Allin willakuykunata willasun

“DIOSTA MANCHAKUY, KAMACHIKUYNINKUNATAPAS HUNT’AY”

MANARAQ iñiq t’aqa qallarishaqtinmi Jehová Dios Abrahamman nirqan paypa mirayninmanta ‘llapan ayllukuna’ bendecisqa kananta (Gén. 22:18). Llapa runakuna ruwanankupaqmi Salomontapas yuyaycharqan kayta qelqananpaq: “Diosta manchakuy, kamachikuyninkunatapas hunt’ay, chaypunin runaq ruwananqa”, nispa (Ecl. 12:13). Ichaqa, ¿imaynatan pachantinpi runakuna chayta yachankuman?

Askha runakunaña Diospa kamachikuyninmanta yachanku chaypas, Biblian nirqanña ‘Señorpa p’unchayninkunapi’ allin willakuykuna pachantinpi willakunanta, chayqa qallarirqan 1914 watamantapachan (Apo. 1:10). Apocalipsis 14:6, 7 textoq nisqan hina, angelkunan kay sumaq willakuykunata aparinanku karqan “llapa suyukunaman, ayllukunaman, tukuy t’aqa rimaqkunaman, llaqtakunamanwan”. Kaytan ninanku karqan: “Diosta manchakuychis, payta yupaychaychis, juzganan p’unchaymi chayarqamunña. Yupaychaychis Diosta, paymi hanaq pachatapas kay pachatapas lamar-qochatapas pukyukunatapas kamaqqa”, nispa.

“Cheqaq Dios.” “Testigoykunan qankunaqa kankichis” nispa Jehová Diospa nisqanqa paylla cheqaq Dios kasqanwanmi tupan (Isa. 43:10). Predicaspa yachachisqanchisqa manan religionniyoq kasqallanchistachu rikuchin nitaq ima diosllapipas creesqallanchistachu. Aswanpas yachachinanchismi kay pachata hanaq pachatawan kamaqqa paylla cheqaq Dios kasqanta (Isa. 45:5, 18, 21, 22; Juan 17:3). Payllan hamuq tiempopaq imapas kananta yachan, chaymi may allin paypa ñawpaqmantaña nisqankunata willayqa, ñawpa tiempopi hunt’asqanta hinan hamuq tiempopaq prometesqantapas hunt’anqa (Jos. 23:14; Isa. 55:10, 11).

Askha runan huk dioskunata yupaychanku otaq ninku mana mayqentapas yupaychasqankuta. Uyariwananchispaqqa, yaqapas rimasunman iman paykunaman interesan chaymanta. Hechos 17:22-31 textopi nisqanman hinan ruwakunman, chaypin sumaqllata apóstol Pablo reparachirqan runaqa kay pacha hanaq pacha Kamaq Diosman cuenta qonanta.

Diospa sutinta willay. Cheqaq Diostaqa sutinmantan reqsichinanchis, payqa Jehová sutitan munakun (Éxo. 3:15, NM; Isa. 42:8, NM). Chaymi payqa runakunaq reqsinanrayku Bibliapi sutinta churachirqan qanchis waranqa mastaraq. Ñoqanchistaq chay sutita willananchis (Deu. 4:35).

Runakunaqa Jehová Diostan reqsinanku tukuy sonqowantaq waqyakunanku, chhaynallapin salvakunqaku (Joel 2:32; Mal. 3:16; 2 Tes. 1:8). Ichaqa, yaqa llapankun mana chayta yachankuchu, Diostan reqsini niqkunapas. Bibliayoqña kanku, leeshankuña chaypas manapaschá yachankuchu Diospa sutinta, wakin Bibliakunapi mana churamusqankurayku. Wakinmanqa religionninkupi umalliqninkun nirqanku Diospa sutintaqa ama imapaqpas rimanankuta.

