Ezequiel
25 Jujmantan Jehová Diosqa rimapayamuwarqan, paymi niwarqan: 2 “Runaq churin, uyaykita Anmón runakunaman kutiriy,+ paykuna contra rimay.+ 3 Anmón runakunata khaynata niy: Tukuy munayniyoq Señor Jehová Diospa imachus nisqanta uyariychis. Tukuy munayniyoq Señor Jehová Diosmi nin: Ch’uya wasiy qhellichasqa kashaqtinmi, Israel jallp’a ch’usaqman tukuchisqa kashaqtinmi, Judá runakuna apasqa kashaqtinkun, qanqa* asipayaspa nirqanki: ¡May allinmi chaykuna pasasqanqa!, nispa. 4 Chayraykun inti lloqsimuy lado runakunaman entregasayki. Paykunan qankuna ukhupi toldonkuta sayarichinqaku,* chaypin karpankuta ruwanqaku. Mijunaykitan mijunqaku lecheykitan ujanqaku. 5 Rabá llaqtapin+ camellokuna mijunqa, Anmón runakunaq jallp’anpin uywakuna puñunqa, chhaynapin qankunaqa yachankichis noqa Jehová Dios kasqayta, nispa”.
6 “Tukuy munayniyoq Señor Jehová Diosmi nin: Israel jallp’a sasachakuypi tarikuqtinmi qanqa kusikurqanki, t’aqllapakusparaqmi+ jayt’apakusparaqmi may jatun kusikuywan pisicharqanki.+ 7 Chayraykun makiyta qan contra jaywarimusaq, jinaspan nacionkunaman entregasayki. Llaqtakuna ukhumantan chinkachisayki, nacionkunaq chaupinmantan ch’usaqyachisayki.+ Qanqa tukuchisqan kanki, chhaynapin yachanki noqa Jehová Dios kasqayta, nispa.
8 ”Tukuy munayniyoq Señor Jehová Diosmi nillantaq: Moabwan+ Seirwanmi+ nirqanku: Judá suyuqa waj nacionkuna jinallamá kasqa, nispa. 9 Chayraykun Moab, jujnin ladoykita qan contra jaykumunqaku. Linderoykipi* kaq llaqtakunatan jap’ikapunqaku, Bej-Jesimoj, Bej-Baal-Meón munay llaqtaykikunatan thuninqaku, Quiryatainkamaraqmi jaykumunqaku.+ 10 Anmón runakunatawan kuskatan inti lloqsimuy lado runakunaman entregasayki.+ Anmón runakunaqa manan nacionkuna ukhupiqa yuyarisqachu kanqa.+ 11 Moabtan castigasaq,+ chhaynapin paykunaqa noqa Jehová Dios kasqayta yachanqaku, nispa.
12 ”Tukuy munayniyoq Señor Jehová Diosmi nin: Edomqa Judá runakuna contran jatarirqan, paykunamantan vengakurqan, chayta ruwaspan jatun juchaman urmarqan.+ 13 Chaymi noqa tukuy munayniyoq Señor Jehová Diosqa nini: Edom contran makiyta jaywarisaq. Runakunatan uywakunatan ch’usaqman tukuchisaq, ch’in pampamanmi tukuchisaq.+ Temán ladomanta Dedán ladokaman espadawan wañuchisqa kanqaku.+ 14 Israel llaqtaywanmi Edommanta vengakusaq.+ Paykunan k’araq phiñakuyniyta, sinchi colerayta Edomman chayachinqaku, chhaynapin pichus kasqayta yachanqaku, nispa.+ Noqa tukuy munayniyoq Señor Jehová Diosmi chayta nini.
15 ”Tukuy munayniyoq Señor Jehová Diosmi nin: Filistea runakunaqa Israel runakunatan cheqnikurqanku, jinan paykunamanta vengakuyta munaqku, ch’usaqyachiytan munaqku.+ 16 Chaymi noqa tukuy munayniyoq Señor Jehová Diosqa nini: Filistea runakuna contran makiyta jaywarisaq.+ Keretita runakunatapas+ lamar-qocha patapi tiyaqkunatapas ch’usaqmanmi tukuchisaq.+ 17 Manchakunapaq ruwaykunawanmi paykunamanta vengakusaq, k’araq phiñakuyniytan, castigoytan paykunaman chayachisaq. Phiñakuyniy p’unchay chayamuqtinmi paykunaqa yachanqaku noqa Jehová Dios kasqayta, nispa”.