Ezequiel

42 Chaymantataq payqa jawa kaq patioman, wichay ladoman pusawarqan,+ chaypi kaq mijuna wasikunaq kasqanman.+ Chayqa wasiq* wichay ladonpin kasharqan.+ 2 Wichay ladoman lloqsiq punkumanta ukhu k’uchukamaqa pachaj codon* kasqa, chhaynan largon kasqa, anchontaq pisqa chunka codo kasqa. 3 Jujnin mijuna wasiqa ukhu kaq patioq ladonpin kashasqa, juj kaq mijuna wasitaq jawa kaq patioq ladonpi; sapanka wasin kinsa pata kasqa, iskaynintaqmi chimpa-chimpapura kashasqa. Ukhu kaq patioq anchonqa iskay chunka codon kasqa.+ 4 Chay mijuna wasikunaq chaupinpi purinapaq ch’usaq pampaq anchonqa+ chunka codon kasqa, largontaq pachaj codo.* Chay cuartokunaqa wichay ladoman uyayoqmi kasqa. 5 Kinsa kaq patapi mijuna cuartokunaqa aswan juch’uymi kasqa chaupipi kaq cuartokunamantapas pampapi kaq cuartokunamantapas. Purina balconkunan campota qechusqa. 6 Chaykunaqa kinsa pata ruwasqaña kasqa chaypas, manan patiopi jina columnakunaqa kasqachu. Chayraykun chay kinsa kaq patapi wasikunaqa aswan juch’uyachisqa kasqa chaupipi cuartokunamantapas pampapi kaq cuartokunamantapas.

7 Jawa kaq patioman wasayoq ruwasqa mijuna cuartokunaq ladonqa, juj kaq mijuna cuartokunaq chimpanqa rumiwan perqasqan kasqa, chay perqaqa pisqa chunka codo largon kasqa. 8 Jawa patioman wasayoq mijuna cuartokunaqa pisqa chunka codo largon kasqa, temploman wasayoq mijuna cuartokunataq pachaj codo largo kasqa. 9 Chay mijuna cuartokunaq inti lloqsimuy ladon k’uchupin juj punku kasqa, chayqa jawa kaq patiomanmi apasqa.

10 Uray ladopipas kallasqataqmi mijuna cuartokunaqa. Chaypi kaq rumiwan perqasqa perqapas inti lloqsimuy ladopin kasqa. Chay cuartokunapas ukhu patioq ladonpi, qhepa wasi qayllapin kashallasqataq.+ 11 Chay mijuna cuartokunaq chaupinpi purina pampapas wichay ladopi kaq cuartokunaq chaupinpi jinan kasqa.+ Kaq sayayllan largonpas anchonpas kasqa, punkunkunapas imayna t’aqanasqa kasqanpas igual-llan kasqa. Chay uray ladopi cuartokunaman 12 jaykuna punkukunaqa wichay lado cuartokunapi jinan kallasqataq. Inti lloqsimuy ladopin rumiwan perqasqa perqaq ladonpi juj punku kasqa, chaynintan chay mijuna cuartokunaman jaykuq kasqaku.+

13 Chaymantan payqa niwarqan: “Patioq ladonpi wichay ladopi kaq mijuna cuartokunapas uray ladopi kaq mijuna cuartokunapas+ ch’uya cuartokunan, chaypin Jehová Diosman qayllaykuq sacerdotekunaqa ch’uyay-ch’uya ofrendakunata mijunku.+ Chaymanmi churanku ch’uyay-ch’uya ofrendakunata, jak’u ofrendakunata, jucha pampachay ofrendakunata, juchaman urmasqamanta ofrendakunatapas. Chay cheqasqa ch’uyan.+ 14 Sacerdotekuna chay ch’uya ukhuman jaykuspaqa manan kasqan p’achallayoqqa jawa patiomanqa lloqsinkumanchu, ch’utikunankun chay ukhupi servisqanku p’achataqa.+ Jawaman lloqsinankupaqqa, runakunaq kasqanman rinankupaqqa juj p’achakunawanmi churakunanku”, nispa.

15 Templo mediyta tukuspan payqa inti lloqsimuy lado punkunta jawaman pusawarqan,+ chaypin payqa jawantañataq llapanta medirqan.

16 Inti lloqsimuy ladotan medinan carrizowan* juj esquinamanta juj kaq esquinakama medirqan, chayqa pisqa pachaj carrizon kasqa.

17 Wichay ladotan medillarqantaq, chaypas pisqa pachaj carrizon kallasqataq.

18 Uray ladotan medillarqantaq, chaypas pisqa pachaj carrizon kallasqataq.

19 Chaymantataq inti jaykuy ladoman muyuykurqan, chaypas pisqa pachaj carrizon kallasqataq.

20 Tawantin lado perqatan medirqan. Chay perqakunaqa+ largonmanpas anchonmanpas pisqa pachaj carrizon kasqa.+ Chay perqan t’aqasqa ch’uya kaqta común kaqtawan.+