Profeta Isaiaspa willasqanta junt’an

Herodespa t’aqanmanta runakunawan fariseokunawan wañuchinankupaq rimanakusqankuta yachaspan Jesusqa Galilea qochaman riran. Chaymanmi askha runakuna jamuranku jinantin Galileamanta, Tiro llaqtamanta, Sidón llaqtamanta, Jerusalenmanta, Idumea llaqtamanta ima. Chaypin Jesusqa askha onqosqakunata qhaliyachiran, chaymi sinchi onqosqa runakunaqa Jesusman k’iskipakamuranku payta llamiykunankupaq (Marcos 3:9, 10).

Sinchitaña k’iskipakamushaqtinkutaq Jesusqa discipulonkunawan juj botechata alistachikuspa chayman seqaran. Chhaynapin facil-llata runakunata yachachinman karan, qocha patapi kashaq juj runakunamanpas facil-llata chayanman karan.

Jesuspa imachus ruwasqanwanmi “junt’akuran profeta Isaiaspa willasqan” profecía (Mateo 12:17).

Chay profecian niran: “Kaymi ajllakusqay kamachiy, paytan munakuni, payqa sonqoypaq jinan. Paymanmi espirituyta qosaq, paymi nacionkunaman yachachinqa imachus chanin kay kasqanta. Manan piwanpas jap’inakunqachu, manan qaparkachanqachu, manataqmi pipas jatun ñankunapiqa paypa kunkanta uyarinqachu. Manan q’ewisqa soqostapas sarurparinqachu, manataqmi q’osñishaq mechatapas wañuchinqachu chanin kayta allinta tajachinankama. Paypa sutinpin nacionkuna suyakunqa”, nispa (Mateo 12:18-21; Isaías 42:1-4).

Chay ajllasqa kamachiqa Jesusmi karan. Paymi lliuman sut’ita yachachiran imachus chanin kay kasqanta. Chay chanin kaytan judío umallikunaqa costumbrenku jawa chinkachipusharanku. Chaymi fariseokunapas mana ni juj onqosqallatapas sábado p’unchaypi yanapaqkuchu. Jesusmi ichaqa chanin kaqta yachachispa runakunata kacharichiran chay sasa yachachikuykunamanta. Chayraykun chay umallikunaqa Jesusta wañuchiyta munaranku.

Profeciaq nisqan jina, Jesusqa ‘manan qaparkacharanchu, manataqmi pipas jatun ñankunapiqa paypa kunkanta uyariranchu’. Arí, payqa manan munaranchu pipas paymanta maypipas willakachashananta, chaymi qhaliyachisqan runakunatapas, supaykunatapas kamachiran “pichus kasqanta ama rimarinankupaq” (Marcos 3:12).

Chaymantapas chay profeciapi nisqan jina, Jesusqa ancha munakuywanmi kallpacharan q’ewisqa soqos jina, q’osñishaq mecha jina kaq runakunata. Payqa manan saruncharanchu chhayna pisichasqa runakunata, aswanmi sumaqta paykunata yanapaykuran. Chhaynapin rikuchiran payllapi nacionkuna suyakunanku kasqanta.