¿Imaynatan Diospa sutinta allinta willasunman? Uyariqninchispa Biblianpipuni qhawachispan. Wakin Bibliakunapiqa askha kutitan rikhurin, wakinpin ichaqa Salmo 83:18; Éxodo 6:3-6 textokunallapi; Éxodo 3:14, 15; 6:3 textokunaq páginaq urayninpi. Sapa kutin t’ikraspankun Diospa sutinta churanankumantaqa “Señor” otaq “Dios” nispalla churamunku hukniray letrawan. Chaymi allin kanman unay tiempoña t’ikrasqa Bibliapi Diospa sutinta maskhayqa, chhaynapi cambiasqankuta sut’iman horqokunanpaq. Hinaspapas wakin nacionkunapiqa rikuchinkumanmi Diospa sutinta monumentokunapi otaq wakin religionkunaq takinpi.

Traducción del Nuevo Mundo nisqa Bibliapin Jeremías 10:10-13 texto Diospa sutinta willan hinaspapas willallantaqmi pi pay kasqanta, chaymi yanapanman huk dioskuna yupaychaqkunatapas.

Ama Jehová sutita pakaychu “Dios” otaq “Señor” nisqakunawan imaynan pantasqa religionkuna ruwanku hinataqa. Ichaqa manan sapanka rimasqaykipichu ninayki, mana hinaqa yaqapas uyariqniyki manaña rimayta munanqachu. Sumaqta parlarispañan ichaqa sutinmantaqa maypis nikunanpi ninayki mana manchakuspa.

Hinaspapas Biblia qelqaqkunaqa askha kutitan Diosta sutinmanta Jehová nispa nirqanku, pisillapitaq “Señor” otaq “Dios” nispaqa. Ichaqa manan llapa qelqasqankupichu sutinta churarqanku aswanpas maypis churakunan chaykunallapin ancha respetowan churarqanku.

Paypaqpunin chay sutiqa. Sutiyoq Dios kasqanqa manan yanqachu, aswanpas cheqaq yachachikuyninmi chaywan tupan. Ichaqa chayta yachayqa qallariyllanmi.

Jehová Diosta munakunapaq tukuy sonqowan mañakunapaqpas, imayna Dios kasqantan allinta reqsinanchis. Jehová Dios Sinaí orqopi Moisesman sutinta willashaspan mana Jehová Dios kani nispallachu willarqan. Aswanpas imayna Dios kasqantawanmi willarqan (Éxo. 34:6, 7). Chaytan ñoqanchispas ruwananchis.

Diospa sumaq bendicionninmanta runakunaman predicanki otaq iñiq t’aqapi discursoykita qonki chayqa, promesa ruwaq Diosmanta astawan willay. Diospa kamachikuyninmanta willaspaqa, yachayniyoq munakuq kasqanta allinta rikuchiy. Sut’itataq willay mana sasa hunt’aychu kasqanta, aswanpas allinninchispaq kasqanta (Isa. 48:17, 18; Miq. 6:8). Hinaspapas Diospa atiyninmanta yachachispa rikuchillaytaq imayna Dios kasqanta imakuna munasqantapas. Chaymantapas qhawarichiy Diosqa manan comuntachu imatapas ruwan chayta. Kamaqninchista munakusqaykimanta rimay, chhaynapin runamasiyki munakullanqataq.

Runakunaman allin willakuyta willaspan yanapanchis Diosta manchakunankupaq. Chayraykun rimayninchiswan tukuy atisqanchista ruwasun Diosta manchakunankupaq respetowan qhawarinankupaqpas (Sal. 89:7). Chhaynata ruwaspan rikuchisun Jehová Dioslla Juezninchis kasqanta imayna qhawariwasqanchismanta wiñay kawsayniyoq kananchistapas (Luc. 12:5; Rom. 14:12). Chaymi Diosta manchakuyqa tukuy sonqo munakuyninchismanta kanan chhaynapin munayninman hina ruwasun (Deu. 10:12, 13). Diosta manchakusqanchistan rikuchisun kamachikuyninta kasukuspa, mana allin ruwaykunata cheqnikuspa hunt’aq sonqowan yupaychaspa ima (Deu. 5:29; 1 Cró. 28:9; Pro. 8:13). Chaymi yanapawanchis Diosllata yupaychananchispaq kay pachaq ruwayninkunata mana munapayaspa (1 Juan 2:15-17).

