Ama ‘ñawpaq munakuyninchista’ pisiyachisunchu

“Imatachus yachasqaykipi qaqata sayay.” (Apo. 3:11.)

1, 2. Jehová Diosmanta tukuy yachasqayki cheqaqpuni kasqanta entiendespayki, ¿imaynan sientekuranki?

¿HAYK’AQMI yachachirasunkiku kasukuq runakunapaq Jehová Dios hamuq tiempopi imaymana allinkuna ruwapunanmanta? Religionniyoqña karanki chaypas, manapaschá Diospa munayninmanta yacharankichu, wakin yachachikuykunatapas mana entienderankichu. ¿Imaynan sientekuranki tukuy chaykunamanta Jehová Diospa testigonkuna entiendey atiyllata Bibliawan yachachisuqtiykiku? Chayraqchá cuentata qokuranki religionniykipi Diosmanta mana cheqaqta yachachisqankuta. Ichaqa Diosmanta cheqaqta yachaspaykiqa anchatachá kusikuranki. Tayta mamayki cristiano karan chayqa, yachachirasunkikuchá Jehová Diosmanta, tiempo pasaqtintaq entienderanki Bibliamanta yachasqayki chepaqpuni kasqanta, hinaspa allinta decidikuranki Diospa kamachikuyninkunata hunt’anaykipaq. ¡Anchatachá kusikuranki chaykunata ruwaspa! (Rom. 12:2.)

² Askha cristianomasinchiskunan kusisqa yuyarinku Diosta imayna reqsisqankumanta. Paykunaqa Jehová Dioswan hukllachasqa sientekuranku, anchatataq agradecekuranku llaqtanman pusamusqanmanta (Juan 6:44). Ancha kusisqa kaspankun huñunakuykunaman riranku, llapa runamantaq predicaytapas qallariranku. ¿Chhaynatachu qanpas qallariranki?

3. ¿Imaynan Éfeso cristianokuna kasharanku Jesús paykunapaq cartata qelqachiqtin?

³ Jesusmi Éfeso cristianokunapaq cartata qelqachiran, chaypin rimaran allinkuna ruwasqankumanta, ichaqa rimallarantaqmi manaña ñawpaqpi hinatañachu Diosta munakusqankumantapas. Niranmi: “Ñoqan yachani lliw ruwasqaykikunata, sinchi llank’asqaykikunata, pacienciasqaykitapas. Yachallanitaqmi mana allin kaqtaqa mana hinallatachu qhawasqaykita, mana apóstol kashaspa “apostolmi kayku” niqkunata probaspa llulla kasqankuta hap’isqaykitapas. Qanqa sutiyraykun pacienciarqanki, muchurqanki, mana sayk’uspan ñoqarayku sinchita llank’arqanki. Chaywanpas kashanmi contraykipi: Manan ñawpaq hinañachu [munakuyniyki]”, nispa (Apo. 2:2-4).

4. Éfeso cristianokunaman Jesuspa nisqan, ¿imanaqtinmi allinpuni ñoqanchispaqpas?

⁴ Jesusmi Éfeso cristianokunaman huk llaqtakunapi tiyaq cristianokunamanpas cartakunata apachiran. Chaykunapin willaran imakuna ruwanankuta imakunata mana ruwanankutapas. Chay cartakunapi nisqanmi anchata yanaparan kunan tiempopi hanaq pachaq akllasqa cristianokunata, paykunaqa 1914 watamantapachan askha pruebakunapi tarikuranku (Apo. 1:10). Kunanpas wakin cristianokunaqa ‘manañapaschá ñawpaqpi hinatañachu munakushanku’ Jehová Diosta yachachikuyninkunatapas. Chayrayku kunan yuyarisunchis imaynatan Dios munakuyta qallariranchis chayta. Chaypi yuyaymanaspaqa manan ñawpaqpi hinallachu Diosta munakusunchis, aswanpas astawanraqmi.

¿Imaynapin yacharanki Jehová Diospa testigonkuna Diosmanta cheqaqta yachachisqankuta?

