¿Jayk’aqllapas paykuna jina sientekurankichu? Yaqapaschá Biblia leeyta munaranki, ichaqa imapas jark’arasunki. Askha runakunapaqmi Biblia leeyqa uma nanay. Ichaqa, ¿chhaynatachu qhawariwaq Bibliata leespa kusikunaykita yachaspa, vidaykipi allinniykipaq kananta yachaspapas? Sichus yachawaq Bibliata leenapaq yanapaykuna kasqanta chayri, ¿leewaqchu Bibliata?

Qhawariy Bibliata leespa wakin runakunaq ima nisqankuta. Paykunaqa yacharankun Biblia leey allinpuni kasqanta.

Ezekielqa 20 más watayoqmi, paymi nin: “Ñaupaqpiqa manan yacharanichu imapaq kausasqayta, kunanmi ichaqa kusisqa kausani. Bibliapiqa allin consejokunan kashan, chaykunan vidanchispi yanapawanchis”, nispa.

Fridapas 20 watayoq jinan kashan, paymi nin: “Imallamantapas renegaqmi kani, ichaqa Bibliata leesqayraykun genioyta controlayta atirani. Kunanqa manañan millay caracterniyoqchu kani, askha amigokunayoqmi kanipas”, nispa.

Euniceqa 50 más watayoqñan, paymi nin: “Yanapawashanmi aswan allin runa kanaypaq, mana allin costumbreykunata saqenaypaqpas”, nispa.

Paykunatapas millonninpi runakunatapas allintan yanaparan Bibliata leey, qantapas yanapasunkimanmi kusisqa kausanaykipaq (Isaías 48:17, 18). Kaykunapin yanapasunkiman: allinta decidinaykipaq, allin amigokunayoq kanaykipaq, estrés onqoyta atipanaykipaq, kamaqninchis Diosmanta cheqaq kaqta yachanaykipaqpas, chaymi imamantapas aswan importanteqa. Bibliapi consejokunaqa Diosmantan jamun, chayman jina kausaspaqa manan jayk’aqpas pantasunchu.

Importanteqa qallariymi. Qatimuq temakunapin yanapaykunata tarinki Biblia leeyta qallarinaykipaq kusisqa leenaykipaqpas.

¿Imaynatan Bibliata kusisqa leewaq jinaspa allinta beneficiakuwaq? Pisqa yanapaykunamanta rimasun, chayqa askha leeqkunatan yanaparan.

Maypi leenaykipaq ajllay. Juj allin lugarta ajllay. Manan imapas distraenasuykipaq jina kananchu, allin k’anchaymi kanan airepas frescon kanan, chhaynapi leesqaykiman yuyayta churanaykipaq.

Yachay yuyaywan leey. Bibliaqa janaq pacha taytanchispa regalonmi. Chaymi beneficiakunaykipaqqa, imaynan juj wawa taytanmanta yachayta munan chay jina yuyaywanmi leenayki. Amapuni ima mana allin piensaywanpas Diosmanta yachanaykitaqa jark’achikuychu (Salmo 25:4).

Diosmanta mañakuy qallarinaykipaq. Bibliapiqa Diospa pensamientonkunataq kashan chayqa, yanapaynintan necesitanchis entiendenapaq. Payqa mañakuqninkunamanmi santo espiritunta qon (Lucas 11:13). Chay espiritun yanapasunki Diospa piensasqanta entiendenaykipaq, chhaynapin tiempowanqa “Diospa pakasqa yachayninkunatawanraq” entiendenki (1 Corintios 2:10).

Entiendenaykipaq jina leey. Bibliata leeshaspaykiqa kaykunata tapukuy: “Kay willakuypi rijuriq runa, ¿imayna runa kasqantan rikuchin? ¿Imaynatan kaypi yachasqayman jina kausayman?”, nispa.

Yuyaykuy imakuna aypay munasqaykipi. Bibliata leespa kusikunaykipaqqa, kallpachakuy chaypi yachasqaykiwan vidaykipi yanapachikunaykipaq. Yaqapaschá leewaq Diosta astawan reqsinaykipaq, aswan allin runa kanaykipaq, aswan allin qosa otaq esposa kanaykipaq. Chay temakunamanta rimaq willakuykunata Bibliapi maskhay, chaywan yanapachikunaykipaq.a

Chay pisqantin indicacionkunan yanapasunki qallarinaykipaq. Ichaqa, ¿imatan ruwawaq Bibliata leespa astawanraq kusikunaykipaq? Qatimuq temapi chayta yachasun.

Bibliata leespa, ¿kusikunkichu icha aburrikunkichu? Chayqa kanqa imayna yuyaywan leesqaykimantan. Kunanmi yachasun Bibliata leespa ama aburrikunaykipaq imakunata ruwanaykimanta.

Fácil entiendekuq Bibliata ajllay. Sichus Bibliata leespa sasa entiendey palabrakunata tarinki chayqa, manan gustowanchu leenki. Chayraykun fácil entiendekuq Bibliata ajllanayki, chhaynapin leesqayki sonqoykiman chayanqa. Ichaqa chay traduccionqa exacto t’ijrasqan kanan.a

Tecnología nisqata aprovechay. Bibliaqa kashanmi internetpipas. Leewaqmi otaq descargawaq computadorapi, tabletpi otaq celularpi. Chaypi tarikuq wakin Bibliakunapiqa kashanmi herramientakuna juj versiculota astawan entiendenaykipaq, askha Bibliakunawan comparanapaqpas. Jinaspapas, sichus uyariyta munanki chayqa, kashanmi uyarinapaq grabacionkunapas. Wakinmanqa gustanmi llank’anaman rishaspa uyariy otaq carropi rishaspa, p’achata t’aqsashaspa otaq imata ruwashaspapas. ¿Manachu chayta qanpas ruwawaq?

