Yachaywan kawsasun
1 Jesusmi tawa challwaqkunata mink’aran qatikuqninkuna kananpaq, paykunataq mana iskayaspa “Jesuspa qhepanta ripurqanku” (Mat. 4:18-22). Saulopas wakmanta qhawarispa cristianoman tukupuspa, mana iskayaspa ‘sinagogakunapi Jesusmanta willarqanpacha’ (Hech. 9:20). Tiempoqa pasashanmi, chayrayku ima ruwananchistapas usqhaylla ruwananchis. Chaymi allin yachaywanpuni kawsananchis tiempota mana usuchispa (Efe. 5:15, 16).
2 Qonqaylla imaynapipas tarikunchis: Kunanmi tiempo kashan Jehová Diospa munayninta ruwanapaq chaymantaqa manañapaschá atisunmanñachu (Sant. 4:14). Llapallanchismi qonqaylla ‘imaynapipas rikukunchis’ (Ecl. 9:11). Llapallanchistaqmi machuyanchispas payayanchispas. Tiempoq pasasqanman hina ‘sasa p’unchaykunapi’ tarikunchis, chaymi manaña hunt’asqatachu Diospaq llank’ayta atisunman (Ecl. 12:1). Chayraykun mana sinchitachu suyananchis Diosman qokunapaq nitaq allinpiraqchu tarikunanchis astawan predicanapaq (Luc. 9:59-62). Abrahanpas yachaywanmi kawsaran Jehová Diospa munayninta ruwaspa, chaymi machuyapuspapas thakpi kawsaran “kusisqataqmi” wañupuran (Gén. 25:8, NM).
3 Tiempon tukukapushanña: “Pisi tiempollañan kashan”; tiemponchistaqa manan usuchinanchischu (1 Cor. 7:29-31). Kay pachapi millay kawsayqa tukukapunqañan, kay ‘hallp’a pachapi cosechawan’ tupaq oveja hina llanp’u sonqo runakunata maskhanapaqpas pisillañan tiempo kashan (Apo. 14:15). Chhaynaqa, chay runakunata yanapanapaq t’aqasqanchis tiempota amapuni usuchisunchu kay pachapi afanakuykunawan (Luc. 21:34, 35). ¡Maytan kusikusunchis tukuy sonqomanta chay ruwaypi yanapakuspa!
4 Jehová Diospaq llank’ana kaqtinqa usqhaylla yanapakunanchis. Arí, “‘Kunan p’unchay’ nisqa manaraq tukukushaqtin” kallpachakunanchis Diospa munayninta ruwashanallanchispaq (Heb. 3:13). Chhaynapin yachayniyoq kasqanchista rikuchisunchis, Biblian nin: “Diospa munayninta ruwaqmi [...] wiñaypaq kawsanqa”, nispa (1 Juan 2:17).