Ezequiel
5 ”Runaq churin, juj filochasqa espadata jap’iy, chaywanmi chujcha rutuqpa navajanwan jina umaykita sunkhaykitawan k’isukunki. Chay chujchatataq juj balanzapi pesanki, jinaspa t’aqa-t’aqata churanki. 2 Llaqtata cercasqayki p’unchaykuna junt’akuqtinmi,+ chay chujchaq kinsa kaq partenta llaqta ukhupi ruphachinki. Chujchaq kinsa kaq partentataq llaqta muyuriqpi espadawan ñut’uta k’utuchinki.+ Kinsa kaq partetataq wayrawan apachinki, noqataq juj espadawan paykunata qatipasaq.+
3 ”Wakin chujchakunatataq p’achaykiq cantonpi k’uyunki. 4 Wakintataq ninaman wijch’uykunki, chaypin ruphachinki. Chay ninaqa llapa Israel runakunatan ruphanqa.+
5 ”Tukuy munayniyoq Señor Jehová Diosmi nin: Kayqa Jerusalén llaqtan. Paytan askha nacionkunaq askha llaqtakunaq chaupinpi churarqani. 6 Paymi ichaqa chaninchayniykuna contra jatarirqan, kamachikuyniykunatapas manan kasukurqanchu, muyuriqnin nacionkunamantapas llaqtakunamantapas aswan millaytaraqmi ruwan.+ Kay llaqta runakunaqa chaninchayniykuna contran jatarirqanku, kamachikuyniykunatapas manan kasukurqankuchu, nispa.
7 ”Chaymi tukuy munayniyoq Señor Jehová Diosqa khaynata nin: Muyuriqniyki nacionkunamanta aswan millayta kausasqaykiraykun, kamachikuyniykunatapas chaninchayniykunatapas mana kasukusqaykiraykun, waj nacionkunaq chaninchayninkuman jina kausasqaykiraykun,+ 8 noqa tukuy munayniyoq Señor Jehová Dios nini: Yau llaqta, qan contran kaypi kashani,+ llapa nacionkunaq rikushasqanmi noqa kikiy castigasayki.+ 9 Millay qhelli ruwaykuna ruwasqaykiraykun mana jayk’aq ruwasqayta ruwasayki, manataqmi chaytaqa jayk’aqpas jujmantaqa ruwasaqchu,+ nispa.
10 ”Qankunamanta wakin taytakunan wawankuta mijunqaku,+ wakin wawakunapas taytankutan mijunqaku. Qankunatan castigasaykichis, lliu ladomanmi ch’eqerichisaykichis.+
11 ”Tukuy munayniyoq Señor Jehová Diosmi nin: Noqa wiñaypaq kausaq Diosmi jurani, ch’uya wasiytataq llapa millay qhelli idoloykikunawan,+ mana chanin ruwasqaykikunawan qhellichanki chayqa, noqapas cheqnikapuykin, manañan qantaqa khuyapayasaykiñachu ni llakipayasaykiñachu.+ 12 Qanmanta kinsa kaq parten millay onqoykunawan yarqaypi ima wañunqa. Kinsa kaq partetaq espadawan muyuriqniykipi wañunqa.+ Puchuq kinsa kaq partetataq tukuy ladoman ch’eqechispa juj espadawan qatipasaq.+ 13 Chaymantan ichaqa sonqoy tiyaykunqa, phiñakuyniypas thasnuykunqa. Imachus ruwasqaywanmi thaj kasaq.+ Llapa k’araq phiñakuyniyta kacharisqaywanmi paykunaqa yachanqaku noqa Jehová Dios rimasqayta. Noqaqa noqallata yupaychawanankutan munani.+
14 ”Qantaqa lliutan ch’usaqman tukuchisayki. Muyuriqniykipi nacionkunan asipayasunki, qayllaykita pasaq runakunan asipayasunkiku.+ 15 K’araq phiñakuywan, sinchi renegaywan castigaqtiymi jujkunaqa asipayasunkiku cheqnikusunkiku ima.+ Qanwan imachus pasasqanqa jujkunaq yachananpaqmi muyuriqniykipi nacionkunaq manchakunanpaqmi kanqa. Noqa Jehová Diosmi chayta nini.
16 ”Qankunata chinkachinaypaqmi yarqayta flechakunata jinaraq chayachimusaq. Flechamusqay flechakunaqa lliutan tukuchisunkichis.+ Manan mijuy kanqachu,* chaywanmi astawanraq yarqaymanta wañunkichis.+ 17 Yarqayta salqa phiña animalkunatawanmi qankunaman kachamusaq,+ chaykunan mana wawayoqta saqesunkichis. Millay onqoykuna, wañuchinakuy iman ñit’iykusunkichis. Qan contran juj espadata kachamusaq.+ Noqa Jehová Diosmi chayta nini, nispa”.