28 YACHACHIKUY
Jehová Diosta Jesustawan agradecekusun sumaq regalo qowasqanchismanta
Munasqa amigoyki juj regalota qosunkiman chayri, ¿imaynatan chayta chaskikuwaq? Gracias nispan kusisqa chaskikuwaq ¿riki? Jehová Dioswan Jesuswanpas ancha munay regalotan qowarqanchis. Chay regaloqa Jesuspa noqanchisrayku wañusqanmi. ¿Imaynatan chaymanta agradecekusunman? Chaymantan kunan yachasun.
1. ¿Imaynatan Jehová Diostapas Jesustapas gracias nisunman imachus ruwapuwasqanchismanta?
Bibliaq nisqan jina, pipas Jesuspi “iñisqanta rikuchiqqa” wiñay kausaytan chaskinqa (Juan 3:16). ¿Imataq Jesuspi iñiyri? Manan “Jesuspin creeni” niyllachu, aswanpas Jesuspaq jina kausaymi (Santiago 2:17). Sichus Jesuspi iñisqanchista rikuchisun rimasqanchispi imayna kausasqanchispipas chayqa, aswan jujllachasqan kasunchis paywan Jehová Dioswanpas (leey Juan 14:21).
2. ¿Imata ruwaspan Jehová Diostapas Jesustapas gracias nillasunmantaq?
Manaraq wañuchinankupaq jap’ishaqtinkun Jesusqa qatikuqninkunata kamachirqan wañusqanta yuyarinankupaq. Chayta ruwanankupaqmi juñunakunanku karqan, chaytan Biblia sutichan “Señorpa Cenan” nispa, chaytan nikullantaq Jesuspa wañupusqanta yuyarinapaq juñukuy nispa (1 Corintios 11:20). Chay juñukuyta aparispankun Jesusta qatikuqkunaqa yuyarinanku karqan llapa runakunarayku wañusqanta. Jesuspunin nirqan: “Kaytaqa ruwallankichispunin noqata yuyariwanaykichispaq”, nispa (Lucas 22:19). Qanpas Jesuspa wañupusqanta yuyarinapaq juñukuyman rispan rikuchinki Jehová Diostapas Jesustapas gracias nisqaykita.
ASTAWAN YACHASUNCHIS
¿Imakunatawanmi ruwasunman Jehová Diosta Jesustawan agradecekunanchispaq? ¿Imaraykun yuyarinanchispuni Jesuspa wañupusqanta? Chaykunamantan astawan yachasunchis.
3. Agradecekuq kasqanchismi yanapawasun kasukunanchispaq
Pipas wañunaykimanta salvasunkiman chayri, ¿qonqarapuwaqchu chay runata? Manan ¿riki? Aswanpas imaymanata ruwaspachá agradecekuwaq.
Jehová Diosmi chay salvaq runa jina, payraykun lliupas kausashanchis. Leeychis 1 Juan 4:8-10 textota, jinaspa qatimuq tapuykunaman jina parlariychis:
¿Imaraykun ancha valorniyoq Jesuspa wañusqan?
¿Imaninkin qanrayku Diospas Jesuspas imachus ruwasqankumanta?
¿Imaynatan rikuchisunman Jehová Diospas Jesuspas noqanchisrayku imachus ruwasqankumanta gracias nisqanchista? Leeychis 2 Corintios 5:15; 1 Juan 4:11; 5:3 textokunata, chaymantataq qatimuq tapuyman jina parlariychis:
¿Imakunata ruwaspan Diostapas Jesustapas agradecekusunman?
4. Jesús jinan kananchis
Jesús jina imatapas ruwaspan agradecido kasqanchista rikuchillasuntaq. Leeychis 1 Pedro 2:21 textota, jinaspa jamuq tapuyman jina parlariychis:
¿Imaynatan Jesuspa ejemplonta qatikuwaq?
Jesusqa anchatan munakurqan Diospa simin qelqata, allin willakuykunatan jujkunaman willaq, yanapana kaqkunatapas yanapaq.
5. Señorninchis Jesucristoq wañupusqantan yuyarinanchis
¿Imaynatan qallarirqan “Señorpa Cenan” nisqa? Leeychis Lucas 22:14, 19, 20 textota, jinaspa qatimuq tapuykunaman jina parlariychis:
¿Imaynatan aparikurqan “Señorpa Cenan” nisqa?
¿Imawanmi Jesús tupanachirqan t’antata vinotapas? (Qhawaychis Lucas 22:19, 20 textota).
Jesuspa wañusqan p’unchaytaqa sapa watanmi qatikuqninkunaqa yuyarinanku karqan. Chayraykun Jehová Diospa testigonkunaqa sapa watan juñukuyku chayta yuyarinaykupaq. Imaynatachus chay juñunakuy aparikun chayta yachanapaq VIDEOTA qhawaychis, jinaspa qatimuq tapuyman jina parlariychis:
¿Imatan ruwakun Jesuspa wañupusqanta yuyarinapaq juñunakuypi?
Jesuspa wañupusqanta yuyarinapaq juñunakuypin churakun t’antata vinotawan. T’antaqa noqanchisrayku Jesuspa qosqan ch’uya cuerponwanmi tupan, vinotaq yawarninwan tupan.
WAKIN RUNAKUNAN NINKU: “Noqaqa Jesuspin iñini, salvasqañan kashani”, nispa.
¿Imaniwaqmi chhayna niqkunata? ¿Imaynatan Juan 3:16; Santiago 2:17 textokunawan entiendechiwaq imakunatawanraqchus ruwananku chayta?
IMATAN YACHAMURQANCHIS
Jesusta agradecekunanchispaqqa paypi iñisqanchisman jinan kausananchis, chaymantapas paypa wañupusqanta yuyarinapaq juñukuymanmi rinanchis.
Yuyarisun
¿Imakunata ruwaspan rikuchisunman Jesuspi iñisqanchista?
¿Munawaqchu Jehová Diosta Jesustapas agradecekuyta? ¿Imatan ruwawaq agradecekunaykipaq?
¿Imaraykun ancha allinpuni Jesuspa wañupusqanta yuyarinapaq juñukuyman riy?
ASTAWAN YACHANAYKIPAQ
Noqanchisraykutaq Cristo wañurqan chayqa, ¿imatan ruwananchis? Chaymantan kay videopi yachanki.
¿Imataq iñiyri? ¿Imaynatan rikuchisunman iñiyniyoq kasqanchista? Chaymantan kay qelqapi yachanki.
“Jehová Diospa promesankunapi allinta iñisun” (Qhawaq, 2016 wata octubre killamanta)
Imaraykus Jesús wañurqan chayta entiendespan juj señora vidanta cambiapurqan. Chaymantan pay willakun “Chayraqmi thaj kausashani” nisqapi. Chaymantan kay qelqapi yachanki.
“Bibliaq yanapayninwan cambianku” (Qhawaq, 2011 watapi 1 agosto)
¿Imaraykun Jesuspa wañupusqanta yuyarinapaq juñukuypi pisilla t’antata mijunku, vinotapas ujanku? Chaymantan kaypi yachanki.
“¿Imanaqtinmi Jehová Diospa testigonkuna jujnirayta ruwanku Señorpa Cenanta?” (jw.org paginapi leey)