Diospa sutinqa “qaqa sayaq pukara hinan”. Jehová Diosta allinta reqsisun chayqa paypa pakaykusqanmi kasun. Ichaqa manan sutinmanta waqyakuyllachu nitaq sumaq kayninmanta rimayllachu, aswanpas paypin confiananchis. Chaymi Proverbios 18:10 texto nin: “Señor Diosqa qaqa sayaq pukara hinan, chaymanmi chanin runaqa phawan, allin hark’aykusqataqmi kashan”, nispa.

Uyariqniykikunata kallpachay Jehová Diospi confianankupaq (Sal. 37:3; Pro. 3:5, 6). Diospi, promesankunapi confiasqanchisqa sut’itan rikukun (Heb. 11:6). Bibliaq nisqan hina pikunachus Diospa sutinta waqyakuqqa qespichisqan kanqa, ichaqa reqsinanmi Paylla teqsimuyuntinpi Kamachikuq kasqanta, munaynintan ruwanan, creenallantaq Paylla Qespichiq kasqantapas (Rom. 10:13, 14). Huk runakunata yachachispa, yanapay tukuy kawsayninpi Diospi confiananpaq.

Askha runakunan imaymana sasachakuypi tarikunku chaymi mana suyakuyniyoq hina sientekunku. Chayrayku yanapay Diospa munayninta ruwanankupaq, paypi confianankupaq kamachikuyninta ruwanankupaqpas (Sal. 25:5). Kallpachay Diosmanta mañakunankupaq chaskisqanku bendicionkunamanta agradecido kanankupaqpas (Fili. 4:6, 7). Ichaqa manan Bibliamanta wakin textokunata leespallachu Jehová Diosta reqsinqaku, aswanpas paykuna kikinkun kawsayninkupi rikunanku lliw promesankuna hunt’akusqanta, chhaynapin ancha kusisqa mana manchakuspa kawsanqaku, hinan entiendenqaku Diospa sutinqa ancha hatun kasqanta (Sal. 34:8; Jer. 17:7, 8).

Llapa runakunatan yanapananchis cheqaq Jehová Diosta manchakunankupaq, kamachikuynintapas kasukunankupaq.

‘JESUCRISTOMANTA WILLASUN’

JESUCRISTO manaraq hanaq pachaman ripushaspan yachachisqankunaman nirqan: “Testigoykuna kankichis [...], kay pachaq k’uchunkunakamaraq”, nispa (Hech. 1:8). Kay tiempopipas Bibliaq nisqan hina Diospa hunt’aq kamachinkunaqa ‘Jesusmantan willashanku’ (Apo. 12:17, NM). Chhaynaqa, ¿yanapakushankichu chay llank’aypi?

Askha runakunan Jesuspi creenku, ichaqa manan yachankuchu kay pachaman manaraq hamushaqtin maypi kashasqanta nitaq yachankuchu kay pachapi kashaspa runachus karqan icha manachus chayta. Chaymantapas pisitan entiendenku Jesús Diospa Churin kasqanta, manataq entiendenkuchu Diospa munayninta hunt’ananpaq imakuna ruwananta. Manan yuyaykunkupaschu imatan Jesús kay tiempopi ruwashan chayta nitaq imakunatas hamuq tiempopaq ruwanqa chaytapas. Yaqapaschá hukkunapas yuyaykunku: “Jehová Diospa testigonkunaqa manan Jesuspi creenkuchu”, nispa. Chayraykun tukuy atisqanchista ruwananchis chaykunamanta sut’inchanapaq, chaymi sumaq llank’ayninchisqa.

Wakinqa ninku: “Jesusqa manan hayk’aqpas karqanchu”, nispa. Hukkunataq Jesusta allin runapaqña qhawarinku chaypas mana Diospa Churinta hinachu qhawarinku. Chaymi kallpachakunanchis pacienciawan sumaqllata chhayna yuyaykuq runakunaman ‘Jesusmanta willananchispaq’.

