Jesús fariseokunata anyan

Fariseokunapas juj yachachiqkunapas Diospa atiyninwan Jesuspa ruwasqan milagrokunata negaspaqa santo espiritutan k’amisharanku, chhaynapitaq Satanaspa munayninta ruwasharanku. Chaymi Jesusqa niran: “Mana allin sach’achus kankichis chayqa, mana allin rurutan rurunkichis, sach’ataqa imayna rurusqanpin reqsikun”, nispa (Mateo 12:33).

Supaykunata Jesuspa qarqosqanqa allin ruwaymi karan. Orqopi yachachisqan jina, chay ruwasqanqa allin ruru jinan karan; chaymi yanqapuni karan wakin fariseokunaq ‘Saqraq atiyninwanmi ruwashan’ nisqankuqa. Chaywanmi paykunaqa rikuchisharanku mana allin sach’a jina kasqankuta. Chaymi Jesusqa paykunata niran: “Mach’aqway miraykuna, ¿imaynapin allin kaqkunata rimawaqchis millay sonqoyoq kashaspaykichis? Simiqa riman imachus sonqopi kashan chaytan”, nispa (Mateo 7:16, 17; 12:34).

Rimasqanchispitaq rikukun sonqonchis imayna kasqanta chayqa, chayman jinan juzgasqa kasun. Chaymi Jesusqa niran: “Runakunaqa juicio p’unchaypin cuentata qonqaku tukuy yanqa kaqkuna rimasqankumanta. Imachus rimasqaykimantan allinpaq jap’isqa kanki, imachus rimasqaykimantan juchachasqapas kanki”, nispa (Mateo 12:36, 37).

Askha milagrokunataña Jesús ruwaran chaypas, chay judío umallikunaqa juj señaltan rikuyta munasharanku. Chaymi Jesusqa paykunata niran: “Yau Diosta mana kasukuq millay runakuna, ¿señaltachu rikuyta munashankichis? Manan ima señaltapas rikunkichischu, aswanpas profeta Jonasta imachus pasasqan milagrollan qankunapaqqa señal kanqa”, nispa (Mateo 12:38, 39).

Chay nisqanta entiendechinanpaqmi Jesusqa niran: “Imaynan Jonaspas jatun challwaq wijsanpi kinsa p’unchay kinsa tuta karan, chhaynallataqmi runaq Churinpas allpaq sonqonpi kinsa p’unchay kinsa tuta kanqa”, nispa. Chaywanmi Jesusqa willasharan kinsa p’unchaymanta kausarimunan kasqanta. Nisqanman jinaña pasaran chaypas, judío umallikunaqa manan Diosman kutirikurankuchu (Mateo 27:63-66; 28:12-15). “Nínive llaqta runakunan” ichaqa juchankumanta kutirikuranku paykunata Jonás predicaqtin. Chaymi Jesusqa niran: ‘Paykunan kay tiempo runakunata juchachanqaku’, nispa. Chaymantapas niranmi: ‘Uray ladomanta kaq reinapas kay tiempo runakunatan juchachanqa; payqa karumantaraqmi jamuran Salomonta uyariq. Qhawariychis, Salomonmantapas aswan yachayniyoqmi kaypiqa kashan’, nispa (Mateo 12:40-42).

Chaymantan Jesusqa chay tiempo runakunata supaypa junt’aykusqan runawan compararan. Chay supay lloqsipuqtinsi chay runaqa mana imatapas ruwanchu, chaysi chay millay espirituqa qanchis espiritukunatawan pusarikuspa chay runaman kaqta jaykupun (Mateo 12:45). Chhaynallataqmi Israel nacionwanpas pasaran, limpiasqa kashaspan mana ima allintapas ruwarankuchu, aswanmi Diospa profetankunata cheqnikuranku; manan Jesustapas kasurankuchu imaymanataña Diospa espiritunwan ruwaran chaypas. Chhaynapin Israel nacionqa aswan mana allinpiraq tarikapuran.

Jesús rimashallaqtinraqmi payman willaranku: “Mamaykin wayqeykikunapiwan jawapi sayashanku, qanwan tupaytan munashanku”, nispa. Jinan Jesusqa discipulonkunaman makinta jaywarispa niran: “Mamaypas wayqeykunapas Diospa siminta uyarispa kasukuqkunan”, nispa (Lucas 8:20, 21). Chhaynapin rikuchiran familiankunamantaqa discipulonkunata astawan munakusqanta. Noqanchispas chhaynatan iñiqmasinchiskunataqa munakunanchis. Jujkunaña k’amiwasunman otaq imataña niwasunman chaypas, iñiqmasinchiskunaqa noqanchiswanmi kashanqaku.