5, 6. a) Manaraq Diosman servinapaq prometekushaspa, ¿imataraqmi allinta yachananchis? b) ¿Imaynapin yacharanki Jehová Diospa testigonkunalla Diosmanta cheqaqta yachachisqankuta? c) ¿Imatan ruwananchis ñawpaqpi hina Diosta munakunanpaq?

⁵ Manaraq Jehová Diosta servinapaq prometekushaspaqa allintaraqmi yachana mayqenchus Diospa munaynin kasqanta, “paypa munayninqa allinmi, sumaqmi, hunt’asqapunin” (Rom. 12:1, 2). Diospa munayninta yachanapaqqa, Bibliaq yachachisqantan yachana. ¿Imaynapin cuentata qokuranchis Jehová Diospa testigonkunalla Diosmanta cheqaqta yachachisqankuta? Wakinqa chayta repararanchis Diospa sutinta Bibliapi tarispa, otaq wañupuqkuna maypi kasqankumanta yachaspa (Sal. 83:18, NM; Ecl. 9:5, 10). Wakintaq qhawariranchis Dios serviqkuna munanakusqankuta, mana kay pachamantachu kasqankutapas. Diosta serviqkunaqa manan chhaqrukunkuchu política nisqaman, nitaq nacionkunaq awqa-tinkuyninman otaq guerrankunamanpas (Isa. 2:4; Juan 6:15; 13:34, 35; 17:14-16).

⁶ Chaykunata hukkunatawan qhawarispanchismi Dios munakuyta qallariranchis. Chay hinaqa tiempota hap’ispa sapankanchis yuyarinanchis imaynapi yacharanchis Jehová Diospa testigonkunalla Diosmanta cheqaqta yachachisqankuta. Llapanchispas manan kaqllachu kanchis, chaymi mana kaqllamanta yachaspachu Dios munakuyta promesankunapi confiaytapas qallariranchis. Diospa yachachiyninkunaqa manan cambianchu; paymanta cheqaqta qallariypi yachasqanchisqa kaqllan kunankamapas kashan. Chay hinaqa, ñawpaqpi hina Diosta munakunapaqqa, yuyarinanchismi imarayku Dios munakuyta qallariranchis, imaynatataq sientekuranchis chaytapas (leeychis Salmo 119:151, 152; 143:5).

Ñawpaq munakuyninchista yapasun

7. ¿Imanaqtinmi ñawpaqmantaqa astawan Diospa yachachikuyninkunata munakunanchis? ¿Imaynatan Dios munakuyninchista yapanchis?

⁷ Jehová Diosman servinapaq prometekusqanchismanta kunankamaqa askha pruebakunapichá rikukuranchis. Chayrayku qallariypiña Jehová Diospa yachachikuyninkunata tukuy sonqo munakuranchis chaypas, chay munakuyninchistaqa astawanmi yapananchis karan pruebakunata aguantanapaq. Tukuy chaykunapiqa Jehová Diosmi yanapawaranchis (1 Cor. 10:13). Watakunaq pasasqanman hinan allinta reparanchis Jehová Dios imaymanapi yanapawasqanchista. Chhaynapin Dios munakuyninchista yapanchis, aswan allintataq yachanchis paypa munaynin ancha sumaq ancha allin kasqantapas (Jos. 23:14; Sal. 34:8).

8. ¿Imanispan Jehová Dios Moisesman reqsichikuran? ¿Imaynapin Israel runakuna aswan allinta Diosta reqsiranku?

⁸ Israel runakunamanta yuyarisun. Egipto llaqtapi ñak’arishaqtinkun Jehová Diosqa paykunata horqonanpaq kay simikunawan Moisesman reqsichikuran: “Ñoqan munasqayman hina kasaq”, nispa (Éxo. 3:7, 8, 13, 14, NM). ¿Imatan chaywan nisharan? Jehová Diosqa Israel runakunata horqonanpaqqa tukuy ima munasqantan ruwanan karan (otaq ima munasqanmanpas tukunan karan). Jehová Diosqa imaymanatan ruwaran Israel runakunata horqonanpaq, chhaynapin paykuna yacharanku Jehová Dios Tukuy Atiyniyoq, Juzgaq, Pusaqninku, Qespichiqninku, paykunarayku Maqanakuq, tukuy necesitasqankuta Qoq kasqanta (Éxo. 12:12; 13:21; 14:24-31; 16:4; Neh. 9:9-15).