Imakunapiña runakuna creenku chaypas, Jesusmantaqa yachanankupunin Diospa qosqan wiñay kawsayman aypanankupaq (Juan 17:3). Diosqa sut’itan willarqan pipas kawsayta munaqqa ‘Jesucristopuni Señor kasqanta [...] sut’ita’ reqsinanta kamachikuyninkunatapas kasukunanta (Fili. 2:9-11). Ichaqa manan pisipananchischu pipas pantasqa yachachikuyninkunata otaq mana kaqta rimapayawaqtinchis. Yaqapaschá Jesusmanta mana imatapas manchakuspa willayta atisunman chayllaraq visitashaspapas, mayninpin ichaqa allin yuyaywan rimananchis imatas Jesusmanta yuyaykun chayta correginanchispaq. Otaq ima rimay munasqanman tumpalla hukpi visitaspa rimasunman. Chaywanpas manapaschá llapamanta rimayta atisunchu paywan Bibliamanta estudio qallarinanchiskamaqa (1 Tim. 2:3-7).

¿Imatan Jesús ruwanqa Diospa munaynin hunt’akunanpaq? Runakunatan yanapananchis Jesuspi iñinankupaq chayllan Dioswan allinpi kanqaku, Cristollan “ñanpas” pipas payllantan “Yayamanqa chayanqa” (Juan 14:6). Sichus entiendenqaku imaraykus Jehová Dios akllarqan phiwi Churinta chayqa, entiendellanqakutaqmi Bibliaq nisqanta. ¿Imarayku? Jehová Dios munayninta hunt’achinanpaq Churinta akllasqanrayku (Col. 1:17-20). Profeciakunapas chayllamantan willan (Apo. 19:10). Jesusllan allichanqa Satanás sasachakuyta paqarichisqanta Adanpa hucha paqarichisqantapas (Heb. 2:5-9, 14, 15).

Cristoq imakuna ruwasqanta allinpaq qhawarinanchispaqqa, ñawpaqtan reqsikunanchis salvakunanchispaq mana imatapas ñoqallanchismanta ruway atisqanchista. Llapa runakunan huchayoq kanchis, chayraykun imaymanapi tarikunchis, chaymi wañuy llapanchisman chayamuwanchis (Rom. 3:23; 5:12). Predicasqayki runata yanapay chaykunapi yuyaymanananpaq, hinaspa willay huchamanta wañuymantawan Jehová Dios Jesuspa wañusqanpi iñiqkunata kacharichinanta (Mar. 10:45; Heb. 2:9). Paypi iñisun chayqa wiñay-wiñaypaqmi kawsasun (Juan 3:16, 36). Jesuspi iñispallan wiñay kawsaytaqa tarisun (Hech. 4:12). Pitapas yachachispa otaq iñiq t’aqapi yachachispaqa munakuywan pacienciawan ima yachachiy, Cristo kacharichiq kasqanmanta agradecido kanankupaq. Kacharichiymanta agradecido kayqa runakunatan yanapan sumaqta kawsanankupaq allin runa kanankupaqpas (2 Cor. 5:14, 15).

Huk kutillataña Jesús wañurqan chaypas, kunanqa Uma Sacerdote hina tukuy sonqowan ruwayninkunata hunt’ashan (Heb. 9:28). ¿Imaraykun chay ruwasqan allinpuni? Yaqapaschá q’otusunkiku, sasachaykuykunapi tarikunki, runakuna mana allinta sientechisunkiku ima. Jesuspas chhaynatan ñak’arirqan chaymi allinta yachan imaynapi tarikusqanchista. Pantaq runataqmi kanchis chaymi Jehová Diospa khuyapayakuyninta tukuy sonqo mañakunanchis Churinpa wañusqanpi iñispa. Jesusmi “Yayaq ñawpaqenpi abogadonchis”, chaymi ‘ñoqanchispaq Diosmanta mañakapuwasun’ huchanchista pampachawananchispaq (1 Juan 2:1, 2; Rom. 8:34). Jesús sacrificakusqanrayku, Sacerdote hina yanapawasqanchisraykupiwanmi “Diospa khuyapayakuq qayllanman” asuykuyta atinchis yanapaykuwananchispaq (Heb. 4:15, 16). Chaymi pantaqña kaspapas Uma Sacerdote Jesucristoq yanapayninwan ch’uya concienciawan Diosta servinchis (Heb. 9:13, 14).

