¿Imatan ruwanay Jehová Diospa testigon kanaypaq?

Mateo 28:19, 20 textopin Jesús willaran imatas ruwana Jehová Diospa testigon kanapaq chayta. Chay textoq nisqan jina, Jesuspa qatikuqnin o discipulon kanapaqqa imaymanakunatan ruwana, astawanqa Jehová Diosmantan rimana.

Ñaupaqtaqa Bibliatan estudiana. Jesuspunin chayta ruwanapaqqa kamachiran, niranmi: “Llapa nacionmanta runakunaman riychis, jinaspa yachachimuychis discipuloykuna kanankupaq, [...] qankunaman llapa kamachisqaykunata paykunaman yachachimuychis”, nispa (Mateo 28:19, 20). Chhaynaqa pipas Jesuspa discipulon o qatikuqnin kananpaqqa yachachisqan kanan. Allin kausayta sumaq kausayta munanki chayqa, Bibliatan estudianayki, astawanqa Jesuspa yachachisqan partekunata, chaykunapin sumaq yanapaykuna kashan (2 Timoteo 3:16, 17). Munanki chayqa may kusisqan noqaykuqa gratislla Bibliamanta yachachisaykiku (Mateo 10:7, 8; 1 Tesalonicenses 2:13).

Imachus yachasqanchisman jinan kausana. Jesuspa nisqan jina discipulonkunaqa manan yachanallankuchu, aswanpas imachus yachasqankuman jinan kausananku (Mateo 28:20). Chhaynaqa manan yachayllachu yachana imatapas, aswanpas imachus yachasqanchisman jinan kausananchis, chaymi ima piensayninchispas o ruwayninchispas cambiana kaqtinqa apuray chayta cambiananchis (Hechos 10:42; Efesios 4:22-29; Hebreos 10:24, 25). Pipas Jesuspa kamachisqanta kasukuqqa payllamantan allinta piensaykuspa Jesusta qatikuyta munanqa, chhaynapitaq Jehová Diosman entregakapunqa (Mateo 16:24).

Chaymantataq bautizakuna. Jesuspa discipulon kanapaqqa bautizakunan (Mateo 28:19). Bibliapiqa wañuywanmi bautizakuytaqa comparakun (Romanos 6:2-4). ¿Imaynataq chayri? Bautizakuspaqa ñaupaq kausayninchista p’ampapuspapas wajmanta nacemushasunman jinan. Chaymi bautizakunapaqqa chay ñaupaq iskay yachamusqanchiskunata junt’ana, Diosmantataq mañakuna ch’uya concienciata, chayraqmi pipas bautizakuytaqa atinman (Hebreos 9:14; 1 Pedro 3:21).

¿Imaynatan yachayman bautizakunaypaq listoñachu kashani icha manaraqchus chayta?

Bautizakuyta munaspaqa iñiq t’aqapi umallikunaman willakuy, paykunan qanwan rimanqa. Chaypin paykunaqa qhawarinqaku allintañachus Bibliata entiendeshanki icha manaraqchus chayta, chaymantapas qhawarillanqakutaqmi ñachus chaypi yachasqaykiman jinaña kausashanki icha manaraqchus chayta, qanllamantachus Diosta serviyta munashanki icha manachus chaytapas (Hechos 20:28; 1 Pedro 5:1-3).

¿Chaykunaman jinachu Testigokunaq wawankunapas bautizakunku?

Arí, chaykunaman jinan bautizakunanku. Llapa Testigokunapas “Jehová Diospa nisqanman jina wanachispa, yachachispa” iman wawaykutaqa uywayku (Efesios 6:4). Chaywanpas wiñaspankuqa paykuna kikinkumantan Bibliata estudiananku kanqa, chayman jinataq kausanankupas kanqa, chaykunata ruwaspañan bautizakuytapas atinkuman (Romanos 12:2). Chhaynaqa sapankamantan pipas Jehová Diosta servinqachus icha manachus chayqa (Romanos 14:12; Gálatas 6:5).