¿Yuyarishankichu?

¿Yuyashankichu kay watapaq Qhawaq qelqanchiskunapi yachachikuykunata? Chayta yachanaykipaq kaypi tapuykunata kutichiy:

¿Ima bendicionkunatan chaskisun Jehová Diosta allinta reqsispa, rimapayawasqanchista uyarispa, paypi piensaspapas?

Allintan imatapas decidisun, allin yachachiq kasun, iñiyninchispas astawanmi yapakunqa (w22.01, páginas 30, 31).

¿Imaraykun Jehová Diospipas llaqtanta pusariq hermanonchiskunapipas confiananchis?

Kunanmantañan Jehová Diospa imachus ruwasqanpiqa confiananchis. Chayta ruwasunchis chayqa manan iskayasunchu Diospa llaqtanta pusariq hermanokunamantaqa, ima kamachikuykuna qowasqanchistapas usqhayllan kasukusun. Manchay ñak’ariy tiempopipas usqhayllan paykunata kasukusun (w22.02, páginas 4-6).

¿Imaraykun juj angél Zacariasta nirqan: “Zorobabeltan plomada jap’ishaqta rikunki”, nispa? (Zac. 4:8-10).

Chaywanmi Jehová Diosqa llaqtanta nirqan wasinta jatarichiyta tukunankuta, jinaspapas chay wasi sonqonpaq jina ruwasqa kananta (w22.03, páginas 16, 17).

¿Imakunan yanapawasunman rimasqanchispi allin ejemplo kananchispaq? (1 Tim. 4:12).

Kallpachakunanchismi Diosmanta willashaspa sumaq sonqo respetoyoq kananchispaq, jinaspapas tukuy sonqowanmi juñunakuykunapi takinanchis tapuykunamanpas kutichinanchis. Chaymantapas sut’illantan rimananchis, jujkunata kallpachanapaq jinataqmi rimananchispas (w22.04, páginas 6-9).

¿Imaraykun Apocalipsis 13:1, 2 textopi willasqan phiña animal tupan Daniel 7 capitulopi willasqan phiña animalkunawan otaq gobiernokunawan?

Apocalipsis 13 capitulopi willasqan phiña animalqa manan juj gobiernollamantachu rimashan aswanpas kay pachapi kamachikuq llapa gobiernokunamantan rimashan (w22.05, página 9).

¿Imaynatan rikuchinchis Jehová Diosqa chaninta imatapas uwasqanta?

Pipas mana chaninta ruwawarqanchis otaq mana allinta noqanchismanta rimarqanku chayqa manan usqhayllachu phiñakunanchis, aswanpas chaykunataqa Jehová Diospa makinmanmi saqenanchis. Paymi chaykunataqa llapanta allichanqa (w22.06, páginas 10, 11).

¿Imakunamantan juj hermano juñunakuykunapi mañakunan?

Juñunakuypi mañakuq hermanoqa manan hermanokunatachu yuyaychanan, nitaq iñiq t’aqapi imaynas imapas ruwakunantachu willanan. Chaymantapas mañakuspaqa manan askhatachu rimanan (Mat. 6:7) (w22.07, página 24, 25).

¿Imaynapin “millay kaqkunata ruwaqkuna” juzgasqa kanankupaq kausarimunqaku? (Juan 5:29).

Jehová Diosqa manan paykunataqa ñaupaqpi mana allinta ruwasqankumantachu juzganqa. Aswanpas juj tiempotan qonqa mana allin ruwasqankuta saqespa cambianankupaq. Chaymantañan Jehová Diosqa paykunata imachus ruwasqankuman jina juzganqa (w22.09, página 18).

¿Ima nirqanmi Joseph Rutherford iñiqmasinchis 1922 watapi juj asamblea aparikushaqtin?

Cedar Point llaqtapin juj asambleapi hermanonchis Joseph Rutherford nirqan: “¡Yachaychis, Reyqa kamachikushanñan! Qankunan paymantaqa willamunaykichis. Chhaynaqa, willaychis, willaychis, willaychis Reymanta gobiernonmantawan”, nispa (w22.10, páginas 3-5).

Isaías 30 capítulo nisqan jina, ¿ima kinsa ruwaykunawanmi Jehová Dios yanapawanchis aguantananchispaq?

Payqa tukuy yuyaymi mañakusqanchista uyarin, jinaspapas tiempollanpin mañakusqanchisman kutichimuwanchis, kunanpas jamuq tiempopipas bendicionnintan qoykuwasunchis (w22.11, página 9).

¿Imaraykun yachanchis Salmos 37:10, 11, 29 textoq nisqan ñaupa tiempopi junt’akusqanta jamuq tiempopipas jujmanta junt’akunanta?

Davidmi chay textopi willakun Israel llaqtapi sumaq thaj kausay kasqanmanta. Chhayna kausaymi Salomonpa tiemponpipas karqan. Chayraykun Jesusqa paraisomanta rimaspa 11 versiculomanta rimarqan (Mat. 5:5; Luc. 23:43) (w22.12, páginas 8-10, 14).