Diospaq kausasunchis juñunakuypi astawan yachanapaq
7-13 MARZO
BIBLIAPI QORI JINA YACHACHIKUYKUNA | 1 SAMUEL 12, 13
“Jatunchakuq kaspaqa mana allinpin tarikusun”
w00-S 1/8 13 párr. 17
Jatunchakuq kaspaqa mana allinpin tarikusun
17 Yaqapaschá nisunman: “Saulpa ruwasqanqa allillanmi karan”, nispa. Soldadonkunaqa sinchi manchasqan kasharanku, wakinqa khatatasharankuraqmi enemigonkuq muyuykusqanta rikuspanku (1 Samuel 13:6, 7). Sinchi llakipi tarikushaspa chayta allichanapaq kallpachakuyqa allinmi. Jehová Diosmi ichaqa Saulpa imayna kasqanta qhawaran (1 Samuel 16:7). Diosqa rikuranchá Saulqa mana allin sonqoyoq kasqanta. Yaqapaschá rikuran Saulqa jatunchakuq kasqanrayku mana pacienciayoq kasqanta. Saulqa niranpaschá: “Imaynataq noqari Israelpi rey kashaspay, sasata puriq machu runata suyashanay”, nispa. Chaymantapas payqa niranchá: “Samuelqa nishutan tardamushan, chay jinaqa noqallaña jaywasaq, manaña Dios kamachiwaranchu chaypas”, nispa. Samuelqa manan kusikuranchu Saulpa ruwasqanwanqa, aswanmi payta phiñarikuspa niran: “Diosta mana kasukuq kasqaykiraykun rey-kayniyki mana unaypaqchu kanqa”, nispa (1 Samuel 13:13, 14). Jatunchakuq kasqanraykun Saulqa rey kasqanmanta wijch’uchikuran.
Jehová Diosqa munan kasukuq kananchista
8 Saulmanta Bibliaq willasqanqa yachachiwanchismi kasukuq kayta. Qallariypin rey Saulqa karan llanp’u sonqo, k’umuykukuq, ‘pisipaq qhawarikuq’ ima; pisi-pisimantan ichaqa, mana allinta yuyaykuspa hatunchakuq sonqowan imatapas ruwaran (1 Samuel 10:21, 22; 15:17). Huk kutinmi Saulqa Filistea runakunawan maqanakunan karan, ichaqa suyananraqmi karan Samuelta, paymi Jehová Diosman sacrificiota haywaspa Saulman willanan karan ima ruwananta. Samueltaq mana hamuranraqchu, Israel soldadokunapas pisi-pisimanta chinkapusharanku, chaymi Saulqa payllaña “ruphachina sacrificiota haywarqan”. Chay ruwasqanqa sinchitapunin Jehová Diosta phiñachiran. Samuel chayamuqtintaq Saulqa niran: “Mana chayamuqtiykin ñoqallaña ‘munay mana munay’ ruphachina sacrificiota haywarani Jehová Dios yanapawananpaq”, nispa. Saulpaqqa sacrificio haywaymi aswan allin karan kasukuymantaqa, chaymi Samuelta mana suyaranchu sacrificio haywananpaq. Samuelmi niran: “Waq’a hinan chayta ruwanki, Diosniyki Señor Diospa kamachisqasuykita mana kasuspayki”, nispa. Jehová Diosta mana kasukusqanrayku rey kasqanmanta qarqochikuran (1 Samuel 10:8; 13:5-13).
