1 Crónicas
5 Kaymi Rubenpa+ churinkunamanta willakuy: Payqa Israelpa phiwi* churinmi karqan. Ichaqa taytanpa tiyaqmasin warmiwan* puñusqanraykun+ mana chaskirqanchu phiwi kasqanmanta herenciata, aswanpas chaytaqa qopurqanku Josepa+ churinkunamanmi. Chaymi Rubenqa mirayninmanta willakuypipas mana phiwi wawa jinachu yupasqa karqan. 2 Judaqa+ llapa wayqenkunamantapas aswan atiyniyoqmi karqan, jinaspapas paypa familianmantan jamurqan umalliqa,+ chaywanpas Josemi chaskirqan phiwi churiq chaskinan herenciataqa. 3 Rubenqa Israelpa phiwi churinmi karqan. Rubenpa churinkunan karqan: Anok, Palú, Ezrón, Carmipiwan.+ 4 Joelpa miraynin runakunan* karqan: Semaya, Gog, Simeí, 5 Miqueas, Reayá, Baal, 6 Baalpa churin Berapiwan. Beraqa Rubén ayllu runakunaq umallinmi karqan, paytan Asiria rey Tilgaj-Pilneserqa+ llaqtanmanta juj llaqtaman apapurqan. 7 Berapa familianmanta willakuymi kay; Berapa wayqenkunan karqan: umalli Jeiel, Zacarías, 8 Belapiwan. Belan karqan Azazpa churin, Azaztaq karqan Semaq churin, Semataq karqan Joelpa churin. Belaq familiankunan tiyarqanku Aroer llaqtamanta+ Baal-Meón llaqtakama jinallataq Nebo llaqtakama.+ 9 Inti lloqsimuy ladomantaq tiyarqanku ch’in aqo pampa qallariykama. Chaykunapin paykunaqa tiyarqanku Galaad jallp’api+ uywanku askhayapusqanrayku. Chay ch’in pampaqa Éufrates mayukaman karqan.+ 10 Saulpa tiemponpin paykunaqa Agar runakunawan maqanakurqanku, chay runakunata atipaspataq karpankupi tiyapurqanku. Chhaynapin paykunaqa Galaad jallp’aq inti lloqsimuy ladonpi tiyapurqanku.
11 Gadpa mirayninkunaqa Rubén ayllu runakunaq ladonpin tiyarqanku, paykunaq jallp’ankun karqan Basanmanta Salecá llaqtakama.+ 12 Paykunaq umallinkun karqan Joel, payman qatiq umallitaq karqan Safan. Chaymantapas Basanpiqa kallarqantaqmi umallikuna, paykunan karqanku Janaiwan Safajpiwan. 13 Paykunaq familiankun karqan: Miguel, Mesulan, Seba, Jorái, Jacán, Zía, Eberpiwan. Llapanpiqa qanchismi karqanku. 14 Paykunan karqanku Abijailpa churinkuna. Abijailqa Juripa churinmi karqan, Juritaq karqan Jaroaq churin, Jaroataq karqan Galaadpa churin, Galaadtaq karqan Miguelpa churin, Migueltaq karqan Jesisaipa churin, Jesisaitaq karqan Jadopa churin, Jadotaq karqan Buzpa churin. 15 Chay familiakunaq umallinmi karqan Aí. Aiqa Afdielpa churinmi karqan, Afdieltaq karqan Gunipa churin. 16 Gadpa mirayninkunan tiyarqanku Galaad jallp’api,+ Basán jallp’api,+ chay jallp’akunapi kaq llapa llaqtakunapi ima. Chaymantapas llapa Sarón jallp’apin tiyarqanku, Saronqa pasto pampakunayoqmi karqan. 17 Gadpa mirayninkunatan listapi churarqanku Judá ayllupi Jotán+ kamachikushaqtin, Israelpi Jeroboán*+ kamachikushaqtin.
18 Rubén ayllupi, Gad ayllupi, kuskan Manasés ayllupi iman karqan allin kallpasapa soldadokuna, llapanpiqa 44.760 soldadokunan karqan. Chay soldadokunan apaqku jark’apakuna escudonkuta, espadankuta, flechanankuta ima. Paykunaqa guerrapaq allin preparasqan karqanku. 19 Chay soldadokunan maqanakurqanku Agar runakunawan,+ Jetur runakunawan, Nafís runakunawan,+ Nodaf runakunawan ima. 20 Paykunaqa Diospa yanapaynintan mañakurqanku, jinan Diosqa Agar runakunata yanapaqnin runakunatapas paykunaq makinkuman entregarqan.+ Chhaynatan Diosqa paykunata guerrapi yanaparqan paypi confiasqankurayku. 21 Chay kutipin paykunaqa jap’ikapurqanku: pisqa chunka waranqa camellokunata, iskay pachaj pisqa chunka waranqa ovejakunata, iskay waranqa asnokunata, pachaj waranqa runakunata ima. 22 Cheqaq Diosmi chay guerrapiqa maqanakurqan,+ chaymi Agar runakunapas yanapaqnin runakunapas askhapuni wañurqanku. Chaymantataq paykunaqa chay runakunaq jallp’anpi tiyapurqanku juj llaqtaman apasqa kanankukama.+
23 Kuskan Manasés+ ayllu runakunaq mirayninqa askhan karqan. Paykunaq jallp’ankun karqan Basanmanta Baal-Hermonkama,+ Senirkama, Hermón orqokama. 24 Paykunaq umallinkun karqan: Éfer, Isí, Eliel, Azriel, Jeremías, Odavías, Jadielpiwan. Paykunan karqanku allin kallpasapa soldadokuna, allin reqsisqa runakuna, familiankupi umallikuna ima. 25 Ichaqa manan junt’aq sonqochu ñaupa taytankuq Diosninpaq karqanku, paykunaqa chay jallp’api tiyaq runakunaq diosninkutan yupaychayta qallarirqanku,*+ chay runakunatan Diosqa paykunaq ñaupankumanta chinkachirqan. 26 Chayta ruwasqankuraykun Israelpa Diosninqa Asiria rey Pulta kachamurqan,+ chay reytaqa Tilgaj-Pilnéser+ nikullantaqmi. Chay reymi Rubén ayllu runakunata, Gad ayllu runakunata, kuskan Manasés ayllu runakunatawan llaqtankumanta orqospa apapurqan Jalaman, Jaborman, Jaraman, Gozán mayu+ qayllaman ima. Chaypin paykunaqa kunan p’unchaykama tiyashanku.