9, 10. ¿Imaynatan Diosta astawan reqsiranki? ¿Imanaqtinmi yuyarinayki ñawpaqpi Dios yanapasqasuykimanta?

⁹ Ichaqa manan Israel runakunata hinachu qantaqa sucederasunki. Chaywanpas, imaymana sucedesqasuykita yuyarispaqa allintachá cuentata qokuranki Jehová Dios munakusqasuykita, chhaynapitaq iñiyniykipi wiñariranki. Yaqapaschá allinta rikuranki Jehová Dios tukuy ima necesitasqaykita qosqanta, llakikuyniykipi kallpachasqanta, yachachiqniyki kasqantapas (leeychis Isaías 30:20b, 21). Yaqapaschá Diosqa mañakusqaykita qorasunki, otaq sasachakuypi tarikuqtiyki huk cristianomasinchis yanaparasunki, otaq Bibliata estudiaspa qanpaq hina ima yachachikuytapas tariranki hinaspa chay yanaparasunki.

¹⁰ Ichaqa chaykunamanta willaqtiykiqa wakinqa ninkumanpaschá: “Manamá chayqa milagrochu” nispanku. Qan ichaqa mayta kusikuspachá chaykuna sucedesqasuykita yuyarinki, Jehová Diosqa necesitasqayki raton yanaparasunki. ¿Hayk’a watañan Jehová Diosta servishanki? ¿Yuyashankichu tukuy chay watakunapi Jehová Dios imayna yanapasqasuykita? Yuyashanki chayqa allinta chaykunapi yuyaymanay, yuyariytaq chay pacha imaynatan sientekuranki chayta. Chhaynapin hukmanta chay pacha hina Jehová Diosta munakunki. Anchata agradecekuy Jehová Diosta imaymanapi yanapasqasuykimanta, chaykunapitaq yuyaymanay, chhaynapin mana pipas ni imapas iskayachisunkichu Jehová Dios munakusqasuykimanta.

Kikinchista qhawarikusun

11, 12. ¿Imaynapin Dios munakuyninchis chiriyanman? ¿Imaniranmi Jesús qatikuqninkunata?

¹¹ Sichus manaña ñawpaqpi hinatañachu Diosta, yachachikuyninkunatapas munakunki chayqa, manan Diospa huchanchu. Payqa kaqllan kashan, manan cambianchu (Mal. 3:6; Sant. 1:17). Ñawpaqpi hinan kunankamapas munakushallasunki. Chhaynaqa, ¿imanaqtintaq Dios munakuyniykiri chiriyapushanman? Yaqapaschá imaymana llakikuykunapi huk ruwaykunapipas tarikuspayki manaña ñawpaqpi hinañachu tukuy sonqowan Diosmanta mañakunki, pisillatañataq Bibliata estudianki imakuna yachasqaykipipas yuyaymananki. Manañapaschá tukuy sonqowanchu predicashanki, nitaq llapan huñunakuykunamanchu rishankipas (2 Cor. 13:5).

¹² Sichus chhaynapi tarikushanki chayqa, ¿imaraykun kanman? Yaqapaschá nishuta llakikushanki onqoyniykita hampiypi otaq familiaykipaq llank’aypipas, hinaspa manaña cuentata qokunkichu kay tukukuy p’unchaykunapi astawan Diospaq llank’ana kasqanta. Jesusmi apostolninkunata niran: “Cuidakuychis qankuna kikiykichista, paqtataq sonqoykichis rumiyanman viciokunawan, machaywan, kay kawsaypa llakichikuyninwan, chaytaq Runaq Churin kutimunan p’unchay qonqaylla hap’isunkichisman. Seq’ona waskha hinan chayamunqa kay pachantinpi lliw kawsaqkunapaq. Chay hinaqa, tuta-p’unchay Diosmanta mañakuspa rikch’ashaychis, tukuy chay hamuqkunamanta ayqenaykichispaq”, nispa (Luc. 21:34-36).

