Askha runakunapaqmi sasa Diosta munakuy. ¿Imarayku? Paykunaq yuyaykusqankuman hinaqa Diosqa pakansi imayna kasqanta, chaymi paykunaqa mana reqsiy atinankupaq hina qhawarinku. Hinaspapas mana khuyapayakuqta hina qhawarinku. Wakinmi khaynata ninku:

• Italia nacionmanta Marco nin: “Diospa yanapaynintaña mañakuq kani chaypas, karupipas kashanman hinatan qhawariq kani, mana munakuq runata hina”, nispa.

• Guatemala nacionmanta Rosa nin: “Munarqanin Dios serviyta, ichaqa mana asuykunapaq hinatan qhawarirqani, mana khuyapayakuqta, castigakuq Diosta hina”, nispa.

• Canadá nacionmanta Raimunda nin: “Erqellaraq kashaspayqa imachus pantasqanchista qhawaspa castigakuq Diosta hinan qhawariq kani. Chaymantataq runakunata mana munakuq kamachikuqta hina”, nispa.

Imaniwaqmi, ¿sasachu kanman Diosta munakuy? Chay hinatan cristianokunaqa unayña tapukuqku. 500-1500 watakunapin askha runakuna Diosmanta manaña mañakurqankuchu. ¿Imarayku? Manchakusqankurayku. Ñawpaq tiempomanta yachaq Will Durant nirqan: “¿Imaynatan huk huchasapa runa mana khuyapayakuq millay Diosmanta mañakunman?”, nispa.

¿Imaraykun runakuna chhaynata yuyaykun? ¿Imatapunin Biblia yachachin Diosmanta? Diosta allinta reqsispa, ¿sasachu kanman Payta munakuy?

RUNAKUNA NINKU:

David Cunningham profesormi religionkunamanta yachaq libronpi nin: “Manan yachaykuchu Diospa sutin kanchus icha manachus chayta, kanmanña chaypas manan yachaykuchu imayna kasqanta”, nispa.

BIBLIAN NIN:

Dios kikinpunin nirqan: “Ñoqan tukuy allin-kayniyta rikuchisqayki, hinaspan ñawpaqeykipi: Sutiyqa ‘Señor Diosmi’ nispa rimarisaq”, nispa (Éxodo 33:19). Quechua Bibliapi Jehová sutita churanankumantaqa “Señor” nispalla churanku. Jehová sutiqa hebreo simimantan hamun, “Ñoqan kasaq munasqayman hina” ninantaqmi.

Jehová Diosqa munanmi sutinmanta waqyananchista. Bibliapin nin: “Sutinta hatunchaychis, suyukunaman paypa ruwasqankunamanta willaychis”, nispa (Isaías 12:4).

Jesusmi Yayanmanta mañakuspa nirqan: “Sutiyki yupaychasqa kachun”, nispa (Mateo 6:9). Jesusqa qatikuqninkunamanmi Diospa sutinta yachachirqan. ¿Imaraykun chayta ruwarqan? Paymi kutichin: “Munakuwasqaykita hina paykunapas hukkunata munakunankupaq, ñoqapas paykunawan huklla kanaypaq”, nispa (Juan 17:26).

¿IMARAYKUN CHAYMANTA YACHANAYKI?

Religionkunamanta yachaq Walter Lowrie qelqarqan: “Diospa sutinta mana yachaqqa manan Diosta reqsinchu [...] manataqmi munakuyta atinmanchu huk kallpallata hina qhawarispaqa”, nispa.

Victor sutiyoq runan sapa semana iglesiaman riq, ichaqa manan imatapas Diosmantaqa yacharqanchu. Paymi willakun: “Diospa sutinta yachaspaqa chayraqpas reqsichiwashankuman hinan karqan, paymantaqa askha kutipin rimapayawarqanku. Kunanmi ichaqa manaña mana reqsisqata hinañachu qhawarini aswanpas amigoyta hina”, nispa.

Jehová Diosqa ‘sutinta jatunchajkunaq’ qayllanpin kashan, paykunamantaq prometen: “Imaynatachus uj tataqa payta sirvej wawanta khuyan, ajinallatataj noqapis paykunata khuyasaj”, nispa (Malaquías 3:16, 17, Diosmanta Qhelqasqa). Jehová Diosqa bendecinmi sutinmanta waqyakuqkunata. Biblian nin: “Pipas Señorpa sutinta waqyakuqqa qespichisqan kanqa”, nispa (Romanos 10:13).

RUNAKUNA NINKU:

El Diccionario Akal crítico de Teología nisqa nin: “Trinidad yachachikuyqa kinsa dioskuna hukllapi kasqanmi, chaykunan kanku Yaya, Churi, Santo Espíritu”, nispa. Diccionario abreviado del cristianismo nisqa nillantaq: “Chay yachachikuypin creenku Católica, ortodoxa, anglicana hinallataq protestante nisqa religionkuna”, nispa.