Maskhasun ancha allin yachachikuykunata
Jehová Diosqa munakuywanmi pusawanchis
15 ¿Yaqachu israelitakuna yuyaykunkuman karqan huk rey aswan allinta yanapananpi? Chayta yuyaykurqanku chayqa ‘yanqapaq kaqkunaq’ qhepantan risharqanku. Qhepamantaq astawanraq Satanaspa trampanman urmarqanku. Kikin reykunan idolokuna yupaychayman runakunata tanqaykurqan. Kay tiempopipas k’aspimanta, rumimanta ruwasqa dioskunapin runakunaqa astawan confianku, manan Cheqaq Diospichu. Cheqaq Diosqa tukuy imaymanatan kamarqan idolokunan ichaqa, Pabloq nisqan hina “mana imapaschu [kanku]”, nispa (1 Cor. 8:4). Arí, idolokunaqa yanqapaqmi. Chaykunaqa manan rikuwanchischu, manan uyariwanchischu, manan rimankuchu, manan imatapas ruwayta atinkuchu. Chaykunata yupaychayqa yanqapaq kaqkunaq qhepanta riy hinan, wañuymanmi apawasunmanpas (Sal. 115: 4-8).
14-20 MARZO
BIBLIAPI QORI JINA YACHACHIKUYKUNA | 1 SAMUEL 14, 15
“Aswan allinqa kasukuymi ruphachina sacrificiota jaywaymantaqa”
Jehová Diosqa munan kasukuq kananchista
4 Jehová Dios Kamaqninchistaq chayqa, ima hap’isqanchispas paypan. Chhaynaqa, ¿imapas ancha chaniyoq kanmanchu Diosman qonanchispaq? Arí. Yuyarisun Diospa nisqanta: “Churilláy, yachayniyoq kay, hinaspa sonqoyta kusirichiway, chaymi k’amiwaqniyman kutichisaq”, nispa (Proverbios 27:11). Diosmanqa qosunmanmi kasukuyninchista. Imaynapiña tarikuspapas may llaqtamantaña kaspapas Diosta kasukuspaqa Saqraq nisqantan yanqayachisun, paymi runakunamanta niran: “Sasachakuypi tarikuqtinkuqa manan Diosta kasukunqakuchu”, nispa. ¡May allinpunin Saqraq nisqanta yanqayachiyqa!
it-2-S 513 párr. 5
Kasukuq kay
Jehová Diosta manachus kasukusun chayqa, payqa manan bendeciwasunchu. Profeta Samuelmi rey Saulta niran: “Señor Diospa qayllanpi aswan allinqa kasukuymi ruphachina sacrificiota waj sacrificiotawan jaywaymantaqa. Aswan allinqa uyarikuymi, kasukuymi uywakunaq wiran ruphachinamantaqa”, nispa (1 Sam. 15:22). Jehová Diosta mana kasukuspaqa imachus nisqantan mana uyarishasunmanchu, manataqmi paypi confiashasunmanchu. Chaymi Diospaqqa mana kasukuq kayqa kaqlla layqa ruwaywan, ídolo yupaychaywanpas (1 Sam. 15:23; tupanachiy Rom. 6:16). Wakinqa uyariyllan uyarinku Diospa kamachisqanta, ichaqa manan kasukunkuchu, chayta ruwaspaqa kikinkutan engañakushanku, manataqmi Diospa bendicionninta chaskinqakuchu (Sant. 1:22-25). Diospa Churinmi sut’ita willaran runakunaq rikunallanpaq “Diostan kasukushani” niqqa Diospa gobiernonman mana jaykunanta (Mat. 7:15-23).
Maskhasun ancha allin yachachikuykunata
it-1-S 517 párr. 1
Khuyapayakuq kay
Sichus runamasinchista manchakuspa Diospa juchachasqan runakunata khuyapayasunman chayqa, llakipin tarikusunman. Chaymi rey Saulwan pasaran. Jehová Diosmi Amalec runakunata juchacharan wañuchisqa kanankupaq. Amalec runakunaqa mana imanasqallan Israel runakunawan maqanakuranku Egiptomanta lloqsimushaqtinku. Chaymi Diosqa Saulta kamachiran llapallankuta wañuchinanpaq, Saulmi ichaqa soldadonkunata kasukuspa mana Diospa llapa kamachisqantachu ruwaran. Chaymi Jehová Diosqa Saulta Israelpi rey kasqanmanta wijch’upuran (1 Sam. 15:2-24). Sichus Jehová Diosta munakusunchis, kamachikuyninkunatapas allinpaq qhawarisun chayqa, manan Saulpa ruwasqanta jinaqa ruwasunchu.
