¿Iman yanapawasun mana qonqanapaq?

JEHOVÁ DIOSQA imaymanata yuyarinanchispaq hinan umanchistaqa kamarqan. Wiñaypaq kawsananchista munaspan mana hunt’ay atina taqeta hina ruwarqan, chhaynapi yachayninchis mana tukukunanpaq, imaynan pukyumanta askhataña unuta horqoqtiykipas mana tukukunchu hinata (Sal. 139:14; Juan 17:3).

Chaywanpas mayninqa imatapas yuyariyta munaspaqa manan atinchischu ch’usaqpas umanchis kashanman hina. Chhaynaqa, ¿imatan ruwasunman ama qonqali kananchispaq?

Tukuy sonqowan interesakuy

Sichus allin reparaq kasunchis, muyuriqninchispi kaqkunata allinta qhawarisunchis, runakunapipas interesakusunchis chayqa, umanchistan llank’achishanchis imatapas allinta yuyananchispaq. Chhaynapin imatapas allin kaqta leeshaspa otaq uyarishaspaqa tukuy yuyaywan chayta ruwasunchis.

Askhan ninku: “Ñoqapaqqa sasan sutikuna yuyayqa”, nispa. Cristianokunan ichaqa yachanchis iñiqmasinchiskuna, predicamusqanchis runakuna, sapa p’unchay tupasqanchis runakunapas ancha importante kasqankuta. ¿Imatan ruwananchis sutikunata mana qonqananchispaq? Apóstol Pablo hinan paykunapi interesakunanchis. Paymi iñiq t’aqaman carta qelqasqanpi churarqan 26 iñiqmasinkunaq sutinta, paykunapi interesakusqanraykun sutinkuta yuyarqan, ichaqa manan sutillankutachu yuyarqan aswanpas imayna runa kasqankutapas yuyarqanmi (Rom. 16:3-16). Iñiq t’aqakunata watukuq wakin umallikunaqa allintan yuyanku iñiqmasikunaq sutinkuta, sapa semanaña huk-huk iñiq t’aqata watukuq rinku chaypas. ¿Imaynatan yuyayta atinku? Chayraq piwanpas tupaspan askha kutita sutinmanta parlapayan uyanta qhawarispa. Hinaspapas wawqe-panakunawan kuskan predicanku otaq kuska mikhunkupas. Chhaynaqa, piqpa sutintapas mana qonqanaykipaqqa yuyaykuy imarayku sutinta yuyanayki kasqanta, hinaspa kaypi yachasqaykiwan yanapachikuy.

Leesqanchista yuyayqa allinllataqmi. ¿Iman chaypaq yanapawasun? Tukuy yuyaywan leeymi, allinta entiendeypas. Yachayta munaspan tukuy yuyaywan leenanchis, mana chayqa huk ruwaykunapin yuyayninchis kanqa, manataq imatapas leesqanchismanta yuyasunchu. Sichus yachasqanchiswan tupa-tupachispa leesunchis chayqa, astawanmi entiendesunchis. Chaymantapas tapukusunmanmi: “¿Imaynatan kay yachasqay yanapawanman? ¿Imaynatan huk runakunata yanapayman?” nispa. Ch’ulla-ch’ullallamanta simikunata leeymantaqa, aswanpas mana sayaspan askha simikunata leenanchis, chay ruwaymi yanapawasun astawan entiendenanchispaq yuyananchispaqpas.

Leesqaykita kutipay

Imayna yachachinamanta allin yachaq runakunaq nisqanman hinaqa, imatapas leesqanchis qhepamanqa wakmantas leenanchis allinnin t’aqakunata. Chaymanta rimashaspan universidadpi huk profesor nirqan: ‘Huk minutollata allinnin t’aqakunata kutipayqa, huk kutitawanpas llapanta leeshawaq hinan’, nispa. Chhaynaqa leeyta tukurqospa otaq kuskankamalla leerqospaqa, umallaykipin kutipanayki allinnin kaqkunata, chhaynapi allinta hap’inaykipaq. Chaymanta yuyaykuy imaynatan entiendesqaykiman hina hukkunaman yachachinaykipaq. Leesqayki qhepaman yachasqaykita kutipanki chayqa, unay tiempon umaykipi hap’inki.

Iskay kinsa p’unchaymantaqa chay yachasqaykimantan willawaq familiaykikunaman, iñiqmasiykiman, llank’aqmasiykiman, estudiaqmasiykiman, wasimasiykiman otaq predicasqayki runakunamanpas. Willashaspaykiqa chay leesqaykipi imaynata Bibliaq nisqanman hina yachachikurqan chayta yuyanaykipaq kallpachakuy. Chhaynapin leesqaykimanta allinnin kaqkunata mana qonqankichu, willasqaykitaq uyariqniykikunaq allinninpaq kanqa.

Allin kaqkunapi yuyaymanay

Leesqaykita kutipasqaykimantapas hukkunaman willasqaykimantapas, yuyaymananaykin imapas allin yachasqaykipi. Chaytan Asafpas Davidpas ruwarqanku. Asafmi nirqan: “Señor Diospa ruwasqankunatan yuyarisaq, ñawpa p’unchaykunapi Señor Diospa musphana ruwasqankunatan yuyarisaq, tukuy ruwasqankunapin yuyaymanasaq, ruwasqankunatan yuyarisaq”, nispa (Sal. 77:11, 12). Davidpas nirqanmi: “Tutakunapin yuyaymanayki”. “Ñawpa p’unchaykunatan yuyarini, tukuy ruwasqaykikunatan yuyaymanani”, nispa (Sal. 63:6; 143:5). ¿Chhaynatachu qanpas ruwanki?