Hinaspapas Jehová Diosmi Jesustaqa iñiq t’aqapi Umallinanpaq churarqan (Mat. 28:18; Efe. 1:22, 23). Chaymi payqa imachus necesitakusqanman hina aparishan Diospa munasqanman hinataq ruwashan. Runakunaman yachachispaqa sut’ita willay Diospa llaqtanta Jesús Umallishasqanta (Mat. 23:10). Chaymantapas qallariymantapacha Bibliamanta yachay munaqkunata huñunakuykunaman invitay. Chaypiqa “allin yuyayniyoq hunt’aq kamachi” apachimuwasqanchis qelqakunawan Bibliata estudianchis. Chaypi sut’ita willay pin chay “kamachi” pitaqsi patronninchispas chayta, chhaynapin reparanqa wiraqochanchis Jesucristo umalli kasqanta (Mat. 24:45-47). Reqsichiy iñiq t’aqapi umallikunata, imakunatas Bibliaq nisqanman hina paykuna hunt’anku chaytapas (1 Tim. 3:1-7; Tito 1:5-9). Willaytaq iñiq t’aqapi umallikunaqa mana patronkunachu kasqankuta, aswanpas paykunaqa Jesusta qatikunankupaqmi llapa iñiqmasinkunata yanapanku (Hech. 20:28; Efe. 4:16; 1 Ped. 5:2, 3). Chaymantapas allinta reparachiy Diospa llaqtanqa huk hinalla hallp’antinpi Jesuspa pusarisqan kasqanta.

Evangelio qelqakunapi nisqan hina, Jerusalén llaqtaman Jesús haykushaqtinmi qatikuqninkuna nirqanku: “Yupaychasqa kachun Señor Diospa sutinpi hamuq Reyqa”, nispa (Luc. 19:38). Estudiantekuna astawan Bibliata t’aqwispaqa sut’itan reparanku Jesuspuni hallp’antinpi kamachikuq kananpaq churasqa kasqanta (Dan. 7:13, 14). Huñunakuykunapi yachachispa otaq estudiantekunata yachachispapas, allinta entiendechiy Jesuspa kamachikusqanqa ancha valorniyoq kasqanta.

Chaypaqqa, kawsayninchispin rikuchinanchis Jesusta Kamachikuqta hina qhawarisqanchista tukuy sonqowan kasukusqanchistapas. Chaymantapas atiy chaskisqan qhepamanmi qatikuqninkunata kamachirqan allin willakuykunata willanankupaq, ñoqanchispas chayta kasukusqanchistan rikuchinanchis (Mat. 24:14; 28:18-20). Rimallaytaq imatas ancha Sumaq Yuyaychaq Jesús ñawpaqman churananchista munan chaytapas (Isa. 9:6, 7; Mat. 6:19-34). Thak-kaypa Qollanan Jesús nisqanman hinaqa qhawarichinanchismi imayna sonqowansi kawsashanchis chaytapas (Mat. 20:25-27; Juan 13:35). Ichaqa ama juez hinaqa ima mana allin ruwasqankumanta rimaychu, aswanpas sumaqllata kallpachay Jesuspa kamachikusqanman hinachus kawsashanku icha manachus chayta qhawarikunankupaq. Chaymantapas rikuchillaytaq chayman hina kawsasqaykita.

Jesusta teqsita hina churay. Bibliaqa Diospi iñiqkunatan rikch’anachin Jesuspi teqsichasqa wasita hina (1 Cor. 3:10-15). Chaymi uyariqkunata allinta yachachinanchis Jesucristomanta imayna Bibliapi willakun hinatapuni. Ichaqa manan qanpa qatikuqniyki hinatachu aswanpas Cristoq qatikuqninta hinan (1 Cor. 3:4-7).