21-27 MARZO
BIBLIAPI QORI JINA YACHACHIKUYKUNA | 1 SAMUEL 16, 17
“Jehová Diosmi yanapaqninchisqa kashan”
wp16.5-S 11 párrs. 2, 3
“Jehová Diosmi yanapaqninchisqa”
Davidmi Saulman willaran imaynatachus leontapas ukumaritapas wañuchisqanta. Chayta willashaspa, ¿jatunchakusharanchu? Manan. Davidqa yacharanmi piqpa yanapayninwanchus chaykunata ruwasqanta, paymi niran: “Jaqay Filistea runaq makinmantaqa Señor Diosmi qechuwanqa, imaynan leonpa sillunmanta ukumariq sillunmantapas qechuwaran jinata”, nispa. Jinan Saulqa niran: “Chhaynaqa, riy, Señor Dios yanapasunki”, nispa (1 Samuel 17:37).
Maytan munasunman David jina allin iñiyniyoq kayta. Payqa Diospin confiaran, askha kutipi Jehová Dios payta yanapasqanrayku. Yacharanmi Jehová Diosqa serviqninkunata cuidasqanta, imachus prometesqanta junt’asqantapas. Pay jina iñiyniyoq kananchispaqqa Bibliatan estudiashanallanchis, chaypi yachasqanchisman jinataq kausananchis. Chayta ruwasunchis chayqa allinmi ima ruwasqanchispas kanqa, astawantaq Jehová Diospi confiasun (Hebreos 11:1).
wp16.5-S 11 párrs. 8, 9
“Jehová Diosmi yanapaqninchisqa”
Davidpa allin iñiyniyoq kasqantan rikuchiran. Paymi alto kunkawan Goliat-ta niran: “Qanqa jamuwanki lanzayoq, espadayoq, jabalinayoq, noqataq ichaqa tukuy-atiyniyoq Señor Diospa sutinpi jamuyki. Paymi Israel soldadokunaq Diosninqa, paykunatan qanqa: Jamuychis qhari kaspaqa, nispa nimuranki”, nispa. Davidqa manan kallpasapachu nitaq armakunayoqchu karan, ichaqa yacharanmi Jehová Dios yanapananta. Goliatqa Jehová Diostan k’amisharan, chaymi Diosqa k’amisqanman kutichimunan karan, jinan Davidqa niran: “Kay maqanakuyqa Señor Diospa munayninpin kashan”, nispa (1 Samuel 17:45-47).
Davidqa yacharanmi Goliatqa jatunkaray runa kasqanta, armakunayoq kasqantapas, chaywanpas manan manchakuranchu. Payqa manan Saúl jinachu, nitaq Saulpa soldadonkuna jinachu pay kikinta Goliatwan comparakuran. Aswanpas Goliat-tan Jehová Dioswan compararan. Goliatqa yaqa kinsa metro sayayniyoqmi karan, chaymi jujkunamanta aswan jatun karan, ichaqa payqa manan imapaschu karan tukuyta kamaq Jehová Diospa ñaupaqenpiqa. Jehová Diospaqqa ch’uspillapas kanman jinan karan, chaymi ratulla wañuchipuran.
wp16.5-S 12 párr. 4
“Jehová Diosmi yanapaqninchisqa”
Kay tiempopiqa Diosta serviqkunaqa manan guerrakunapi maqanakuqqa risunmanchu (Mateo 26:52). Chhaynaña kaqtinpas kallpachakunanchismi David jina allin iñiyniyoq kananchispaq. Rikushasunmanpas jinan Diospiqa confiananchis, payllatan servinanchispas respetananchispas. Yaqapaschá mayninpiqa sasachakuyninchista sinchi sasapaq qhawarisunman, ichaqa Jehová Diospaqqa sasachakuyninchiskunaqa manan imapaschu. Sichus Jehová Diosta servisunchis, David jinataq paypi confiasunchis chayqa, ima sasachaytapas atipasunmi. Arí, Diospa yanapayninwanqa imatapas atipasunmi.