Jehová Diospa ruwasqanpi, imayna Dios kasqanpi, munasqanpi ima yuyaymanaspaqa astawanmi yachayninchis yapakunqa, hinallataq sonqonchispi allinta hap’isunchis ancha allin yachachikuykunata chhaynapi mosoq runaman tukupunanchispaq. Hinan sonqonchispi chay yachasqanchiskuna saphichakunqa chaykunapi yuyaymanananchispaq (Sal. 119:16).

Santo espiritun yanapawasun

Jehová Diospa ruwasqankunata Jesucristoq willasqanta yuyarinanchispaqpas kanmi huk yanapawaqninchis. Manaraq wañukapushaspan Jesusqa yachachisqankunaman nirqan: “Chaykunataqa nishaykichis qankunawan kashaspaymi, ichaqa kallpachaq [“yanapaq”, NM] Santo Espiritutan Yaya sutiypi kachamunqa, paymi tukuy imaymanata yachachisunkichis, yuyarichisunkichistaqmi tukuy imakunatachus qankunaman nisqaytapas”, nispa (Juan 14:25, 26). Jesuspa nisqanqa hunt’akurqanmi. Pusaq wata qhepamanmi Mateo santo espirituq yanapayninwan Jesuspa kawsayninmanta qelqayta tukurqan. Chaypin qelqarqan Jesuspa Orqo patapi yachachisqanmanta, paypa kutimusqanta yachanapaq imakuna rikunanchismanta, hinallataq tukukuy p’unchaykunapi imakuna kananmantawan. Señorpa wañusqanmanta soqta chunka pisqayoq watakuna pasaqtinmi Apóstol Juanpas huk Evangelio nisqata qelqarqan, chaypin qelqarqan Cristoq manaraq wañushaspa apostolninkunaman wakin rimasqankunamanta. Mateopas Juanpas imaymanatachá yuyasharqanku Jesuspa rimasqanmanta ruwasqanmantapas, chaywanpas santo espiritun paykunataqa yuyarichirqan Jehová Diospa munasqanta Bibliapi churanankupaq.

Kunan tiempopi, ¿yanapashanchu santo espíritu Diospa kamachinkunata? Arí yanapashanmi. Ichaqa manan mana yachasqanchistaqa yuyarichiwasunmanchu, yachallasqanchistan yuyarichiwanchis (Luc. 11:13; 1 Juan 5:14). Necesitaqtinchismi yanapawanchis “ch’uya profetakunaq ñawpaqtaña rimasqanku simikunata” “Qespichiqninchis Señorpa kamachikusqanta[pas]” yuyarinanchispaq (2 Ped. 3:1, 2).

Paqtataq qonqawaqchis

Jehová Diosmi Israel runakunata askha kutipi nirqan: ‘Paqtataq [...] qonqawaqchis’, nispa. Chaywanqa manan rimasharqanchu tukuy imatapas mana hayk’aqpas qonqaspa yuyarinankumantachu, aswanmi kamachisharqan ama paykunaq ruwaynillankupi afanasqa purinankupaq, Diospa ruwasqankunata pisillataña yuyarispa. Yuyarishanallankun karqan Jehová Diospa Egipto runakunaq phiwi churinkuta wañuchispa paykunata qespichisqanta, hinallataq Puka Qochata kicharqospa Faraonta soldadokunantinta millp’uchispa wakmanta qespichisqanta. Chaymantapas yuyarishanallankun karqan Kamachikuy Siminta Sinaí orqopi qomusqanta, ch’inneq aqo pampanta pusaspa Prometesqa Hallp’aman haykuchisqantapas. Sapa p’unchaymi chaykunataqa yuyarinanku karqan (Deu. 4:9, 10; 8:10-18; Éxo. 12:24-27; Sal. 136:15).

Ñoqanchispas manapunin Diospa ruwasqankunata qonqananchischu. Ima sasachakuykunapiña tarikushaspapas manan qonqananchischu Jehová Diosta, imayna Dios kasqanta, ñoqanchisrayku Churinta kachamusqanta, wiñay kawsay suyakuyta qowasqanchistapas (Sal. 103:2, 8; 106:7, 13; Juan 3:16; Rom. 6:23). Chaykunata mana qonqananchispaqmi Bibliata sapa kutilla estudiananchis, huñunakuykunapi tapuykunata kutichinanchis, allin willakuykunatapas willananchis.

Imataña ruwanaykipaqpas yuyarikunaykin Jehová Diosmanta, chhaynapi munayninman hina yuyaykunaykipaq. Maskhashallaypuni paypa yanapayninta. Sonqoykiq munasqanman hinalla imatapas ruwanaykimantaqa Diospa Simin Qelqapi kamachikuykunaman hinan ruwanayki (Pro. 3:5-7; 28:26). Manan hayk’aqpas mana uyarisqaykitaqa otaq mana leesqaykitaqa yuyawaqchu. Chayrayku kallpachakuy Jehová Diosmanta astawan yachanaykipaq, chhaynapin aswan askha yachasqaykikuna kanqa santo espíritu yuyarichinasuykipaq; kallpachakullaytaq Diosta astawan munakunaykipaq, chhaynapin sonqomantapacha paypa nisqanta hina ruwayta munanki.