2. ¿Imaynan kay pachapi kausay kashan 1914 watamantapacha?

Juj kutinmi discipulonkuna Jesusta tapurqanku: “¿Ima señalmi kanqa chayamusqayki tiempoña kashaqtin, kay tiempopas tukukapunanpaqña kashaqtin?”, nispa (Mateo 24:3). Jesusqa imaymanakuna pasanantan paykunaman willarqan, chaykunaqa kamachikuyta qallarisqan qhepamanmi pasanan karqan. Guerrakuna, yarqaykuna, terremotokuna kananmanta iman willarqan (leey Mateo 24:7). Chaymantapas Bibliaq nisqanman jinaqa “tukukuy p’unchaykunapi” runakunaqa millaytan kausananku karqan, “manchakuy sinchi sasa tiempokunan” kanan karqan (2 Timoteo 3:1-5). 1914 watamantapachan chhayna kausayqa astawanraq yapakushan.

3. ¿Imaraykun Diospa churasqan gobierno kamachikusqanmantapacha aswan millayman kausay tukupushan?

Jesús kamachikuyta qallariqtin jinan janaq pachapi guerra karqan, Jesusmi Satanaswan supaykunawan ima maqanakurqan. Chaypin Jesusqa paykunata atiparqan, jinan Satanasqa “jallp’a pachaman wijch’uykamusqa karqan, angelninkunapas paywan kuskan wijch’uykamusqa karqanku” (Apocalipsis 12:9, 10, 12). Satanaspas supayninkunapas sinchi phiñasqan kashanku. Paykunaqa yachankun pisillaña tiemponku kasqanta, chaymi kay pachapi millay kausayta q’oñirichishanku, chaywanmi llakikuypas nanaypas astawanraq yapakushan. Ichaqa Diospa gobiernonmi chaykunata chinkachipunqa.