Maskhasun ancha allin yachachikuykunata
it-2-S 975 párr. 1
Saúl
Davidta Israelpi rey kananpaq jawisqan qhepamanmi Jehová Diosqa manaña espiritunta Saulman qoranchu. Jinan chay tiempomantapacha mana allin piensasqan Saulta ñak’arichiran. Saulqa manañan Diospa espiritunta chaskiranchu, chaymi mana allin piensasqan umanpi kashallaran, chaykunataq llakichiran. Manañataq Diosta kasukuranchu chayqa, manañan Jehová Diosqa espiritunwan jark’aykuranchu mana allin piensananta, mana allinkuna ruwanantapas. Jinallatan qhawaran mana allin piensasqankuna Saulta ñak’arichinanta, chayta rikuspan jujkunaqa niranku: “Jehová Diospa mana allin espiritunmi Saulta ñak’arichishan”, nispa (1 Sam. 16:14-23; 17:15).
28 MARZO-3 ABRIL
BIBLIAPI QORI JINA YACHACHIKUYKUNA | 1 SAMUEL 18, 19
“Kusa ruwaqña kaspapas k’umuykukuqmi kananchis”
w04-S 1/4 15 párr. 4
Diosqa espiritunwanmi yanapawasun sasachaykunapi tarikuqtinchis
4 Ovejata michiq waynaqa ratullan Israel llaqtapi allin reqsisqa kapuran. Paytan wajaranku rey Saulta atiendenanpaq, paypaq musicata tocananpaqwan. Chaymantapas chay waynaqa Goliat sutiyoq jatunkaray runatan wañuchiran. Israelpi allin maqanakuq runakunapas manan Goliatwanqa maqanakuyta munarankuchu. Chaymantapas Davidqa soldadonkunawanmi Filistea runakunata atiparan. Chaymi llaqtallantin runakuna payta munakuranku takikunatapas paypaq takiranku. Chaykuna manaraq pasashaqtinpas rey Saulpa jujnin yuyaychaqninmi Davidmanta niran: “Isaipa churinmanta jujnin kanmi, arpa tocayta allinta yachaq, sumaq rimakuq, sinchi kallpayoq, maqanakuypaq kusallaña”, nispa (1 Samuel 16:18; 17:23, 24, 45-51; 18:5-7).
w18.01 28 29 párrs. 6, 7
¿Imaynan kanku Diosta serviqkuna mana serviqkunapas?
6 Wakinqa allin cuerpoyoq kaspanku, allin reqsisqa kaspanku, allin takiqpas tocaqpas kaspanku, kallpasapa kaspanku iman jatunchakuq orgullosoman tukupunku. Davidmi ichaqa kallpasapaña allin tocaqña imaymana ruwaqña karan chaypas mana orgullosochu karan. Juj kutinmi Davidqa jatunkaray kallpasapa Goliat-ta wañuchiran, chaymi Saulqa Davidta niran ususinwan casarakunanpaq. Davidmi ichaqa niran: “¿Pitaq noqari kani reypa qataynin kanaypaq? ¿Ima allintaq aylluypas Israel llaqtapi?”, nispa (1 Sam. 18:18). ¿Iman Davidta yanaparan chhayna humilde sonqo kananpaq? Payqa allintan yacharan tukuy ima yachasqanpas kallpanpas Diosmanta jamusqanta (Sal. 113:5-8). Arí, Davidqa allintan yacharan tukuy imatapas Dios qosqanta (1 Corintios 4:7 textowan tupachiy).