Sichus allin yachachisqa kashanku chayqa Cristoq ‘yupintan qatikunqaku’ (1 Ped. 2:21). Iñiyninkupi wiñarinankupaq kallpachay Evangelio qelqakunata leenankupaq, chaykunataqa manan sut’i willakuykunata hinallachu qhawarinanku aswanpas kawsayninkupi yanapananpaq hinan qhawarinanku. Yachachiy Jesuspa sumaq kayninkunata, Yayanta ancha munakusqanta, wateqaypi kashaspa qaqata sayasqanta, Diosta kasukusqanta, imaynatas runakunata tratarqan chaytapas. Rikuchiy ima ruwaymansi astawan qokurqan chayta. Chhaynapin paykuna ima decidiyta munaspapas otaq qatiykachasqaña kaspapas tapukunqaku: “¿Imatan Jesús ruwanman karqan chhaynapi tarikuspa? ¿Rikuchisaqchu ñoqarayku ruwasqanmanta agradecido kasqayta?” nispa.

Huñunakuypi yachachispaqa manan ninaykichu: “Ñataq Jesusmanta yachankuña chayqa manañan paymanta rimanayñachu”, nispa. Jesusmanta rimasqaykiqa astawanmi iñiqmasikunata yanapanqa iñiyninkupi wiñarinankupaq. Huñunakuykunamanta rimaspaqa allinta rikuchiy Jesús iñiq t’aqapi Umalli kasqanta. Predicaymanta rimaspataq rikuchiy imayna sonqowansi Jesús hunt’arqan chayta, imatas Rey hina ruwashan kay tiempopi sumaq paraisoman askha runakuna haykunankupaq chaytapas.

Yachasqanchis hina, manan Jesuspa ruwasqallanmantachu yachananchis cheqaq cristiano kananchispaqqa. Aswanpas paypin iñinanchis, tukuy sonqowan munakunanchis, chay munakuytataq rikuchisun kasukuq kasqanchiswan (Juan 14:15, 21). Chay munakuymi ima sasachakuypipas qaqata sayachiwasun wañunanchiskamataq Cristota qatikusunchis, sichus Cristopi ‘saphichasqa teqsichasqa kasun’ chayqa poqosqa cristiano kasqanchistan rikuchisun (Efe. 3:17). Chhaynata kawsaspan Jesuspa Jehová Diosninta hatunchasunchis.

“DIOSPA GOBIERNONMANTA ALLIN WILLAKUYKUNA”

JESÚS kutimunanmanta, p’uchukay p’unchaykunamantawan rimasqanpin, nillarqantaq: “Diospa Gobiernonmanta allin willakuykunan kay pachantinpi willasqa kanqa, llapa suyukunaq yachananpaq, hinaqtinmi p’uchukayqa chayamunqa”, nispa (Mat. 24:14, NM).

¿Imataq chay willakuykunari? Diospa Gobiernonmanta willakuykunan, Jesucriston chaymanta mañakuypi yachachiwarqanchis: “Gobiernoyki hamuchun”, nispa (Mat. 6:10, NM). Apocalipsis 11:15 textopitaq nin: “Kamachikuq-kaymi Señorninchispaña [Jehová Diospaña] Cristonpaña kapun”, nispa, chaypi nisqan hina Jehová Diosmi Cristoman atiyta qomurqan kamachinanpaq. Chay allin willakuykuna willasqanchismi, ñawpa cristianokunaq willasqankumanta aswan hunt’a kashan, paykunaqa willarqanku: “Qankunamanmi Diospa Gobiernonqa sispaykamunña”, nispa (Luc. 10:9, NM). Jesusqa chayraq Kamachikuq kananpaq akllasqa kaqtinpas paykunawanmi kasharqan. Mateo 24:14 textopi nisqan hina, Jesucriston nirqanña pachantinpi allin willakuykuna willakunanmanta Diospa munasqanman hina hunt’akunanpaq.

