Jesús ñausakunata qhaliyachin, Zaqueota yanapan

Jesusmi qatikuqninkunapiwan Jericó llaqtaman chayaranku, chayqa juj p’unchay puriypi jinan kasharan Jerusalén llaqtamantaqa. Chay tiempopiqa iskay llaqtan karan “Jericó” nisqa, cerca-cercallan karan chay llaqtakunaqa. Jujnin kaq Jericó llaqtaman Jesús chayamushaqtinmi iskay ñausakuna uyariranku askha runakuna jamushasqanta. Chay ñausakunamanta jujninmi karan Bartimeo sutiyoq.

Jesús chayninta pasashaqtinmi chay ñausakunaqa kallpawan wajakuranku: “¡Davidpa Churin Señor, khuyapayaykuwayku!”, nispa (Mateo 20:30). Wakin runakunataq chay ñausakunata phiñarikuranku upallanankupaq, paykunan ichaqa astawanraq wajakusharanku. Chayta uyarispan Jesusqa sayaykuran, jinaspa wakin runakunawan wajachimuran, chay runakunataq jujnin ñausata niranku: “¡Kallpachakuy! Sayariy, wajamushasunkin”, nispa (Marcos 10:49). Jinan chay ñausaqa jawa p’achantapas wijch’usparaq sayariruspa usqhaylla Jesusman riran, juj kaq ñausapas riranmi.

“¿Ima ruwapunaytan munankichis?” nispa Jesús tapuqtinmi chay ñausakunaqa niranku: “Señor, ñawiykuta kichariwayku”, nispa (Mateo 20:32, 33). Jesustaq anchata khuyapayaspa ñawinkuta llamiykuspa jujnin ñausata niran: “Phaway ripuy, iñiyniykin qhaliyachisunki”, nispa (Marcos 10:52). Jinan iskaynin ñausakuna qhawaripuranku, jinaspa Diosta jatunchayta qallariranku, runakunapas chayta rikuspan Diosta jatunchallarankutaq. Jinan iskayninku Jesusta qatikuranku.

Ancha askha runakunan Jesuswanqa purisharanku Jericó llaqtanta. Llapankuchá Jesustaqa rikuyta munasharanku chay ñausakunata qhaliyachisqanrayku. Ichaqa, askha runakuna kasqanraykun wakinqa mana rikuytapas atirankuchu. Chaypin kasharan Zaqueo sutiyoq impuesto cobraq runapas. Payqa taqsalla kasqanraykun mana rikuyta atiranchu, chaymi ñaupaqman phawaspa juj sach’aman seqaran chaymanta Jesusta rikunanpaq. Chayninta pasashaspan Jesusqa payta niran: “Zaqueo, usqhaylla uraykamuy, kunan p’unchaymi wasiykipi qhepakunay”, nispa (Lucas 19:5). Jinan Zaqueoqa uraykamuspa usqhaylla wasinta riran chaypi Jesusta chaskinanpaq.

Zaqueoqa impuesto pagaqkunamanta qolqeta qechuspan qhapaqman tukupusqa, chaymi runakunaqa mana allinpaqchu qhawariranku chay “juchasapa” runaq wasinman Jesús rishasqanta.

Chay wasiman Jesús jaykuqtinmi runakunaqa rimapakuranku: “¿Maypis kunan juchasapa runaq wasinman jaykunman?”, nispa. Jesusmi ichaqa Zaqueota rikuran Diosman kutirikuqpaq jina. Jinan Zaqueoqa sayarispa Jesusta niran: “Señor, ima kaqniykunamantapas kuskantan wajchakunaman qopusaq, pimantachus qolqenta qechurani chaymanpas tawa kutitawanraqmi kutichipusaq”, nispa (Lucas 19:7, 8).

Zaqueoqa cheqaqtapunin Diosman kutirikusharan. Chaymi qolqe qechusqan runakunamanpas tawa kutitawanraq kutichipunan karan, chayqa Diospa kamachikuyninman jina kutichipuna kaqmantapas aswan askharaqmi karan (Éxodo 22:1; Levítico 6:2-5). Chaymantapas payqa qelqankunata qhawaspaqa yacharanchá pikunamantachus qolqeta qechuran chayta. Jinaspapas payqa llapan kaqninkunamanta kuskannintan wajchakunaman qonan karan.

Jinan Jesusqa Zaqueoq chay nisqanwan kusikuspa niran: “Kunan p’unchaymi kay wasiman salvación chayamun, kay runapas Abrahanpa wawan kasqanrayku. Runaq Churinqa chinkasqakunata maskhaspa salvaqmi jamun”, nispa (Lucas 19:9, 10).

Manaraqmi unaychu pasaran Jesús chinkasqa churimanta yachachisqanmantaqa (Lucas 15:11-24). Payqa anchatan llakikuran chinkasqa kaqkunamanta. Zaqueoqa chay chinkasqa churi jinan karan, Jesuspa yanapayninwanmi ichaqa tarisqa kapuran. Pay jina Abrahanpa chinkasqa wawankunatan Jesusqa tukuy sonqowan maskhanan karan, jinaña religionpi umallikuna, paykunata qatikuq runakunapas rimapakunanku karan chaypas.