7 Diosta serviqkunaqa kallpachakunanchismi David jina humilde sonqo kananchispaq. Tukuy imata kamaq Diospas k’umuykuqtaq chayqa, ¿imaraykutaq noqanchisri umata oqarisunman? (Sal. 18:35). Bibliapin nin: “P’achakuychis sumaq khuyapayakuq kaywan, sumaq sonqo kaywan, k’umuykukuq kaywan, llamp’u sonqo kaywan, pacienciawan ima”, nispa (Col. 3:12). Chay consejotan noqanchisqa kasukunanchis. Yachasqanchis jina munakuq runaqa “manan alabakunchu, manan jatunchakunchu” (1 Cor. 13:4). Imaynan ‘qosaqa esposanpa allin kausasqanrayku mana ima rimapayasqalla kasukuq kanman’ chhaynan kanqa juj runakunawanpas (1 Ped. 3:1). Imaynachus kasqanchista rikuspan paykunaqa Diosman achhuykunqaku.
Maskhasun ancha allin yachachikuykunata
it-2-S 727 párr. 1
Profeta
Davidta qatikachashaqtinmi Saulqa “p’achanta ch’utikuspa Samuelpa qayllanpi profetizasharan, chaymantataq q’alalla wijch’urayaran chay p’unchayta chay tutatawan”, jinan Davidqa ayqekuyta atiran (1 Sam. 19:18–20:1). Chaywanqa manan nisunmanchu “profetakunaqa q’alallachá puriqku” nispaqa. Bibliapiqa willanmi Diospa iskay profetankuna juj tiempo jawa p’achankuta ch’utikuspa purisqankuta, Jehová Diospa profetizasqanta willanankupaq (Isa. 20:2-4; Miq. 1:8-11). Ichaqa manan willanchu imanaqtinchus Saulqa q’alalla kashasqanta, yaqapaschá Jehová Diosqa q’alallata purichiran runalla kasqanta rikuchinanpaq. Saulqa rey kashaspaqa sumaq p’achawanchá churakuran, ichaqa q’alallata purichispan rikuchisharan tukuy atiyniyoq Diospa ñaupaqenpi mana imapaschu kasqanta.
4-10 ABRIL
BIBLIAPI QORI JINA YACHACHIKUYKUNA | 1 SAMUEL 20-22
“¿Imaynatan amigonchis munakusqanchista rikuchisunman?”
Allin amigokunayoq kasun manaraq tukukuy p’unchay chayamushaqtin
18 Kay tiempopipas hermanonchiskunaqa imaymana sasachakuypin tarikushanku. Askhan sufrishanku terremotokunawan, guerrakunawan otaq juj sasachakuykunawanpas. Chhayna sasachakuypi tarikuq hermanokunatan wasinchispi chaskisunman. Jujkunapas yanapakunkuman qolqeta qospa. Llapanchistaq yanapakusunman paykunapaq Jehová Diosmanta mañakuspa. Sichus mayqen hermanonchispas pisikallpayashan chayqa, paykunawanmi tiempota pasarisunman, tukuy yuyaywan willawasqanchista uyarisunman jinaspa Bibliapi kallpachaq textokunata leepusunman (Is. 50:4). Amigonchiskuna sasachakuypi tarikuqtinkuqa paykunawanmi kashananchis (leey Proverbios 17:17).
Jehová Diospa ñanninkunapi purisun
7 Diosmi munan amigonchiskunawan hunt’aq kananchista (Proverbios 17:17). Saulpa churin Jonatanmi Davidwan sumaq amigontin karanku. Goliat-ta wañuchisqanmanta yachaspan “Jonatanqa pay kikinta hina sinchita munakapurqan” (1 Samuel 18:1, 3). Jonatanmi Davidman willaran Saúl wañuchiy munasqanmanta, David ayqekuqtintaq hukmanta tuparanku rimanakunankupaq. Saulqa yaqallan Jonatanta wañuchiran Davidman sayapakusqanrayku. Chaywanpas, Jonatanqa Davidta maskharan amigontin hina astawan hukllachakunankupaq (1 Samuel 20:24-41). Chaymantapas hukmanta maskharan ‘Diospi suyakuyninta aswanta kallpachananpaq’ (1 Samuel 23:16-18).
