¿Yanapawanmanchu Biblia sichus wañuchikuyta munaqtiy?
¿Ima ninmi Biblia?
Bibliaqa yanapawasunmanmi, Jehová Diosqa llakisqa sonqoyoqkunatan kallpachan (2 Corintios 7:6). Bibliaqa manan rimanchu umankumanta mal kashaqkunata imayna jampinankumantaqa. Chaywanpas wañuchikuyta munaq runakunataqa yanaparanmi imachus piensasqankuta cambianankupaq. Bibliapi kaq yachachikuykunaqa qantapas yanapasunkimanmi.
¿Bibliapi ima textokunan yanapawasunman wañuchikuyta piensaqtinchis?
¿Imatan ruwasunman amigonchis “manañan kausayta munanichu” nispa niwaqtinchis?
¿Imaynatan Bibliapi kaq yachachikuykuna yanapawasunman?
● Willakuy imayna sientekusqaykita.
Biblian nin: “Tukuy tiempon amigoqa munakun, llaki-phutiy tiempopipas wayqe jinan khuyapayakun” (Proverbios 17:17).
¿Imatan chaywan niwashanchis? Llakipi tarikuspaqa yanapanatan necesitanchis.
Imayna sientekusqaykita mana pimanpas willakunkichu chayqa, mana atina llasa q’epitapas apashawaq jinan problemayki kanqa. Sichus imayna sientekusqaykita jujkunaman willakunki chayqa manan sinchitañachu llakikunki.
Kaytan ruwawaq: Usqhayllan willakunayki imayna sientekusqaykita familiaykiman otaq amigoykikunamanpas.a Otaq papelpi qelqawaq.
● Doctorman riy
Biblian nin: “Qhali runakunaqa manan doctorta necesitankuchu, onqosqakunan ichaqa necesitanku”, nispa (Mateo 9:12).
¿Imatan chaywan niwashanchis? Onqosqa kashanchis chayqa doctormanmi rinanchis.
Kausayta mana munaqkunaqa umamantan manan allinchu kashanku. Imanchispas nanawanchis chayqa manan p’enqakunchischu doctorman riytaqa, chay jinallataqmi mana p’enqakunanchischu umamanta mana allin kaspapas. Chhaynapi tarikuspaqa doctorwanmi yanapachikusunman.
Kaytan ruwawaq: Doctorpa yanapayninta usqhaylla maskhay.
● Diospaqqa anchatan valenki.
Biblian nin: “¿Manachu pisqa pichinkuta iskay pisi valorniyoq qolqellapaq vendekun? Chhaynaña kaqtinpas Diosqa manan mayqenninkutapas qonqanchu. [...] Ama manchakuychischu, qankunaqa askha pichinkukunamantapas astawanraqmi valenkichis”, nispa (Lucas 12:6, 7).
¿Imatan chaywan niwashanchis? Diospaqqa anchatan qanqa valenki.
Sapallayki jinaña sientekunki chaypas Jehová Diosqa yachanmi imayna tarikusqaykita. Manaña kausayta munankichu chaypas, Diosqa llakikunmi qanmanta. Salmos 51:17 textopin nin: “Manan qhawarparinkichu llakikuq juch’uyyaykukuq sonqoyoqtaqa”, nispa. Diosqa anchatan munakusunki munantaqmi kausanaykita.
Kaytan ruwawaq: Diosqa anchatan munakusunki, Bibliapin chayta askha kutipi nishan. Ejemplopaq, 24 capitulota Acerquémonos a Jehová nisqa librota qhaway, chaypin tarinki yanapaykunata.
● Diosmanta mañakuy
Biblian nin: “Chaymantapas tukuy llakipakuyniykichista payman saqeychis, payqa qankunamantan llakikun”, nispa (1 Pedro 5:7).
¿Imatan chaywan niwashanchis? Jehová Diosqa munanmi imayna sientekusqaykita ima llakichisqasuykitapas willakunaykita.
Diosqa thaj kayta kallpata iman qosunkiman llakikuyniykita atipanaykipaq (Filipenses 4:6, 7, 13). Diosqa yanapanmi payman achhuykuqtaqa (Salmos 55:22).
Kaytan ruwawaq: Diosmanta mañakuy. Sutinmanta Jehová Diosta mañakuy, willakuy imayna sientekusqaykita (Salmos 83:18, NM). Mañakuy ama pisipanaykipaq.
● Piensay jamuq tiempopi imayna kausay kananpi
Biblian nin: “Chay suyakuyqa ancla jinan [...], mana kuyuriqtaqmi kanpas” kausayninchispaq (Hebreos 6:19).
¿Imatan chaywan niwashanchis? Imaynan barcota wayra kayman jaqayman apaykachan chay jinatan imayna sientekusqaykipas apaykachasunkiman. Bibliapi kaq suyakuymi ichaqa juj ancla jina thaj kayta qosunkiman.
Diosmi prometewanchis ñak’ariykunata chinkachinanta; chay suyakuyqa manan yanqachu (Apocalipsis 21:4).
Kaytan ruwawaq: Bibliapi kaq suyakuymanta astawan yachanaykipaq leey “La esperanza real de un mañana mejor” nisqa yachachikuyta.
● Imachus gustasunki chayta ruway
Biblian nin: “Kusisqa sonqoqa allin jampin”, nispa (Proverbios 17:22).