Profeta Daniel huk rikhuriypi rikusqanmanta nirqan: “Runaq churinta hina [Jesucristota] rikurqani [...]. Paymi Yuyaq Runaman [Jehová Diosman] qayllaykurqan [...]. Paymi kamachikuy atiyta chaskirqan, qhapaqchasqan karqan, rey kananpaq churasqan karqan, llapa llaqtakunan, hatun suyukunan, ima rimaytaña rimaqkunapas payta servinanku karqan”, nispa (Dan. 7:13, 14). Jesusqa 1914 watapin chay atiyta hanaq pachapi chaskirqan, chay qhepallamanmi Saqrata supayninkunantinta kay pachaman wikch’uykamurqan (Apo. 12:7-10). Runakunaq millay kawsayninkun tukukunqaña. Ñawpaqtan ichaqa, Jehová Diospa hanaq pachapi churasqan Reymanta pachantinpi willakushan. Chay willakuytaqa tukuypin sumaqta chaskikushanku chaywantaqmi rikuchinku ‘runakunaq kamachisqan’ pachapiqa Ancha Hatun Dios kamachiqninku kasqanta (Dan. 4:32).

Askharaqmi sucedenan kashan. Chaymi rogakushanchis “Gobiernoyki hamuchun” nispa, ichaqa manan unayraq hunt’akunanpaq kasqanraykuchu mañakunchis, aswanpas Daniel 2:44, Apocalipsis 21:2-4 textokunaq hunt’akunanpaqmi. Chay Gobiernon kay pachata munay paraisoman tukuchinqa chaypitaq Diosta runamasintapas munakuq runakuna tiyapunqaku. Diospa “Gobiernonmanta allin willakuykunata” hukkunaman willamuqtinchismi chay paraisomanta rimanchis, Jehová Dios Churinman atiy qosqanmantapas. ¿Astawanchu chay allin willakuykunamanta rikuchinki Diospa Gobiernonmanta predicaspa?

Diospa Gobiernonmanta yachachiy. ¿Imatan ruwawaq Diospa Gobiernonmanta willanaykipaq? Yaqapaschá askha yachachikuykunamanta rimaspa uyarichikunki, ichaqa Diospa Gobiernonmantan astawanqa yachachinayki.

Chayta ruwaspaqa Diospa Gobiernonmanta willaq textokunatan qhawachina. Uyariqkunatan allinta entiendechinanchis imas Diospa Gobiernon kasqanta. Wakinpaqqa sasa entiendeymi kanman mana rikukuq Gobiernomanta rimaqtinchisqa. Chaymi imaymanawan yuyaymanachisunman. Yaqapaschá nisunman: “Wayraqa manan rikukunchu riki, ichaqa atiyniyoqmi”, nispa, chhaynan chay Gobiernopas. Wayra Kamaqtaqa manan rikunchischu. Ichaqa ancha Hatun Atiyniyoqmi. Paytan ‘wiñay-wiñay Rey’ nispa Biblia sutichan (1 Tim. 1:17). Nillasunmantaq, hatun nacionpi wakin tiyaqkunan mana hayk’aqpas rinkuchu capital llaqtata nitaq presidenteta reqsinkupaschu. Noticiallapin yachanku chay kamachikuqmanta. Kaqllataqmi Diospa Gobiernonwanpas, askha simikunapi t’ikrakuq Biblian chaymanta willawanchis, pitan kamachikuq kananpaq churakurqan, chay Gobierno kunan tiempopi ima ruwasqanmantapas. Ima qelqakunamantapas astawan ruwakuq Qhawaq revistaq tapanpipas ninmi: “Jehová Diospa Reinonmanta Willashan”, nispa. Chhaynapi rikuchikun chay revista imapaq qelqakusqanta.

Uyariqninchistan nillasunmantaq: “¿Imayna gobiernotan munanki?” nispa. Diospa Gobiernon kamachikuqtinqa thakpin kawsasun, kaqniyoq kapusun, huk nisqalla kawsasun, qhalilla, allin yachachisqataq kasunpas. Sonqonchispi munasqanchispas hunt’akunqan (Sal. 145:16).

Kallpachay Diospa Gobiernonpi tiyanankupaq, chay Gobiernoq umallinqa Jesucriston. Kay pachapi milagrokuna ruwasqanta willaspa reparachiy hamuq tiempopi kaqllatataq ruwananta. Jesucristo llamp’u sonqo, khuyapayakuq huch’uyaykukuq kasqanmantapas rimapayay (Mat. 8:2, 3; 11:28-30). Ñoqanchisrayku wañusqanmanta willay, hanaq pachapi wiñay-wiñay tiyananpaq Dios kawsarichisqanmantapas (Hech. 2:29-35).