¿Imaynapin tukuy tiempo amigontin kasunman?
11 Hunt’aq kasunchis. Salomón niran: “Tukuy tiempon amigoqa munakun, llaki-phutiy tiempopipas wawqe hinan khuyapayakun”, nispa (Pro. 17:17). Chayta qelqaspaqa, yaqapaschá Salomonqa yuyaykusharan taytan David Rey Saulpa churin Jonatanwan amigontin kasqankupi (1 Sam. 18:1). Saulqa yuyaykusqañan paypa rantinpi Jonatán kamachikuq kananpaq, Jonatanmi ichaqa yacharanña Jehová Dios Davidta kamachikunanpaq akllasqanta. Payqa manan taytan hinachu Davidta cheqnipakuran. Manataqmi phiñakuranchu runakuna Davidta allin qhawarisqankumanta, nitaqmi kasuranchu taytan Saúl Davidmanta mana allin rimasqantapas (1 Sam. 20:24-34). ¿Jonatán hinachu kanchis? ¿Kusikunchischu amigonchiskuna Diospa llaqtanpi ancha allin llank’aykunata chaskiqtinku? ¿Ima sasachakuypi tarikuqtinkupas sumaqta khuyapayaspachu yanapanchis? ¿Imatan ruwanchis mayqen amigonchismantapas mana allinta rimaqtinku? ¿Ch’inllachu uyarinchis rimasqankuta, icha Jonatán hinachu amigonchiskunaman sayarikunchis?
Maskhasun ancha allin yachachikuykunata
w05-S 15/3 24 párr. 4
Juj kaq Samuel libromanta allin yachachikuykuna
21:12, 13. Jehová Diosqa munanmi sasachakuyninchiskunata atipanapaq allinta yuyaykuspa imatapas ruwananchista. Chaymantapas Jehová Diosqa Bibliatan qowaranchis, chayta estudiayqa yanapawasunmi yachayniyoq kananchispaq, allinta qhawarispa imatapas ruwananchispaq (Proverbios 1:4). Chaymantapas Diosqa iñiq t’aqapi umalliqkunatan qowanchis, paykunaq yanapaynintapas mañakusunmanmi allinta yuyaykuspa imatapas ruwananchispaq.
18-24 ABRIL
BIBLIAPI QORI JINA YACHACHIKUYKUNA | 1 SAMUEL 23, 24
“Pacienciawanmi suyananchis Diospa yanapayninta”
w04-S 1/4 16 párr. 8
Diosqa espiritunwanmi yanapawasun sasachaykunapi tarikuqtinchis
8 Davidqa manan Saulta wañuchiyta munaranchu. Payqa Diospin iñiran, chaymi pacienciawan suyaran Jehová Dios Saulmanta librananta. Rey Saúl qaqa t’oqomanta lloqsimusqan qhepamanmi Davidqa payta karumanta wajaspa niran: “Señor Diospuni iskayninchista chaninchachun, qanpa mana allin ruwasqaykimantataq Señor Dios ñak’arichisunki. Noqan ichaqa manapuni qan contra makiIlaytapas jaywarisaqchu”, nispa (1 Samuel 24:12). Saulqa Davidta wañuchiytaña munaran chaypas, Davidqa manan vengakuranchu, nitaq pay contra millayta rimaranchu. Juj kutikunapipas Davidqa atiranmi Saulmanta vengakuyta, ichaqa Jehová Diosmanmi chayta saqeran (1 Samuel 25:32-34; 26:10, 11).
w04-S 1/6 22 párrs. 5, 6
¿Sasachakuypi tarikusqanchisraykuchu pisikallpayananchis?