¿Imatan chaywan niwashanchis? Imachus gustawasqanchista ruwayqa yanapawasunmi kusisqa sientekunanchispaq.
Kaytan ruwawaq: Imachus gustasqasuykita ruway. Yaqapaschá gustasqayki takikunata uyariwaq otaq leewaq gustasqayki qelqakunata, jujkunatapas ruwawaq. Chaymantapas jujkunata yanapaspan kusisqa sientekunki pisillataña ruwawaq chaypas (Hechos 20:35).
● Saludniykita cuiday
Biblian nin: “Ejercicio ruwayqa yanapawasunmanmi”, nispa (1 Timoteo 4:8).
¿Imatan chaywan niwashanchis? Ejerciciota ruwaypas, allinta puñuypas, allin mijunakunata mijuypas yanapasunkimanmi kusisqa kanaykipaq.
Kaytan ruwawaq: Juj rato chakipi puriq lloqsiwaq otaq phawawaq.
● Tiempowanqa imachus piensasqaykiqa cambianmi imaynan juj ruwaykunapas cambian jinata
Biblian nin: “¿Acaso qankunari yachankichischu paqarin imachus vidaykichis kananta?”, nispa (Santiago 4:14).
¿Imatan chaywan niwashanchis? Imachus llakichiwasqanchisqa tiempowanqa chinkapunmanmi nishu sasapaqña qhawarisunman chaypas.
Sinchi sasa allichayña problemaykikuna kanman chaypas cambianmanmi, chayrayku ama pisipaychu (2 Corintios 4:8). Sinchita llakichiq problemakunapas tiempowanqa cambianmi, wañuchikuspan ichaqa manaña imatapas ruwayta atiwaqchu.
Kaytan ruwawaq: Bibliata leespa maskhay qan jina sinchi llakisqa tarikuq runakunamanta, wañuchikuyta munaq runakunamantapas. Yachallawaqtaqmi imaynatas vidanku cambiaran chayta. Wakin runakunamanta yachasun.
¿Willanchu Bibliapi wañuchikuyta munaq runakunamanta?
Arí. Bibliapiqa willashanmi wañupuyta munaq runakunamanta. Diosqa manan paykunawanqa phiñakuranchu aswanmi yanapayta munaran. Diosqa qantapas yanapasunkimanmi.
Elías
● ¿Pin karan Elías? Eliasqa mana manchakuq profetaña karan chaypas mayninpiqa llakisqan sientekuran. Santiago 5:17 textopipas ninmi “Eliaspas noqanchis jinan runalla karan”, nispa.
● ¿Imaraykun Elías wañupuyta munaran? Juj kutinmi Eliasqa sapallan tarikuspa mana valeqpaq jina qhawarikuran. Chaymi niran: Jehová Diosniy “Kausayniyta qechupuway”, nispa (1 Reyes 19:4).
● ¿Iman Eliasta yanaparan? Jehová Diosman imayna sientekusqanta willakusqanmi. ¿Imaynatan Jehová Dios kallpacharan? Paymanta llakikuspa, tukuy atiyniyoq kasqanta rikuchispa ima. Chaymantapas tukuy necesitasqanta qoran, yanapananpaqtaq juj angelninta kachamuran
▸ Eliasmanta leey: 1 Reyes 19:2-18.
Job
● ¿Pin karan Job? Qhapaq runan karan, askhataqmi familianpas karan, Jehová Diospaqtaq junt’aq sonqo karan.
● ¿Imaraykun Job wañupuyta munaran? Qonqayllan Jobqa sasachakuypi tarikuran. Tukuy ima kaqninkunapas manañan kapuranchu, wawankunapas wañupuranmi, paypas onqoywanmi ñak’ariran. Chaymantapas paytan tumparanku tukuy chaykuna pasasqanmanta. Chaymi Jobqa niran: “Manan kausayta munaniñachu”, nispa (Job 7:16).
● ¿Iman Jobta yanaparan? Jehová Diosmanta mañakusqanmi, juj runakunawan rimasqan ima (Job 10:1-3). Elihú amigonmi kallpacharan, yanaparantaqmi manaña sinchita llakikunanpaq. Astawanqa yanaparan Jehová Diospa nisqanta kasukusqanmi.
▸ Jobmanta leey: Job 1:1-3, 13-22; 2:7; 3:1-13; 36:1-7; 38:1-3; 42:1, 2, 10-13.
Moisés
● ¿Pin karan Moisés? Ñaupaq tiempopi Diospa llaqtanta umalliqmi karan, junt’aq sonqo serviqnintaq karanpas.
● ¿Imaraykun Moisés wañuyta munaran? Sinchi sasapaqmi qhawariran Diospa llaqtan pusariyta, sapa kutilla paymanta mana allinta rimasqankuraykun nishu sayk’usqa sientekuran, chaymi Jehová Diosta niran: “kausayniyta qechupuway”, nispa (Números 11:11, 15).
● ¿Iman Moisesta yanaparan? Moisesqa Jehová Diosmanmi willakuran imayna sientekusqanta. Chaymi jujkunawan yanapachiran, chhaynapin payqa manaña sayk’usqachu sientekuran.
▸ Moisesmanta leey: Números 11:4-6, 10-17.
a Sichus familiayki otaq amigoykikunapas mana yanapayta atisunkimanchu wañuchikuy munasqaykimanta chayqa, wajawaqmi emergenciapi atiendeqkunaq telefononta yanapanasuykikupaq.