21 YACHACHIKUY
¿Imaynatan kay tiempopi Diosmanta willakushan?
Pisi tiempollamantan Jehová Diosqa kay pachata kamachimunqa, chaypin imaymana llakikuykuna tukukapunqa. Chayraykun chay sumaq willakuyta lliuman willananchis. Jesuspunin qatikuqninkunata kamachirqan llapa runaman chaymanta willanankupaq (Mateo 28:19, 20). ¿Kasukushankuchu Jehová Diospa testigonkuna Jesuspa kamachikusqanta?
1. ¿Imaynatan junt’akushan Mateo 24:14 textopi willasqan?
Jesusmi nirqan: “Diospa gobiernonmanta allin willakuykunan pachantinpi willasqa kanqa”, nispa (Mateo 24:14). Jehová Diospa testigonkunaqa kusisqan Jesuspa kamachikusqanta kasukushayku. Chay sumaq willakuytan pachantinpi waranqa más simikunapi willashayku. Ichaqa chay ruwayqa manan facilchu, chaymi Jehová Diosmanta kallpata mañakuyku. Paypa yanapaynillanwanmi tukuy imapas ruwakushan.
2. ¿Imaynatan Diosmanta jujkunaman willayku?
Noqaykuqa llapa runamanmi Diosmanta willayku. Jesuspa tiemponpi iñiqkuna jinan noqaykupas “wasin-wasinta” rispa Diosmanta willayku (Hechos 5:42). Wasin-wasinta rispa willasqaykuwanmi askha runakuna Diosmanta yachashanku. Mayninpin ichaqa runakunaqa mana wasinkupichu kanku, chaymi callekunapi ima Diosmanta willayku. Maypiña kashaspapas imay ratupas Diosmantaqa willashallaykun.
3. ¿Pikunan Diosmanta willananku?
Jesusta llapa qatikuqkunan Diosmantaqa willananku. Noqaykuqa tukuy sonqon Jesuspa kamachikusqanta kasukuyku. Maypiña tarikuspapas willashallaykun Diosmantaqa, chhaynapi runamasiyku salvakunankupaq (leey 1 Timoteo 4:16). Manan pipas chay ruwasqaykumantaqa pagawankuchu. Biblian nishan: “Gratisllan chaskirqankichis, gratisllataqmi qonkichispas”, nispa (Mateo 10:7, 8). Manaña llapa runachu uyariwanku chaypas, noqaykuqa Jehová Diosta kusichinaykupaqmi jujkunaman paymanta willashallayku.
ASTAWAN YACHASUNCHIS
¿Imaynatan Jehová Diospa testigonkuna Diosmanta willashanku? ¿Imaynatan Jehová Dios paykunata yanapashan? Chaykunamanta kunan yachasunchis.
Llapa pachantinpin Diosmanta willashayku: A) Costa Rica; B) Estados Unidos; C) Benín; D) Tailandia; E) Yap (Micronesia); F) Suecia.
4. Lliu runaman Diosmanta willanaykupaqmi kallpachakuyku
Jehová Diospa testigonkunaqa maypichus runakuna tarikunku chaymanmi riyku Diosmanta willanaykupaq. VIDEOTA qhawaychis, chaymantataq jamuq tapuyman jina parlariychis:
¿Imaninkin Jehová Diospa testigonkuna Diosmanta willasqankumanta?
Leeychis Mateo 22:39, Romanos 10:13-15 textokunata, chaymantataq jamuq tapuykunaman jina parlariychis:
¿Imaynatan Jehová Diospa testigonkuna runamasinku munakusqankuta rikuchishanku?
¿Imaynatan Jehová Dios qhawarin paymanta willaqkunata? (15 versiculota qhaway).
5. Jehová Diospa llank’aqmasinkunan kayku
Jehová Diosmi yanapawashanku pay sonqo runakunata tarinaykupaq. Yachasunchis imachus Nueva Zelanda ladopi pasarqan chayta. Paul sutiyoq hermanoykun wasin-wasinta willashaspa Diosmanta yachay munaq señorata tarisqa. Chay señoraqa tutallamantas Jehová Diosta sutinmanta wajakusqa, mañakusqataqsi pillapas paymanta yacharichinanpaq. Kinsa hora pasayta jinallas Paulqa wasinta takaykusqa.
Leeychis 1 Corintios 3:9 textota, chaymantataq qatiqnin tapuyman jina parlaychis:
¿Hermano Paulta jina juj testigokunatapas Jehová Dios yanapashanmanchu allin sonqoyoq runakunata tarinankupaq?
Leeychis Hechos 1:8 textota, chaymantataq qatiqnin tapuyman jina parlaychis:
¿Piqpa yanapaynillanwanmi allin willakuykuna lliuman chayanman? ¿Imarayku?
¿Yacharqankichu?
Chaupi semana juñukuyniykupin imaynatas jujkunaman Diosmanta willaykuman chaykunata yachachiwanku. ¿Rikurqankichu chayta juñunakusqaykupi? ¿Imaniwaqmi chaymanta?
6. Jujkunaman willaspaqa juj kamachikuytan junt’ashayku
Apostolkunaq tiemponpiqa Diosta mana serviqkunan Jesuspa qatikuqninkunata Diosmanta willanankuta jark’ayta munarqanku. Ichaqa “autoridadkunaq leyninman jinan [paykunaqa] allin willakuykunata defienderqanku tajyachirqanku ima” (Filipenses 1:7). Kay tiempopipas Jehová Diospa testigonkunaqa kaqllatataqmi ruwashayku.a
Leeychis Hechos 5:27-42 textota, chaymantataq qatiqnin tapuyman jina parlaychis:
¿Imaraykun Diosmanta willayta manapuni saqeykumanchu? (Leeychis Hechos 5:29, 38, 39 textota).
WAKIN RUNAKUNAN NINKU: “¿Imaraykun Jehová Diospa testigonkuna wasin-wasinta purinku?”, nispa.
¿Imaniwaqmi chaymanta?
IMATAN YACHAMURQANCHIS
Jesuspunin qatikuqninkunata kamachirqan pachantinpi allin willakuykunata willanankupaq. Jehová Diosmi llaqtanta yanapashan chay ruwayta junt’anankupaq.
Yuyarisun
¿Imaynatan Diosmanta jamuq allin willakuykunata pachantinpi willakushan?
¿Imaraykun runakunaman Diosmanta willayku?
¿Kusichiwasunmanchu Diosmanta willay? ¿Imarayku?
ASTAWAN YACHANAYKIPAQ
¿Imaynatan Jehová Diospa testigonkuna jatun llaqtakunapi Diosmanta willashanku? Chaymantan kaypi yachanki.
París llaqtapi askha runaq kasqanpi Diosmanta willayku (5:11)
¿Imaynatan Jehová Diospa testigonkuna llaqtankumanta ayqekuq runakunaman Diosmanta willashanku?
Kay videopin juj hermana willakun may kusisqachus tukuy tiemponwan Diosta servishan chayta.
Wakin juiciokunatan ganarqayku Diosmanta willashanallaykupaq, chaymantan kay qelqapi willashan.
a Jehová Dios kikinmi paymanta willanaykupaqqa kamachiwanku. Chaymi testigokunaqa mana autoridadkuna permisota qowanankutaraqchu suyayku.