Chaymantapas Diosta serviqkunaqa manan sasachakuyninchista allichananchisraykuqa Diospa kamachisqan contraqa ruwananchischu, aswanpas Jehová Dios yanapawananchispin confiananchis. Santiagon qelqaran: “Imaymanata aguantaspan qankunaqa allin preparasqa kankichis, chhaynapi tukuy imapipas junt’asqa kanaykichispaq, allinpuni kanaykichispaqwan, arí, mana imapas faltanasuykichispaq”, nispa (Santiago 1:4). Aguantasqanchispi junt’asqa kasqanchista rikuchinapaqqa manan sasachakuymanta librakunanchisraykuqa Diospa kamachisqan contraqa ruwananchischu. Jinan iñiyninchisqa probasqa kaspa aswan allin kapunqa. Josepas Davidpas sasachakuyninkunata aguantaspan rikuchiranku allin iñiyniyoq kasqankuta. Manataqmi Diospa kamachisqan contraqa ruwarankuchu, aswanpas Jehová Diospin confiaranku, jinan Diosqa paykunata allinta bendeciran, Paykunawantaq llaqtanta salvaranpas pusariranpas (Génesis 41:39-41; 45:5; 2 Samuel 5:4, 5).
Yaqapaschá noqanchispas sasachakuykunapi tarikuspa, chaykunamanta librakunanchispaq tentasqa kasunman Diospa kamachisqan contrapi ruwananchispaq. Wakinninchisqa llakisqapaschá kashankichis Diospa llaqtanpi parejata mana tarisqaykichismanta. Chay jina kaqtinqa tentasqan kawaqchis Señorpi iñiqllawan casarakuymanta kamachikuyta mana kasunaykichispaq, chaymi allinta cuidakunaykichis (1 Corintios 7:39). Chaymantapas wakinqa yaqapaschá qosanwan otaq esposanwan mana allintachu kausashanku. Chhaynapi tarikuspaqa manan Diosta mana serviq runakuna jinachu t’aqanakuypi piensananku, aswanpas chay sasachakuyninkuta allichaypin piensananku (Malaquías 2:16; Efesios 5:21-33). Chaymantapas wakinniykichisqa llakisqapaschá kashankichis familiaykichista uywanaykichispaq qolqeykichis mana aypasqasuykichismanta. Diospi confiaspan ichaqa mana cheqnikusqan llank’anakunapi llank’ankichischu nitaq mana allin negociokunapipas (Salmos 37:25; Hebreos 13:18). Chhaynaqa, llapanchismi kallpachakunanchis sasachakuykunata aguantananchispaq, jinan Jehová Diosqa bendeciwasun. Sichus mana iskayaspa confiasun Jehová Dios yanapawananchispi chayqa, payqa allintan yanapawasun (Miqueas 7:7).
Maskhasun ancha allin yachachikuykunata
Ama premionchistaqa imawanpas qechuchikusunchu
11 Sichus kallpachakusun munakuq sumaq sonqo kananchispaq chayqa manan pimantapas envidiakusunchu. Biblian nin: “Pipas munakuqqa pacienciakuqmi, sumaq sonqon. Pipas munakuqqa manan envidiakunchu”, nispa (1 Cor. 13:4). Envidiakuy sonqonchispi mana wiñananpaqqa Jehová Dios jinan imatapas qhawarinanchis. Chaymantapas Diospa llaqtanpiqa llapanchismi juj cuerpolla kanchis. Chaymi pipas ‘jatunchasqa kaqtinqa, llapanchis paywan kuska kusikunanchis’ (1 Cor. 12:16-18, 26). Arí, pipas ima privilegiotapas chaskiqtinqa manan envidiakunanchischu aswanmi paywan kuska kusikunanchis. Yuyarisun Jonatanta, payqa manan envidiakuranchu Davidmanta, aswanmi payqa munakuywan sumaq sonqo kaywan ima Davidta yanaparan (1 Sam. 23:16-18). Noqanchisri, ¿atisunmanchu pay jina kayta?
25 ABRIL-1 MAYO
BIBLIAPI QORI JINA YACHACHIKUYKUNA | 1 SAMUEL 25, 26
“¿Mana allinta piensaykuspachu imatapas ruwanki?”
