Jesuspa ñaupaq milagro ruwasqan

Natanael Jesuspi iñipusqanmanta iskay p’unchay qhepatan Jesusqa discipulonkunapiwan Caná llaqtata riranku. Chay llaqtamantan Natanaelqa karan. Chay llaqtaqa Jesuspa wiñasqan Nazaret llaqtaq orqo-orqo wichay ladonpin kasharan. Paykunaqa Caná llaqtapi juj casarakuy fiestamanmi invitasqa karanku.

Jesuspa maman Mariapas chay fiestapin kasharan. Payqa casarakuqkunaq allin reqsisqantaq karan chayqa, yaqapaschá imaymana ruwaykunapi yanapakusharan. Chaychá vino pisishasqanta rikuspa Jesusta niran: “Manan vinonku kanñachu”, nispa (Juan 2:3).

Chaywanmi Mariaqa Jesusta nisharan imatapas ruwananpaq. Jesusmi ichaqa niran: “¿Imanaqtintaq noqanchisri chaymanta llakikunanchis?”, nispa (Juan 2:4). Diospa ajllasqan reytaq karan chayqa, manan pipas paytaqa ninanchu karan imatapas ruwananpaq, janaq pacha Yayallanmi ima ruwanantapas ninan karan. Chayraykun chhaynata Mariaman kutichiran. Jinan Mariaqa allinta piensaykuspa manaña imatapas niranchu, aswanmi atiendeqkunata niran: “Ruwallankichis ima nisqasuykichistapas”, nispa (Juan 2:5).

Chaypin kasharan soqta rakikuna, sapankamanmi jaykuq 40 más litro unu. Jinan Jesusqa atiendeqkunata niran: “Chay rakikunaman unuta junt’achiychis”, nispa. Junt’achiqtinkutaq niran: ‘Juj chikanta apaychis casarakuy fiestamanta encargakuqman’, nispa (Juan 2:7, 8).

Casarakuy fiestamanta encargakuqtaq chayta malliykuran, jinaspa noviota niran: “Lliu casarakuqpas ancha allin kaq vinotaraqmi ñaupaqtaqa jaywachin, runakuna machasqaña kaqtintaq mana allin vinollataña churan. Qanmi ichaqa ancha allin kaq vinota kunankama waqaychasqanki”, nispa (Juan 2:10).

Chaymi karan Jesuspa ñaupaq kaq milagro ruwasqan. Chaywanmi discipulonkunaqa astawan paypi iñiranku. Chay qhepamanmi Jesusqa mamanwan wayqenkunawan ima Capernaum llaqtata riranku.