“Manañan p’enqakunichu imayna kausasqaymanta”

ÑAUPA VIDAY

Obregón llaqtapin nacerani, chayqa México llaqtaq inti lloqsimuy ladonpin kashan. Pusaqmi hermanoykunaqa, papaywanmi campopi tiyaq kayku animalkunata uywaspa, kusisqan familiaypiqa kausaq kayku. Ichaqa pisqa wataypi kashaqtiymi tiyasqayku llaqtata juj jatun wayra thunipuran, chaymi juj lado llaqtaman ripurayku.

Allinmi familiypiqa kasharayku, ichaqa papaymi machayta yacharapuran. Chaymi manaña kusisqachu familiaypiqa kausaq kayku. Hermanoykunawanmi fumayta yacharapurayku, papaypa cigarronkunata suwakuspan fumaq kayku. Soqta watallaypi kashaspan ñaupaq kutitaqa macharapurani. Chay qhepamanqa tayta-mamaykun t’aqanakapuranku, chaymi astawanraq viciokunaman urmapurani.

Mamayqa waj qhariwanmi tiyapuran, chaymi juj ladoman ripuran, noqaykutapas apawarankun. Ichaqa manan chay runaqa qolqeta mamayman qoqchu. Mamaypa llank’apakuspa qolqe ganasqanqa manan imapaqpas aypaqchu. Chaymi noqaykupas imallapipas llank’apakuq kayku. Noqaqa zapatota lustraspa, t’antata vendespa, periodicota vendespa, misk’ikunata vendespa iman llank’aq kani. Chaymantapas qhapaq runakunaq basura jich’asqanpin mijunata maskhaq kani.

Chunka wataypi kashaqtiymi juj runa niwaran basura wijch’unapi llank’anaypaq, jinan noqaqa escuelayta saqesparaq wasiymanta chay llank’anaman ripurani. Chay llank’anapiqa pisillatan pagawaq, mijunatapas basuramanta tarisqallaykutan qowaq. Basurapi imaymana cosaskunata tarisqallaywanmi tiyanaypaqpas wasita jina ruwakuq kani, chayllapin tiyaq kani. Chayneqpi kaq runakunaqa millay qhelli simikunatan rimaqku. Qhelli kausaypi puriqkuna, drogakuqkuna, machaqkuna iman kaqku. Manan kusisqachu kausarani, sapa tutan sinchi manchasqa waqaq kani. Nishu p’enqasqan kasharani mana imayoq kasqaymanta, mana escuelayoq kasqaymantawan. Kinsa watan chay basura wijch’unapiqa tiyarani. Chaymantaqa juj lado llaqtamanmi ripurani, chaypin llank’arani t’ika chajrapi, algodon chajrapi, azúcar caña chajrapi, papa chajrapi ima.

Tawa wata qhepamanmi Obregón llaqtaman kutipurani, chaypin tiaypa wasinpi tiyarani. Chay tiayqa jampikuqmi karan. Chaypi tiyashaqtiymi manchakuyta mosqokuq kani, llakisqa iman kaq kani, chaymi wañuchikuytaraq piensarani. Jinan juj tuta Diosmanta mañakurani: “Diosníy, kankipuni chayqa, reqsiytan munayki. Wiñaypaqmi serviyta munayki. Kanpuni cheqaq religion chayqa, yanapaway tarinaypaq”, nispa.

BIBLIAQ YANAPAYNINWAN CAMBIAPUNI

Diosmantaqa yachaytapunin munaq kani, chaymi erqellaraq kashaspa askha religionkunaman riq kani. Ichaqa manan mayqenpas gustawaranchu, manan mayqenpipas Bibliamanta yachachiwarankuchu, manan Diosta reqsinaypaqpas yanapawarankuchu. Chay risqay wakin religionkunapiqa qolqellatan mañaqku, wakinpitaq millay qhellita kausaqku.

19 wataypi kashaqtiymi cuñadoy niwaran: “Jehová Diospa testigonkunan Bibliawan yacharachiwanku idolokunata yupaychananchischus icha manachus chayta”, nispa. Jinaspan leewaran Éxodo 20:4, 5 textota, chaypin nishan: “Aman chaykunaman k’umuykukunkichu, amallataq chaykunata yupaychankipaschu, ñoqa Señor Diosniykiqa sienteq Diosmi kani”, nispa. Jinaspan cuñadoyqa niwaran: “Dios chay idolokunawan milagrokunata ruwanman, otaq chay idolokunata yupaychananchista munanman chayqa, manan niwasunmanchu ‘aman chaykunamanqa k’umuykunkichu’ nispaqa”, nispa. Chay niwasqanpin piensashallarani. Chay kutimantapachan Bibliamantaqa rimallaqpuni kayku, tiemporaqmi rimanaykupaqqa faltawaqku.

Chay qhepallamanmi cuñadoypiwan rirayku Jehová Diospa testigonkunaq juñunakuyninman. Chay juñunakuypi rikusqayqa anchatan gustawaran. ¡Llapankun chaypiqa rimaranku, erqekunapas allintan llapa chaypi kaqkunaq ñaupanpi mana manchakuspa rimaranku! Chay juñunakuypi yachachisqankuqa admirakunapaqmi karan. Manaña allin p’achasqachu kasharani chaypas, jatun chujchayoqña kasharani chaypas, llapankun sumaqta chaskiwaranku. Juñunakuy pasaytapas juj familian mijuqta pusawaran.

Biblia estudiasqaypin yacharani papanchis Jehová Diosqa ancha munakuq kasqanta, sapankanchismanta llakikusqanta, wajchaña, qhapaqña, maymantaña, imaynaña kaqtinchispas llapanchista igualta munakuwasqanchista (Hechos 10:34, 35). Chayraqmi Diosmanta yachaspa kusisqa karani.

BENDICIONKUNA CHASKISQAY

Kausayniyqa cambiapuranmi. Manañan fumaranichu, manañan macharanichu ni qhelli simikunatapas rimapuranichu. Manañan ñaupaqpi jinachu sientekurani, manan millaytapaschu mosqokuq kani. Chinkapuranmi manchakuyniypas mana valeqpas qhawarikusqaypas.

Kunanqa kusisqan esposaypiwan kashayku, esposayqa anchatan Jehová Diosta munakun, kusatan noqatapas yanapawan. Noqaqa watukuq umalliqmi kani, chaymi iñiq t’aqakunata watukuni iñiqmasiykunata iñiyninkupi kallpachanaypaq, yachachinaypaq ima. Kunanqa maytan Diosta gracias nini imaymanapi yanapawasqanmanta, yachachiwasqanmanta ima. Kunanqa manañan p’enqakunichu imayna kausasqaymanta.