Bibliata estudianapaq herramientakunata utilizay. Bibliata estudianapaq herramientakunan astawanqa yanapasunki. Ejemplopaq, kashanmi mapakuna Bibliaq willasqan llaqtakunata tarinapaq, chaypi imakuna pasasqanpi piensanapaq ima. Chaymantapas kay revistapi rijuriq temakuna, jinallataq jw.org nisqapi “Enseñanzas bíblicas” temapi kaqkuna yanapasunki Bibliapi textokunata entiendenaykipaq.

Gustasqasuyki temamanta leey. Bibliata llapanta leeyta sinchi sasapaq qhawarinki chayqa, mayqen partechus astawan gustasunki chaymanta qallariy. Bibliapi pimantapas astawan yachanaykipaqqa, sapankamantan maskhawaq. “Bibliamanta astawan yachanaykipaq iñiyniyoq runakunamanta estudiay” nisqa recuadro yanapasunki pimantapas yachanaykipaq. Leellawaqtaqmi sapanka temamanta otaq ima tiempopi pasasqan fechaman jina. ¿Ruwawaqchu chayta?

Bibliaqa manan juj librokuna jinachu, chaypiqa kamaqninchis Diospa allin consejonkunan kashan (2 Timoteo 3:16). Chaymi anchata yanapasunkiman, Biblia kikinmi nin: “Diospa siminqa kausashaqmi, atiyniyoqtaqmi kanpas”, nispa (Hebreos 4:12). Kay libroqa iskay formamantan yanapasunkiman. Sumaqta kausanaykipaq consejokunata qospa, jinallataq Diosmanta promesankunamantawan yachanaykipaqwan (1 Timoteo 4:8; Santiago 4:8).

Allin consejokuna kashan: Bibliapiqa kashanmi consejokuna sapanka runapaqpas, jinallataq juj temakunamantapas.

• Jujkunawan allinta apanakunapaq (Efesios 4:31, 32; 5:22, 25, 28, 33).

• Allin saludniyoq kanapaq (Salmo 37:8; Proverbios 17:22).

• Allin comportamientoyoq kanapaq (1 Corintios 6:9, 10).

• Llank’anamanta (Proverbios 10:4; 28:19; Efesios 4:28).a

Asiamanta juj pareja chayllaraq casarakuspa repararanku Bibliapi consejokuna allinpuni kasqanta. Paykunapas jujkuna jinas sasachakusqaku casado kausayninkuman costumbrakunankupaq, allinta rimanakunankupaqpas. Ichaqa Bibliapi leesqankuman jinan kausaranku. ¿Yanaparanchu chay? Vicent nin: “Bibliapi leesqaymi allinta yanapawaran matrimoniopi problemakuna kaqtin”, nispa. Esposan Annalou nillantaq: “Bibliapi ejemplokunata estudiaymi yanapawaranku. Kunanqa kusisqan sientekuni, kaq metallayoqtaq kaykupas”, nispa.

Diosta reqsinaykipaq yanapasunki. Vicent nillantaq: “Bibliata leesqaymi yanapawallantaq Jehová Diosman astawan qayllaykunaypaq”, nispa. Chay nisqanwanmi reparanchis qantapas astawan Diosta reqsinaykipaq yanapanasuykita. Diospa consejonkunan yanapasunki, chaymantapas amigonmi kapunki. Bibliapin yachallankitaq jamuq tiempopaq sumaq promesa kasqanta, wiñay kausayta chaskinanchispaq (1 Timoteo 6:19). Chaytaqa manan ima libropas yachachisunkimanchu.

Sichus Biblia leeyman costumbrakunki chayqa, vidaykin aswan allin kanqa astawantaq Diosta reqsinki. Ichaqa yaqapaschá leeshaspa imaymanata tapukunki. Chay pasaqtinqa Etiopía llaqtayoq runata yuyariy, payqa 2.000 watakuna ñaupaqtaraqmi kausaran. Chay runaqa imaymanatan Bibliamanta tapukuran, chaymi Jesuspa discipulon Felipe tapuran: “¿Entiendeshankichu imachus leesqaykita?”, nispa. Paytaq kutichiran: “¿Imaynapitaq entiendeyman mana pipas yachachiwashaqtinri?”, nispa.b Jinan Diospa palabranta entiendeq Felipewan yanapachikuran allinta entiendenanpaq (Hechos 8:30, 31, 34). Chay jinallataq sichus qanpas munanki astawan Biblia entiendeyta chayqa, internetpi kaq juj formulariopi datoykita junt’aspa apachimuwayku, chayqa jw.org direccioniykupin kashan. Otaq qelqamuwayku kay revistapi 2 paginapi rijuriq direccionman. Jinaspapas Jehová Diospa testigonkunatan maskhawaq tiyasqayki lugarpi, otaq juñunakunayku wasita visitawaq. Animaykikun juj Bibliata conseguikunaykipaq, chaywan vidaykipi yanapachikunaykipaq.