BIBLIAN NIN:

Jesusqa manan haykʼaqpas nirqanchu Dioswanqa kaqllan kani nispaqa, aswanpas nirqanmi: “Yayaman risaq [...]. Yayaqa ñoqamanta aswan kurakmi”, nispa (Juan 14:28). Huknin qatikuqninmanmi nillarqantaq: “Ñoqan wichashani Yayayman Yayaykichisman, Diosniyman Diosniykichisman”, nispa (Juan 20:17).

Santo espirituqa manan huk dioschu. Ñawpa tiempopi cristianokunamanmi ‘santo espíritu huntʼaykurqan’. Hinaspapas Jehová Diosmi nirqan: “Espirituyta llapa runakunaman kachaykamusaq”, nispa (Hechos 2:1-4, 17). Santo espirituqa Diospa kallpanmi mana Trinidadmanta huknin dioschu.

¿IMARAYKUN CHAYMANTA YACHANAYKI?

Karl Rahner, Herbert Vorgrimler Bibliata estudiaq católico runakunan ninku: “Trinidadmanta yachachikuyta entiendenapaqqa Diospa sutʼinchawananchistaraqmi necesitanchis, chaywanpas manan llapantaqa entiendeyta atisunmanchu”, nispa. Ichaqa, ¿munakuwaqchu mana reqsisqaykita? Manan riki. Chaymi Trinidad yachachikuyqa runakunata harkʼan Diosta munakunankupaq.

Qallariy yachachikuypi Marcomanta yacharqanchis, paymi nin: “Trinidad yachachikuymi harkʼawarqan Diosman asuykunaypaq, Diospas imayna kasqanta pakashanman hinatan yuyaykuq kani, chaymi Diostaqa mana asuykunapaq mana reqsiy atinapaq hina qhawarirqani”, nispa. Biblian ichaqa nin: “Diosqa manan sapankanchismantaqa karupichu kashan”, nispa (Hechos 17:27). Jehová Diosqa sutʼitan willawanchis imayna kasqanta, chaymi Jesusqa nirqan: “Ñoqaykun ichaqa pitachus reqsisqaykuta yupaychayku”, nispa (Juan 4:22).

Marcon willakullantaq: “Sutʼitan yachachiwarqanku Diosqa mana Trinidadchu kasqanta, chaymi kunanqa Dioswan amigontin kapuni”, nispa. Sichus Jehová Diosta allinta reqsisun chayqa, manan sasachu kanqa munakunanchispaq. Biblian nin: “Mana munakuqmi ichaqa Diosta mana reqsinchu. Diosqa munakuymi”, nispa (1 Juan 4:8).

RUNAKUNA NINKU:

Catecismo de la Iglesia Católica nisqa qelqapin nin: “Hatun huchapi urmaqkunaq almanqa infiernomanmi haykunku wañupuspa, chaypin ñakʼarinku ‘wiñaypaq rawrashaq ninapi’”, nispa. Religionpi wakin umallikunan nillankutaq: “Infiernoqa Diosmanta wiñaypaq tʼaqasqa kaymi”, nispa.

BIBLIAN NIN:

‘Wañukapuqkunaqa [...] manan imatapas yachankuchu’ (Eclesiastés 9:5). Wañuqkunaqa manan imatapas sientenkuchu nitaq yuyaykunkupaschu. Chhaynaqa, ¿imaynapitaq wiñaypaq rawrashaq ninapi ñakʼarishankuman otaq Diosmanta wiñaypaq tʼaqasqa kankuman?

Bibliapi “infierno” simiqa hebreo, griego rimaymantan hamun chay simiqa huk rikchʼanachiy cheqasmantan rimashan chaymanmi yaqa llapa wañuqkuna rinku. Huk kutinmi Jobqa sinchi ñakʼarichikuq onqoywan kashaqtin Diosmanta mañakuspa nirqan: ‘Wañuypachapi pakaykuway’, nispa (Job 14:13). La Sagrada Biblia nisqan wañuypacha simita tʼikran “infierno” nispa. Jobqa manan rawrashaq infiernopi kananpaqchu mañakurqan, aswanpas aya pʼampanapin samakuyta munarqan.

¿IMARAYKUN CHAYMANTA YACHANAYKI?

Mana khuyapayakuq hinata Diosta qhawarispaqa, manan Payman asuykuyta atisunmanchu. México nacionmanta Rocío nin: “Huchʼuyniymantapachan infiernomanta yachachiwarqanku. Chaymi sinchita Diosta manchakurqani, phiñasqallata mana khuyapayakuqta hinataq qhawarirqani”, nispa.

