¿Imaraykun Dios mañakusqanchista mana uyarinmanchu?
Janaq pachapi tiyaq papanchis Jehová Diosqa kusikunmi sonqomanta mañakusqanchista uyarispa. Ichaqa, ¿imaraykun mana llapa runaq mañakusqantachu uyarin? ¿Imatan ruwananchis mañakusqanchista uyarinanpaq? Qhawarisun Bibliapi nisqanta.
“Mañakushaspaqa aman kaq simikunallatachu yapa-yapamanta rimanki” (Mateo 6:7).
Jehová Diosninchisqa manan munanchu umallanchismanta kaq simikunata yapa-yapamanta ninanchista, nitaq juj libromanta leenanchistapas. Aswanpas sonqonchispi kasqanta willakunanchistan munan. ¿Kusikuwaqchu amigoyki sapa p’unchay kaq simikunallata rimapayasuqtiyki? ¡Manapunin riki! Amigonchiskunawanqa sut’intan imatapas willanakunchis. Diosninchismanpas imachus piensasqanchista willakuspan amigonchis kasqanta rikuchishanchis.
“Mañakunkichisña chaypas, mana allinkunata ruwanaykichispaqtaq [...] mañakunkichis” (Santiago 4:3).
Diosninchisqa manan mañakusqanchista uyarinmanchu mana allin kaqtinqa. Sichus pipas pujllaspa qolqeta ganananpaq Diosta ninman yanapaway suerteyoq kanaypaq nispa chayri, ¿Jehová Dios uyarinmanchu mañakusqanta? Manan, yachasqanchis jina Diosqa manan munanchu qolqe sonqo kananchista, suertepi creenanchistapas (Isaías 65:11; Lucas 12:15). Jehová Diosqa manapunin chay jina mañakuytaqa uyarinmanchu. Mañakusqanchista uyarinanpaqqa sonqonpaq jinan kanan, chaypaqqa Bibliapin yachasunman imakunachus sonqonpaq jina kasqanta.
“Pipas kamachikuy simita uyariyta mana munanchu chayqa, Diospas mañakusqantaqa millakullantaqmi” (Proverbios 28:9).
Ñaupaq tiempopiqa Diosqa manan uyariranchu kamachikuyninkunata mana kasukuq runakunaq mañakusqantaqa, kunanpas kaqtan ruwallantaq (Isaías 1:15, 16; Malaquías 3:6). Mañakusqanchista uyarinanpaqqa kasukunanchismi kamachikuyninkunata. Jatun juchataña ruwaranchis chaypas, Diosninchisqa uyarinmanmi mañakusqanchista. Chay jucha ruwasqanchismanta sonqomanta pesapakusun chayqa, perdonawasunmi (Hechos 3:19).