Allin yuyayniyoq warmi
10 ¿Imaynatan Davidpa soldadonkuna chay michiqkunata trataqku? Paykunaqa manan ovejakunatachu qechuqku aswanpas chay mana manchakuq soldadokunaqa huk qaqa hinan karqanku Nabalpa michiqninkunata pakaykunankupaq (leey 1 Samuel 25:15, 16). Chay michiqkunaqa imaymana sasachakuykunapin tarikuqku, paykunaqa michirqanku Israel llaqtawan tuparinapin chaymi kaqpuni wak llaqtamanta suwakuna, hinaspapas chayneqkunapin kasharqan askha salqa animalkunapas.
11 Davidpaqqa sasachá karqan chhaytukuy runankunaman chay ch’inneqpi mikhuchiyqa. Chayraykun chunka soldadonkunata kachanman karqan Nabalmanta yanapayta mañakamunankupaq. Davidqa allintan qhawarirqan imay ratopi rinankupaq, ovejakunaq millman rutuypin kasharqanku chay p’unchaykunapiqa askhan mikhuna kaq, runakunapas kusisqan kaqku qoykukuqtaq kanpas. Hinaspapas allintan yuyaykurqan sumaq simikunawan yanapayta Nabalmanta mañakamunankupaq. Huk taytata hina qhawarispan “churiyki hinan kani” nispa nimunankupaq kacharqan, yaqapaschá chaytaqa nichimurqan kurakña kasqanrayku. Ichaqa, ¿imaynatan chayta Nabal qhawarirqan? (1 Sam. 25:5-8.)
12 Sinchitan phiñakurqan. Abigailman willaq wayna nisqan hina Nabalqa ‘millayta phiñarikuspan kutichirqan’. Nabalpaqqa qatiykachasqa kamachillan karqan Davidqa, manapunin munarqanchu t’antantapas, ununtapas, aychantapas qoykuyta. Chaymantapas mana valeqpaq hina qhawarispan astawanraq pisichapurqan. Yaqapaschá Nabalqa Saúl hinaraq Davidta cheqnikurqan. Kay runakunaqa manan repararqankuchu Diosqa anchata Davidta munakusqanta, payqa manan rey contra sayariq kamachita hinachu qhawarirqan aswanpas Israelpa qhepa reyninta hinan (1 Sam. 25:10, 11, 14).
Allin yuyayniyoq warmi
18 Ñawpaqtaqa manan pakanchu Nabalpa pantasqanta, hinan Davidta mañakun pampachananpaq. Chaymantapas nillantaqmi qosanqa mana yuyayniyoq kasqanta imayna sutinpa nisqan hina. Yaqapaschá chaywanqa Davidman entiendechiyta munan Nabalta wañuchiyqa yanqa kasqanta. Hinaspapas Davidtan nin ‘Diosrayku maqanakuq kasqanta’ chaywanmi rikuchin Diospa churasqan kasqanta. Yachallantaqmi Davidqa qhepaman rey kananta, ninmi Diosqa ‘Israelpi umallita churananta’. Chaymantapas nillantaqmi runaq yawarninwan ama huchallikunanpaq chayta ruwaspaqa qhepakunamanmi pesapakunman (leey 1 Samuel 25:24-31). Abigailqa sonqoman chayaqtan rimarqan allin yuyaywan ima.
Maskhasun ancha allin yachachikuykunata
Allin yuyayniyoq warmi
16 Chhaynaqa, ¿nisunmanchu “chay ruwasqanwanmi Abigailqa qosanta mana respetanchu” nispa? Manan. Nabalqa Diospa akllasqan reytan millayta pisicharqan chaymi wasinpi llapa qharikuna wañuy patapi tarikushanku. Sichus Abigail hinalla qhepakunman chayqa, paypas Nabal hinan pisillapipas huchayoq kanman. Abigailqa yachanmi kay kutipiqa mana qosantachu kasunan kasqanta, aswanpas Diosta.