Bibliapi Diosmanta wañuqkunamantapas yachasqanmi Rociotaqa yanaparqan manaña ñawpaqpi hinañachu Diosta qhawarinanpaq. Paymi willakun: “Chaykunata yachaspaqa thakmi sientekurqani ima llakimantapas kacharichisqa hina. Jehová Diosqa anchatan munakuwanchis payqa allinninchistan munan. Kunanqa huk munakuq taytata hinan qhawarini”, nispa (Isaías 41:13).

Askha runakunan infiernota manchakuspalla religionniyoq kanku, Diosmi ichaqa mana chayrayku servinanchistachu munan. Jesusmi nirqan: “Señor Diosniykitan munakunki tukuy sonqoykiwan”, nispa (Marcos 12:29, 30). Hinaspapas Diosqa chanillantan imatapas ruwan, chaymi confianchis hamuq tiempopi chanillanta runakunata juzgananta. Jobpa amigon Elihú hinan sonqomanta nisuman: “¡Diosqa manan haykʼaqpas mana allintaqa ruwanmanchu! ¡Tukuy-atiyniyoqqa manan haykʼaqpas mana chanintaqa ruwanmanchu!”, nispa (Job 34:10).

Jerusalén llaqtapi kashaspan Jesusqa Jehová Diosmanta willarqan, chaypin sutʼiman horqorqan religionpi umallikuna iskay uya kasqankuta (Juan 8:12-30). Chay kutipi nisqanmi rikuchiwanchis imaynatas qhawarinanchis kay tiempopi Diosmanta creesqanku yachachikuykunata. Jesusmi nirqan: “Qankunachus rimasqayta huntʼankichis chayqa, cheqaqtapunin yachachisqaykuna kankichis. Cheqaqkaqtan reqsinkichis, chay cheqaqkaqtaqmi kacharichisunkichispas”, nispa (Juan 8:31, 32).

Jesusmi nirqan: “Qankunachus rimasqayta huntʼankichis”, nispa; chay nisqanmi yanapawasun ima yachachikuypas cheqaqchus icha manachus chayta yachanapaq. Sichus pipas Diosmanta imatapas yachachinman chayqa, kaytan tupukunanchis: “¿Tupanchu Jesuspa yachachisqanwan Bibliaq yachachisqanwanpas?”, nispa. Ñawpaq tiempopi cristianokunaqa apóstol Pabloq yachachisqanta tupachirqanku Diospa Simin Qelqawan, chhaynapi cheqaqchus icha manachus kasqanta yachanankupaq, qanpas paykuna hinan ruwanayki (Hechos 17:11).

Chaytan Marco, Rosa, Raimundapas ruwarqanku. Jehová Diospa testigonkunawan Bibliata tʼaqwirqanku. ¿Imatan yacharqanku?

Marco nin: “Ñoqaman esposaymanwan Bibliamanta estudiota qowaqqa ima tapuynikutapas Bibliawanmi kutichiwaqku. Chhaynapin pisi-pisimanta Jehová Diosta munakurqayku yanapawarqankutaq astawan esposaywan hukllachakunaykupaq”, nispa.

Rosa nin: “Bibliataqa runaq yachachikuyninta hinallan qhawarirqani, chaypin runakuna yachachirqanku pichus Dios kasqanta. Ichaqa tiempoq pasasqanman hinan Bibliaqa llapa tapuyniyta kutichiwarqan. Kunanqa reqsiniñan Jehová Diosta, tukuy sonqoywantaq paypi confiani”, nispa.

Raimunda nin: “Diostan mañakurqani payta reqsinaypaq pisi tiempomantataq qosaywan kuska Biblia estudiayta qallarirqayku. Chhaynapin yacharqayku pichus Dios kasqanta, ¡maytan kusikurqayku Jehová Diosta reqsispayku!”, nispa.

Bibliaqa manan pantasqa yachachikuyllamantachu sutʼinchawanchis, willallantaqmi imaynachus Dios kasqanmanta. Hinaspapas Bibliaqa yanapawanchismi ‘sumaq sonqo-kayninpi Diospa qowasqanchis kaqkunamanta’ yachananchispaq (1 Corintios 2:12). ¿Manachu kikiykipuni tʼaqwiriwaq imatas Biblia yachachin Diosmanta, munayninmanta, hamuq tiempomantapas? Chaykunata tariwaq www.pr2711.com/es nisqapi “Enseñanzas bíblicas > Preguntas sobre la Biblia” nisqaman haykuspa. Chaypin mañakullawaqtaq Jehová Diospa testigonkunawan Bibliata estudianaykipaq. Chayta ruwaspan sutʼitan reparanki Diosta munakuyqa mana sasachu kasqanta.