¿Iman Diospa gobiernon?

Bibliaqa Jehová Diospa gobiernonmantan astawanqa riman. Chay gobiernon kay pachamanqa sumaq kausayta apamunqa. ¿Iman Diospa gobiernon? ¿Ñachu chay gobierno kamachishanña? ¿Imatan chay gobierno kay tiempopi ruwashan? ¿Imatan jamuq tiempopi ruwanqa? Chaykunamantan kaypi, qatimuq yachachikuypi, chayman qatiq yachachikuypipas yachasunchis.

1. ¿Iman Diospa gobiernon? ¿Pin chaypi kamachikuq kashan?

Diospa gobiernonqa janaq pachapi Diospa churasqan gobiernon. Jehová Diosqa Señorninchis Jesucristotan chay gobiernopi kamachikunanpaq churarqan (Mateo 4:17; Juan 18:36). Biblian Jesusmanta nin: “Paypa kamachikuyninqa mana tukukuqmi kanqa”, nispa (Lucas 1:32, 33). Jesusqa janaq pachamantan kay pachata kamachimunqa.

2. ¿Sapallanchu Jesús kamachimunqa?

Jesusqa manan sapallanchu kamachimunqa, paywan kuskan wakin runakuna kamachimunqaku. Paykunaqa “llapa ayllukunamanta, llapa rimaykunamanta, llapa llaqtakunamanta, llapa nacionkunamantawanmi” kanku (Apocalipsis 5:9, 10). Askhaña Jesuspa qatikuqninkuna kanku chaypas, 144.000 runakunallan janaq pachamanqa rinqaku, paykunan Jesuswan kuska kamachimunqaku (leey Apocalipsis 14:1-4 textota). Jesuspa wakin qatikuqninkunaqa kay pachapin qhepakunqaku, paykunatan Jesusqa kamachimunqa (Salmos 37:29).

3. ¿Imaraykun nisunman “Diospa gobiernonqa ima gobiernomantapas aswan jatunmi” nispa?

Wakin gobiernokunaqa imaymanataña llaqtankurayku ruwayta munanku chaypas manan atinkuchu. Chaymantapas iskay kinsa watakuna qhepamanqa jujñataqmi chay gobiernokunaq rantinpi jaykun. Diospa gobiernonpi kamachikuq Jesusmi ichaqa mana jayk’aqpas cambiasqachu kanqa. Diosqa mana jayk’aq ch’usaqyaq gobiernotan sayarichinqa (Daniel 2:44). Jesús kay pachata kamachimuspaqa manan pimanpas sayapakunqachu. Chaymantapas llapa runatan yachachinqa pay jina munakuq, sumaq sonqo, chanin ruwaq kanankupaq (leey Isaías 11:9 textota).

4. Diospa gobiernollanmi llapa gobiernomantapas aswan atiyniyoqqa

Manan pi gobernantepas Jesús jinaqa karqanchu ni kanqapaschu. Leeychis Mateo 28:18 textota, jinaspa jamuq tapuyman jina parlariychis:

• ¿Imaraykun mana mayqen gobiernopas Jesús jina atiyniyoq kanmanchu?

Kay pachapi gobiernokunaqa llaqtallankupin kamachikunku, jinaspapas manan unaychu paykunaqa kamachikunku, juj tiempomantaqa cambiasqan kapunku. ¿Chhaynachu Diospa gobiernonwanpas pasanqa? Leeychis Daniel 7:14 textota, jinaspa jamuq tapuykunaman jina parlariychis:

• Chaypi nisqan jina, Diospa gobiernonqa manan chinkachisqachu kanqa, ¿imaraykun chay allinpuni kanqa?

• Llapa kay pachatan kamachimunqa, ¿imaraykun chay allinpuni kanqa?

5. Kay pachapi gobiernokunaqa chinkachisqapunin kananku

¿Imaraykun Diospa gobiernon chinkachinanpuni kay pachapi gobiernokunata? VIDEOTA qhawaychis, jinaspa jamuq tapuyman jina parlariychis:

VIDEO: ¿Iman Diospa gobiernon? (pisiyachisqa video) (1:41)

• ¿Imaynan kausay kashan kay pachapi gobiernokunawan?

Leeychis Eclesiastés 8:9 textota, jinaspa jamuq tapuyman jina parlariychis:

• ¿Munawaqchu Diospa gobiernon kay pachapi gobiernokunata tukuchipunanta?

6. Diospa gobiernonpi kamachikuqkunaqa khuyapayakuqmi kanku

Jesusqa yachanmi imaynas runaq vidan chayta. Payqa “allintan yachan mayninpi pisipananchista, chaymi payqa khuyapayakuq noqanchiswan” (Hebreos 4:15). Chaymantapas Jehová Diosqa 144.000 runakunatan ajllarqan Jesuswan kuska kamachimunankupaq. Paykunaqa “llapa ayllukunamanta, llapa rimaykunamanta, llapa llaqtakunamanta, llapa nacionkunamantawanmi” kanku (Apocalipsis 5:9).

• Jesuspas paywan kuska kamachimuqkunapas yachankun imaynas kay pachapi kausay chayta, ¿allinninchispaqchu chay kanman? ¿Imaraykutaq chhaynata ninki?

7. Diospa leyninkunaqa lliu gobiernokunaq leyninkunamantapas aswan allinmi

Imaynan gobiernokunapas llaqtankupaq leykunata churanku, chhaynallataqmi Diospa gobiernonpas runakunaman kamachikuykunata qon. Lliumi kasukunanku chay kamachikuykunataqa. Leeychis 1 Corintios 6:9-11 textota, jinaspa jamuq tapuykunaman jina parlariychis:

• ¿Imaynan kausay kanman llapa runa Diospa kamachikuyninkunata kasukuqtin?a

• ¿Diospa gobiernonman jaykuy munaqkuna kasukunankuchu kamachikuyninkunata icha manachu? ¿Imaraykutaq chhaynata ninki?

• ¿Atinkumanchu cambiayta Diospa kamachikuyninta mana kasukuq runakuna? (Qhawaychis 1 Corintios 6:11 textota).

IMATAN YACHAMURQANCHIS

Diospa gobiernonqa janaq pachapi Diospa churasqan gobiernon, chay gobiernon kay pachata kamachimunqa.

Yuyarisun

• ¿Pikunan Diospa gobiernonpi kamachimunqaku?

• ¿Imaraykun mana ima gobiernopas Diospa gobiernonman igualanmanchu?

• ¿Imatan ruwananku Diospa gobiernonta apoyaqkuna?

ASTAWAN YACHANAYKIPAQ

¿Maypin Diospa gobiernon kanqa? ¿Imanirqanmi chaymanta Señor Jesús? Chaymantan kaypi yachanki.

“¿Sonqonchispichu Diospa gobiernon kashan?” (jw.org paginapi leey)

¿Imaraykun Jehová Diospa testigonkuna Diospa gobiernollanta apoyanku? Chaymantan kay videopi yachanki.

Cheqaq cristianokunaqa Diospa gobiernollantan apoyanku (1:44)

¿Imaninmi Biblia cieloman riq 144.000 ajllasqa runakunamanta? Chaymantan kaypi yachanki.

“¿Pikunan janaq pachata rinku?” (jw.org paginapi leey)

Juj warmin carcelpi kashaspa allinta yacharqan Diospa gobiernollan thaj kausay apamunanmanta. Chaymantan kay qelqapi yachanki.

“Diospa gobiernollanmi chanin kausaytaqa apamunqa” (¡Rijch’ariy!, 2011 watapi noviembre killa)