Diospa Gobiernon hanaq pachamanta kamachikamushasqanta allinta entiendechiy. Ichaqa yaqa llapa uyariqkunan millay kawsay q’oñirisqanwan mana chayta reparankuchu. Hinaspa niy: “Cheqaqpunin chay nisqaykiqa”, nispa; tapuytaq Jesucristo chaymanta ima nisqanta. Rikuchiy Mateo 24, Marcos 13, Lucas 21 capitulokunapi nisqanta. Chay qhepata tapuy: “¿Imaraykun hanaq pachapi Jesús kamachikuq hina churasqa kasqanmantapacha millay kawsay q’oñirishan?” nispa. Qhawachiytaq Apocalipsis 12:7-10, 12 textota.

Kay p’unchaykunapi Diospa Gobiernon kamachikushasqanqa sut’in kashan, chayta reparanapaq leey Mateo 24:14 textota, chay qhepatataq yachachiy imaynatas pachantinpi Bibliamanta yachachikushasqanta (Isa. 54:13). Jehová Diospa llaqtanpi escuelakuna kasqanmanta willay, chaykuna Bibliamanta yachachisqankuta mana qolqellapaq kasqantapas. Willallaytaq wasin-wasin yachachisqanchismantapas, runakunaq wasinpi yachachisqanchista, chayta iskay pachak más nacionkunapi ruwasqanchismantapas. ¿Kanchu ima gobiernopas chhayna yachachiq? Huñunakuykunaman, hatun huñunakuykunamanpas uyariqniykikunata pusay, paykuna kikinku rikuchunku Jehová Diospa llaqtanpi yachachisqan runakuna sumaq kawsasqankuta (Isa. 2:2-4; 32:1, 17; Juan 13:35).

Chhaynaqa, ¿reparanñachu uyariqniyki Diospa Gobiernon allinninpaq kasqanta? Yaqapaschá sumaqllata rimapayawaq imapaq yachachisqaykita, Diospa Gobiernonpi kamachi hina sumaq kawsayniyoq kayta akllakunanpaq kasqanta. ¿Imaynatan chay kawsayta akllanqa? Diospa ima munasqanta yachaspan, kamachikuyninkunata kasuspa ima (Deu. 30:19, 20; Apo. 22:17).

Runamasiykita yanapay Diospa Gobiernonta ñawpaqman churananpaq. Uyariqniykita rimapayasqaykimanta sonqonman chayasqaykimantapas, payqa akllakunanraqmi ima ruwananta. ¿Ñawpaqtachu kawsayninpi Diospa Gobiernonta churanqa? Jesusmi yachachisqankunata nirqan: ‘Diospa Gobiernonta ñawpaqta churaychis’, nispa (Mat. 6:33). ¿Imaynatan iñiqmasiykita yanapawaq chayta kasukunanpaq? Qan kikiyki chay kamachikuyta kasukuspa, imakunatas paypas ruwanman chayta willaspa ima. Tapuy imatas yuyaykurqan chayta kasukunanpaq, huk wawqe-panakuna ruwasqankumantapas willay. Jehová Diosta astawan munakunankupaq Bibliamanta willakuykunata yachachiy. Diospa Gobiernon sut’i kasqanta willay, hukkunaman willananpaqpas kallpachay. Chayman hina kawsanankupaqqa manan rimapayanallachu, aswanpas chayta ruwananpaqmi sonqonman chayana.

Jehová Diosmanta, Jesucristomanta, Diospa Gobiernonmanta iman hukkunata yachachinchis. Diospa yachachikuyninkunataqa wasin-wasintan yachachinanchis, iñiq t’aqapipas, chayman hinataq kawsananchispas. Chaykunata ruwaspan rikuchisunchis Bibliamanta Allin Yachachiq Kanapaq Escuela allinninchispaq kasqanta.