13. ¿Imawanmi Santiago Diospa Simin Qelqata tupanachiran?

¹³ Santiagon wayqe panakunata Diospa Simin Qelqaq yanapayninwan kawsayninkuta qhawarikunankupaq niran: “Ama yanqa uyariqkunallachu kaychis, qankuna kikiykichista q’otukuspa, aswanpas Diospa siminta hunt’aqpuni kaychis. Pipas Diospa siminta uyarishaspa mana hunt’aqqa espejopi uyanta qhawakuq runamanmi rikch’akun. Paymi imaynachus kasqanta qhawakun, ripuspataq imaynachus kasqanta qonqarqapun. Diospa hunt’asqa kamachikuy siminmi kacharichin, pipas chayta allin-allinta qhawaspa t’aqwin, hinaspa mana qonqaspa chay kamachikuy simita hunt’an chayqa, tukuy ruwasqankunapin kusisamiyoq kanqa”, nispa (Sant. 1:22-25).

14, 15. a) ¿Imaynatan Biblia yanapawasunman cristiano kawsayninchispi wiñarinanchispaq? b) ¿Imakunapin yuyaymanasunman?

¹⁴ Runakunaqa espejopin qhawakunku allin allichasqachu kashanku icha manachu chayta yachanankupaq. Sichus huk runa qhawakun corbatan huk ladoman aysarisqa kasqanta chayqa, kaq ratun allicharun. Sichus warmipas mana allin ñaqch’asqa kasqanta rikukun chayqa allintan ñaqch’arukun. Bibliapas espejo hinan qhawarichiwanchis Diospa munayninman hinachus kawsashanchis icha manachus chayta. Ichaqa, ¿ima allintaq kanman espejopi qhawakushaspa mana allichakuqtinchisri? Sichus ‘Diospa hunt’asqa kamachikuy siminpi’ qhawakuspa reparakunchis wakinpi pantashasqanchista chayqa, kallpachakunanchismi chayta allichanapaq. Sichus reparakunchis manaña ñawpaqpi hinañachu Diosta yachachikuyninkunatapas munakusqanchista chayqa, kaykunatan tapukunanchis: “¿Ima sasachakuykunapin rikukushani? ¿Manañachu ñawpaqpi hina chaykunata allichashani? ¿Imaraykun chaykunawan pisipashani?”, nispa. Sichus chaykunata tapukuspanchis reparakunchis imapi pantashasqanchista chayqa, kallpachakunanchismi chayta allichanapaq (Heb. 12:12, 13).

¹⁵ Chaymantapas chaykunata tapukuspa kikinchista allinta qhawarikusun chayqa, yachasunmi imakunatas ruwananchis cristiano kawsayninchispi wiñarinanchispaq chayta. Apóstol Pablon Timoteoman kayta niran Dios serviyninpi wiñarinanpaq: “Chaykunataqa makillapuni ruway [“yuyaymanay”, NM], chaykunaman k’askakuy, ahinapin iñiypi wiñasqaykita lliwpas sut’ita rikunqaku”, nispa. Ñoqanchispas Diospa Simin Qelqaq yanapayninwanmi yuyaymanananchis Dios serviyninchispi imakunapiraqchus allinyananchis kashan chayta yachanapaq (1 Tim. 4:15).

