55 YACHACHIKUY
Kallpachakuy iñiq t’aqapi astawan yanapakunaykipaq
Jehová Diospa testigonkunaqa pachantinpin kusisqa Jehová Diosta servishanku. Paykunaqa kallpachakunkun Diospa llaqtanpi llapa kamachikuykunata kasukunankupaq. Chaymantapas sapanka iñiq t’aqapin imaymana ruwaykunapi kusisqa yanapakushanku. ¿Chhayna kusisqachu qanpas tarikunki?
1. ¿Ima ruwaykunapin yanapakuwaq?
Llapanchismi imaymanapi yanapakuyta atisunman. Risqayki iñiq t’aqapi kashan kuraq hermanokuna, onqosqa hermanokunapas chayqa, ¿atiwaqchu paykunata juñunakuykunaman pusariyta? Yaqapaschá mercadota rantiq ima ripusunman, wasinpi imapas allichana kashan chayta ima allichapusunman (leey Santiago 1:27). Chaymantapas yanapakusunmanmi juñunakuna wasi limpiaypi allichaypipas. Chaykunataqa noqallanchismatan ruwananchis, chaykunata ruwaspan Jehová Diostapas iñiqmasinchiskunatapas munakusqanchista rikuchishanchis (Salmos 110:3).
Bautizasqaña kashanchis chayqa atisunmanmi astawanraq yanapakuyta. Qhari hermanonchiskunaqa atinkumanmi yanapakuq qhari kayta, tiempowantaq umalliq kayta. Chaymantapas llapanchismi atisunman precursor kayta, chhaynapi astawan Diosmanta willananchispaq. Wakin hermanokunaqa juñunakuna wasi jatarichiypi iman yanapakunku, wakintaq juj ladokunaman astakunku chaypi kaq iñiq t’aqakunapi yanapakunankupaq. Qanpas atispaqa chaykunatapas ruwawaqmi.
2. ¿Imaynatan qolqenchiswan imanchiswanpas yanapakusunman?
Biblian nin: “Valorniyoq kaqniykikunawan Jehová Diosta jatunchay”, nispa (Proverbios 3:9). Llapanchismi atisunman qolqenchiswan imanchiswanpas yanapakuyta chhaynapi iñiq t’aqapi gastokunata pagakunanpaq, pachantinpi allin willakuykuna willay aparikunanpaqpas (leey 2 Corintios 9:7). Chaymantapas chaykunawanmi sasachakuykunapi tarikuq hermanonchiskunata yanapakun. Chayraykun wakin hermanonchiskunaqa atisqankuman jina qolqechankuta “t’aqanku” chaywan yanapakunankupaq (leey 1 Corintios 16:2). Chaytaqa yaqapaschá churasunman juñunakuna wasipi qolqe churana cajachaman, atispataq donate.jw.org. nisqanta apachisunman. Chayta ruwaspaqa kamaqninchis Jehová Diosta munakusqanchistan rikuchishanchis.
ASTAWAN YACHASUNCHIS
Kunanqa yachasun imakunata ruwaspas iñiq t’aqapi yanapakullasunmantaq chayta.
3. Kaqninchiskunawan yanapakusun
Jehová Diospas Jesuspas kusisqa qoq runakunatan munakunku. Juj wajcha viudaq qolqe churasqantapas ancha allinpaqmi Jesusqa qhawarirqan. Leeychis Lucas 21:1-4 textota, jinaspa jamuq tapuykunaman jina parlariychis:
¿Askhatachu qolqeta churana Jehová Dios kusisqa kananpaq?
¿Imaynatan Jehová Diospas Jesuspas qhawarinku sonqomanta qolqe churasqanchista?
¿Imakunapin qolqe churasqanchis gastakun? Chayta yachanapaq VIDEOTA qhawaychis, jinaspa jamuq tapuyman jina parlariychis:
¿Imakunatan qolqe churasqanchiswan Diospa llaqtanpi ruwakun?
4. Juj ruwaykunapipas yanapakusun
Ñaupa tiempopi Jehová Diosta serviq runakunaqa manan qolqellawanchu yanapakuqku, Diospa wasinta allichaypipas yanapakuqkun. Leeychis 2 Crónicas 34:9-11 textota, jinaspa jamuq tapuyman jina parlariychis:
¿Imakunatan Israel runakuna ruwarqanku “Diospa wasinta” allinta munayta jap’inankupaq?
Imaynatas Jehová Diospa testigonkuna chay ejemplota qatikunku chayta yachanaykipaq VIDEOTA qhawaychis, jinaspa jamuq tapuykunaman jina parlariychis:
¿Imaraykun juñunakunanchis wasita limpiota, allin allichasqata jap’inanchis?
¿Imakunata ruwaspan yanapakuwaq?
5. Hermanokunaqa atinkumanmi astawan yanapakuyta
Bibliapin qhari hermanokunata kallpachashan iñiyninkupi astawan wiñarinankupaq, chhaynapi iñiq t’aqapi astawan yanapakunankupaq. Imaynatas juj hermano chayta ruwarqan chaypaq VIDEOTA qhawaychis, jinaspa jamuq tapuyman jina parlariychis:
¿Imakunatan hermanonchis Marco ruwarqan iñiyninpi astawan wiñarinanpaq, iñiq t’aqapipas astawan yanapakunanpaq?
Bibliapin willashan imakunatas qhari hermanokuna ruwananku yanapakuq qhari kanankupaq, umalliq kanankupaqpas chayta. Leeychis 1 Timoteo 3:1-13 textota, jinaspa jamuq tapuykunaman jina parlariychis:
¿Imayna runakunan kananku yanapakuq kayta umalliq kaytapas munaq hermanokuna?
¿Imayna runakunan kananku esposanpas wawankupas? (Qhawaychis 4, 11 versiculokunata).
Hermanokuna kallpachakunqaku Bibliaq nisqanta kasukunankupaq chayqa, ¿imaynan iñiq t’aqapi hermanokuna kanqaku?
WAKIN RUNAKUNAN NINKU: “¿Maymantataq Jehová Diospa testigonkunari qolqeta orqonku?”, nispa.
¿Imanispan niwaq pipas chhaynata tapusuqtiyki?
IMATAN YACHAMURQANCHIS
Jehová Diosqa anchatan kusikun tiemponchiswan, kallpanchiswan, kaqninchiskunawan ima iñiq t’aqapi yanapakusqanchista rikuspa.
Yuyarisun
¿Imaynatan iñiq t’aqapi tiemponchiswan kallpanchiswan ima yanapakusunman?
¿Imaynatan kaqninchiskunawan yanapakusunman?
¿Imakunata ruwaspan yanapakuyta munawaq?
ASTAWAN YACHANAYKIPAQ
Kaypin yachanki imaraykus Jehová Diospa testigonkuna mana diezmota churankuchu chayta.
Biblian kamachin bautizasqa hermanokunata iñiq tˈaqapi wakin ruwaykunata ruwanankupaq. Ichaqa, ¿iman kanman qhariq ruwananta bautizasqa hermana ruwanan kaqtin?
“Imaynatan Diospa churasqan umalliqkunata qhawarinanchis” (Qhawaq, 2021 watapi febrero killa)
Qhaway imakunatas wakin hermanokuna ruwanku karu llaqtapi tiyaq hermanokunaman qelqakunata chayachinankupaq chayta.
¿Imaynatan Congo nacionpi iñiqmasinchiskunaman chayachikun qelqanchiskunata? (4:25)
Kaypin yachanki ima qolqewansi Jehová Diospa testigonkuna allin willakuykunata pachantinpi aparishanku chayta.