Leeqkunaq tapukusqan

¿Pikunan karanku templopi guardiakuna? ¿Ima ruwanayoqmi karanku?

Leví ayllumanta wakin qharikunaqa manan sacerdotechu karanku, jinan paykunaqa templopi juj ruwanakunayoq karanku, wakinqa guardiakunan karanku. Paykunaq umalliqninmi karan templota qhawaq umalli. Filón sutiyoq judío runan qelqaran ima ruwasqankuta: “Wakin guardiakunaqa temploq pationman jaykuna punkupin sayaqku, wakintaq temploq punkunkunapi sayaqku pikunachus jaykunanku kaqkunallata jaykuchinankupaq. Wakintaq temploq muyuriqninta puriqku tutapas p’unchaypas turnanakuspa”, nispa.

Judío religionpi juezkunaq kamachinmi guardiakunaqa karanku. Chay guardiakunallatan Roma reyqa kamachiran espadakunata jap’inankupaq.

Joachim Jeremias runan niran: “Jesusqa jap’iqnin guardiakunatan niran: ‘Sapa p’unchaymá riki templopi yachachispa tiyasharani, ¿imaraykutaq manari jap’iwarankichischu?’, nispa. Chay guardiakuna payta jap’isqankuraykun chaytaqa niran”, nispa (Mat. 26:55). Chay runaqa nillantaqmi: “Juj kutinpas templota cuidaq guardiakunan Jesusta jap’iyta munaranku”, nispa (Juan 7:32, 45, 46). Qhepamantaq judío religionpi juezkuna templo qhawaq umalliqta guardiakunatawan kamachiranku Jesuspa discipulonkunata juzgana cuartoman apanankupaq. Yaqachus jina chay guardiakunallataq apóstol Pablotapas jap’iranku temploq pationpi kashaqtin (Hech. 4:1-3; 5:17-27; 21:27-30).