16. Imapipas pantashasqaykita reparaspaqa, ¿imatan mana ruwanaykichu?

¹⁶ Kawsayniykita allinta qhawarikuspaqa reparankichá imakunapi allinyanayki kashan chayta, chayta reparaspaqa ama pisi kallpayaychu. Yuyariy, kawsayniykitaqa qhawarikunki imakunapi pantasqaykita reparaspa allichanaykipaqmi. Satanasmi ichaqa munan chaykunata reparaspayki mana imapaq valeqta hina qhawarikunaykita. Ñawpaq tiempopin huk runa niran: ‘Diosqa manan allinpaqchu qhawarin tukuy sonqo payta servisqanchistaqa’, nispa (Job 15:15, 16; 22:3). Chay nisqanqa manan cheqaqchu, Jesusmi chayta sut’iman horqoran. Diosqa anchatan valoran sapanka serviqninkunataqa (leeychis Mateo 10:29-31). Imakunapi pantashasqanchista reparaspaqa, kallpachakunanchismi k’umuykukuspa Jehová Diospa yanapayninwan chaykunata allichanapaq (2 Cor. 12:7-10). Sichus kurakña kasqaykirayku otaq onqosqa kasqaykirayku manaña askhatachu ruwayta atinki chayqa, tukuy atisqaykiman hina Dios serviyniykita hunt’ay, ichaqa ama pisi kallpayaychu nitaq Dios munakuyniykitapas pisiyachiychu.

Agradecekunapaqqa askhan kashan

17, 18. ¿Imanaqtinmi ñawpaq munakuyninchista yapashanallanchis?

¹⁷ Ñawpaq munakuyniykita yapanki chayqa, aswan allintan Jehová Diosta reqsinki, astawantaq agredecekunkipas pusarisqasuykimanta (leeychis Proverbios 2:1-9; 3:5, 6). Salmo takikunapi nisqan hina, pipas Diospa kamachikuyninkunata kasukuqqa ‘allin premiotan chaskinqa’. Arí, “Señor Diospa unanchasqa siminqa mana kuyuqmi, mana yachaqtan yachayniyoqman tukuchin”, “kusisamiyoqmi ch’uya kawsaypi puriqkunaqa, Señor Diospa yachachisqan simiman hina puriqkunaqa” (Sal. 19:7, 11; 119:1).

¹⁸ Imaymanamantan Diosta agradecekunanchis. Paymi yachachiwaranchis imarayku kay pachapi askha sasachakuykuna kasqanta, payllataqmi tukuy necesitasqanchistapas qowanchis iñiyninchispi allinta sayananchispaq. Chaymantapas Jehová Diosqa llaqtanmanmi pusamuwaranchis paypa Testigon kananchispaq. Chayraykun Diosta anchata agradecekunanchis imaymana qowasqanchismanta. Sichus llapan qowasqanchista yupasunman chayqa askhallañachá kanman. Chaykunata yuyarishallasun chayqa ‘imatachus yachasqanchispin qaqata sayasunchis’ (Apo. 3:11).

19. ¿Imatawanmi ruwananchis astawan Diosman k’askakunanchispaq?

¹⁹ Dios servisqanchis watakunapi iñiyninchista imayna yapasqanchispi yuyaymanasun chayqa, ‘imatachus yachasqanchispin qaqata sayasun’. Ichaqa manan chayllatachu ruwananchis. Qhawaq revistaqa sapa kutillanmi niwanchis Diosman astawan k’askakunanchispaqqa kaykunatawan ruwananchista: Diosman mañakunanchista, tukuy sonqo predicananchista, huñunakuykunaman rinanchista chaypi siminchiswan Diosta hatunchananchistapas. Sichus makilla chaykunata ruwashasun chayqa, manan ñawpaq munakuyninchista pisiyachisunchu aswanpas astawanraqmi yapasun (Efe. 5:10; 1 Ped. 3:15; Jud. 20, 21).

¿Imanispan kutichiwaq?

• ¿Imanaqtinmi yuyarinanchis imaynatan Dios munakuyta qallariranchis chayta?

• Jehová Dios servisqanchis watakunapi imaymana sucedewasqanchispi yuyaymanasun chayqa, ¿imamantan mana iskayasunchu?

• ¿Imanaqtinmi allinta qhawarikunanchis imaynas Dios munakuyninchis kashan chayta?

[29 paginapi foto]

¿Imaynapin yacharanki Jehová Diospa testigonkuna Diosmanta cheqaqta yachachisqankuta?

[31 paginapi foto]

¿Reparakunkichu imakunatan allichanayki kashan chayta?