, sonqonman chayaq ch’uya sacrificiota jina” (Romanos 12:1). “Tukuy ima qhellimantayá limpiakusun cuerponchista sonqonkistapas, chhaynapin Diosta manchakuspa aswan-aswan ch’uya kasunchis” (2 Corintios 7:1). Cigarrota pitay costumbreqa manan allinchu, manan ch’uya kaywan, limpio kaywan tupanchu. Cigarrota pitaqkunaqa yachankun chaykuna cuerponkuta dañota ruwasqanta.

¿Ima ninmi Biblia kusirikunallapaq marihuana nisqawan otaq juj drogakunawanpas drogakuymanta?

Bibliapiqa manan willanchu marihuana nisqamanta nitaq chay jina juj drogakunamantapas. Ichaqa Bibliapiqa kanmi yachachikuykuna kusirikunallapaq drogakunata pitay otaq akulliy mana allin kasqanmanta. Chaymantapas Bibliapi kay yachachikuykunatawanmi kasukunanchis:

• Allin yuyayniyoqmi kananchis. “Jehová Diosniykitan munakunki [...] tukuy yuyayniykipiwan” (Mateo 22:37, 38). “Allin yuyaywantaq tukuy imatapas ruwaychis” (1 Pedro 1:13). Drogakunata pitaq otaq akulliq runakunaqa manan tukuy yuyaywanchu imatapas ruwanku, viciomanmi urmankupas. Jinaspapas yuyayninkuqa kashan drogakunata maskhayllapiña, pitayllapiña otaq akulliyllapiñan, chaymi allin ruwaykunapiqa mana piensankuchu (Filipenses 4:8).

• Autoridadkunaq kamachikusqankuta kasukusunchis. “Gobiernokunata autoridadkunatapas kasukuychis” (Tito 3:1). Askha nacionkunapin autoridadkuna kamachikuykunata churanku ama drogakunata pitanankupaq otaq akullinankupaqpas. Sichus Diosta kusichiyta munanchis chayqa kasukunanchismi autoridadkunata (Romanos 13:1).