WAYNA-SIPASKUNAQ TAPUKUSQAN
¿Allinchu kanman layqakunaq ruwasqanta qhaway?
¿Imaniwaqtaq?
¿Allinchu kanman horoscopota uyariy, Ouija nisqapi pujllaypas?
Layqakunamanta rimaykuna, ¿cuentollachu icha cheqaqchu?
Kaypin yachasun, ¿imarayku kay tiempopi layqakuykuna nishu kashan, imaraykutaq cuidakunayki? chaymanta.
¿Imaraykun nishu kashan?
Kay tiempopiqa nishun propagandakunapi layqakuykunamanta rijurin. Peliculakunapi, televisión programakunapi, videojuego nisqakunapi, librokunapi ima. Kay tiempopiqa askha wayna-sipaskunan yachayta munanku ch’aska qhawaymanta, supaykunamanta, vampirokunamanta, brujakunamanta ima. ¿Imaraykun paykuna chaykunamanta nishuta yachayta munanku?
Paykunaqa yachayta munanku espiritukunaq tiyasqan lugarmanta
Paykunaqa llakikunkun jamuq tiempopi ima pasananmanta
Paykunaqa wañuqkunawanmi rimayta munanku
Chaykunamanta llakikuyqa manan juchachu. Llakikusunmanmi jamuq tiempopi ima pasananmanta otaq pipas familianchismanta wañupuqtinqa extrañanchismi. Chaykunata yachananchispaq layqakunaman riymi ichaqa mana allinchu.
¿Imaraykun cuidakunayki?
Bibliapiqa sut’itan niwashanchis layqakuykunata Dios juchachasqanta:
“Aman qankuna ukhupiqa mayqenpas churiykichista ususiykichista ruphachina sacrificiota jina jaywankichischu. Amallataq watuqpas, suerte qhawaqpas, ch’askata qhawaqpas, layqapas, mana allin espiritukunata rimachiqpas, wañuqpa alman rimachiqpas qankuna ukhupiqa kanqachu. Chay jina ruwaqkunataqa sinchitan Señor Diosqa cheqnikun”(Deuteronomio 18:10-12).
¿Imaraykun Bibliapi sut’ita niwanchis jucha kasqanta?
Layqakuykunata imallapipas ruwasunman chayqa Saqratan apoyashasunman. Bibliapin yachachiwanchis wakin angelkuna Diospa contranpi kaspa enemigonman tukupusqankuta (Génesis 6:2; Judas 6). Chay angelkunaqa runakunatan engañanku layqakuykunawan, ch’aska qhawaqkunawan, wañuqkunata rimachiyku niqkunawan, suerte qhawaqkunawan ima. Sichus chaykunapi participasun chayqa Saqraq amigonmi kasunman, Diospataq enemigon.
Layqakunaqa runakunatan creechinku jamuq tiempomanta yachayta atikusqanta. Ichaqa Diosllan jamuq tiempomantaqa yachan, chaymi nin: “Qallariymantapachan willani qhepaman imaynachus tukukunanta, qhepaman imachus kanantan ñaupaqmantaña willani”, nispa (Isaías 46:10; Santiago 4:13, 14).
Layqakunaqa runakunatan creechinku wañuqkunawan rimay atisqankuta. Biblian ichaqa nin: “Wañukapuqkunan ichaqa mana imatapas yachankuchu, […] maymanchus rishanki chay Wañuy-pachapiqa manan ima llank’anapas yuyanapas reqsinapas yachanapas kanchu”, nispa (Eclesiastés 9:5, 10).
Chayraykun Jehová Diospa testigonkunaqa manapuni imallapipas ruwankumanchu layqakuytaqa. Manan pujllaykunapi, peliculakunapipas qhawankumanchu condenadokunamanta, vanpirokunamanta, fantasmakunamantapas. Chaymantan Maria sutiyoq sipas niran: “Sichus imallapipas layqakuymanta kashan chayqa manan qhawanaychu”, nispa.a
Pipas mana reqsichikuspa engañashasunkiman, chhaynatan supaykunapas “wañuqniykin rimamun” nispa engañasunki.
Kaytan ruwawaq
Layqa ruwaykunamanta karunchakuy chhaynapin ch’uya concienciayoq kanki Jehová Diospa qhawarisqan (Hechos 24:16).
Layqa ruwaykunamanta imatapas jap’ishankiraq chayqa kanapunaykin. Leey Hechos 19:19, 20 textota, ñaupa tiempopi cristianokunaqa allin ejemplon karanku.
Yuyariy: Layqa ruwaykunamanta karunchakunki chayqa Jehová Diospa ladonmanta kasqaykitan rikuchinki, paytapas anchatan kusichinki (Proverbios 27:11).
a Chaywanqa manan nishanchischu llapa programakunatan mana qhawanachu nispachu. Cristianokunataqa Bibliaq yachachisqan conciencianmi yanapan, chhaynapin cuidakunku manapuni layqakuykunapi urmanankupaq (2 Corintios 6:17; Hebreos 5:14).