“Cheqaqtapunimá kay runaqa Diospa Churin kasqa”

Las doce jinañan kasharan. Chayllamanmi “lliu chay lado tutayaran las tres jina tardekama” (Marcos 15:33). Chay tutayayqa manan “eclipse” ninku chaychu karan. “Eclipse” nisqakunaqa mosoq killa kallaqtinmi pasan. Jesusta warkusqanku p’unchaymi ichaqa pura killa p’unchaykuna karan. Chaymantapas eclipsekunaqa iskay kinsa minutollan duran, chay tutayaymi ichaqa kinsa hora jina karan. Chhaynaqa Diospunin chaytaqa ruwachinman karan.

Chayta rikuspaqa mancharikurankuchá Jesusta asipayaqkunaqa. Chhayna tutayaq kashaqtinmi tawa warmikuna Jesuspa kasqanman achhuykuranku, paykunan karanku: Jesuspa maman María, Salomé, María Magdalena, sullk’a kaq Santiagoq maman María ima.

Apóstol Juanpas Jesuspa mamanwan kuskan kasharan ‘Jesusta clavasqanku k’aspiq ladonpi’. Mariaqa maytachá llakikuran munasqa wawanta k’aspipi ñak’arishaqta rikuspaqa. Paypaqqa juj jatun espadapas sonqonta k’irishanman jinachá chayqa karan (Juan 19:25; Lucas 2:35). Jinan Jesusqa mamanta Juantawan rikuspa mamanta niran: “Mamáy, kunanmantaqa paymi wawayki kanqa”, nispa. Juantapas nillarantaqmi: “Kunanmantaqa paymi mamayki kanqa”, nispa (Juan 19:26, 27).

Chhaynatan Jesusqa munasqa apostolnin Juanman mamanta encargasharan. Mariaqa viudañan chay tiempopaqqa kanman karan, wakin wawankunapas manaraqmi Jesuspi iñirankuchu. Chaymi Jesusqa Juanman encargaran mamanta qhawaripunanpaq, Dios serviyninpipas yanapananpaqwan. Chaywanmi Jesusqa allin ejemplota saqesharan llapa paypi iñiqkunapaq.

Chay tutayay pasayta jinan Jesusqa niran: “Ch’akiwashanmi”, nispa. Chhaynapin juj profeciata junt’aran (Juan 19:28; Salmo 22:15). Diosqa manan Jesusta chay ñak’ariymanta salvananchu karan, chhaynapi wañunankama probasqa kananpaq. Chayta yachaspan Jesusqa fuerteta wajakuran: “Eli, Eli, ¿lama sabajtani?”, nispa; chayqa “Diosníy, Diosníy, ¿imaraykun saqerpariwanki?” ninantan nin. Chayta uyarispan wakin runakunaqa niranku: “¡Uyariychis! Eliastan wajashan”, nispa. Jinan paykunamanta jujninku phawarispa juj esponjata p’osqo vinoman challpuran, soqosman churaykuspataq chayta ch’onqananpaq jaywaran. Jinan jujkunaqa niranku: “¡Jinalla kachun! Qhawallasunchis, jamunqapaschá Elías k’aspimanta payta uraykachiq”, nispa (Marcos 15:34-36).

Jesusqa llapantan junt’aran Diospa kamachikusqanwan, chaymi niran: “¡Junt’akunñan!”, nispa (Juan 19:30). Chaymantataq niran: “Yayáy, makiykimanmi vidayta jap’ichiyki”, nispa (Lucas 23:46). Jesusqa allintan yacharan wañuymanta kausarichisqa kananta, chaymi Diospi tukuy sonqo confiaspa chayta niran. Chayta nispataq wañupuran.

Jinan juj jatun terremoto pasaran, chaywanmi qaqakunapas ch’eqtakuran, sepulturakunapi ayakunapas jawamanraqmi wijch’umusqa karan. Chayta rikuq runakunataq Jerusalén llaqtaman jaykuspa imachus rikusqankuta willakuranku (Mateo 12:11; 27:51-53).

Jesús wañupuqtinqa templopi “ch’uyay-ch’uya” nisqa parteman jaykunata jark’aq jatunkaray cortinapas iskaymanmi llik’ikuran wichaymanta urayman. Chaywanmi Diosqa rikuchisharan wawanta wañuchiqkunapaq sinchi phiñasqa kashasqanta. Chay ch’uyay-ch’uya parten representaran janaq pachata, chaymi chay cortinaq llik’ikusqanqa rikuchiran chayman jaykunapaq ñanqa kichasqaña kashasqanta (Hebreos 9:2, 3; 10:19, 20).

Chaykuna pasasqanwanmi runakunaqa sinchita mancharikuranku. Chaychá Jesuspa qayllanpi sayashaq ejercitopi capitanpas niran: “Cheqaqtapunimá kay runaqa Diospa Churin kasqa”, nispa (Marcos 15:39). Payqa uyariranchá Pilatoq ñaupanpi Jesusta juchachaqkuna imatachus nisqankuta. Chaypin paykuna niranku: ‘Chay runaqa “Diospa Churinmi kani” ninmi’, nispa.

Jesuspa wañupusqanta rikuq juj runakunapas imaymana pasasqanta rikuspankun “sonqonkuta takakuspa” wasinkuman kutipuranku llakisqa p’enqasqa ima (Lucas 23:48). Karullamanta Jesusta qhawashaq runakuna ukhupin kashallarankutaq Jesuspi iñiq askha warmikunapas, paykunan mayninpi Jesusta puriysiqku, paykunapas sinchi llakisqan kasharanku.