MANARAQ Jesús naceshaqtin pisqa pachak wata ñawpaqtan profeta Daniel kawsaran. Jehová Diosmi Danielman willaranña hayk’aqmi Jesús hawisqa kanan karan Mesías otaq Cristo kananpaq. Danielta niran: “Kaytan yachanayki entiendenayki: Jerusalenta wakmanta sayarichinapaq perqanapaqwan kamachisqa simi lloqsimusqanmanta Diospa akllasqan Kamachikuq hamunankamaqa qanchis semanan kanqa soqta chunka iskayniyoq semanapiwan”, nispa (Daniel 9:25).

¿Hayk’aqmi Mesías rikhurimunan karan? Chaypaqmi ñawpaqta yachana ima watamantapacha yupakuyta qallariran Mesías rikhurimunanpaq. Profeciaq nisqan hina yupakuytaqa qallariran, ‘Jerusalenta wakmanta sayarichinapaq perqanapaqwan kamachisqa simi lloqsimusqanmantapachan’. ¿Hayk’aqmi chay kamachikuy ‘simi lloqsimuran’? Profeta Nehemiasmi willan “rey Artajerjes iskay chunkakaq watapi kamachikushaqtin” chay kamachikuy simi lloqsisqanta (Nehemías 2:1, 5-8). Askha historiadorkunaq willasqan hina rey Artajerjesqa kamachikuyta qallariran 475 watapi manaraq Jesús hamushaqtin (m.J.h.). Iskay chunka wata kamachikuyninqa tupan 455 watawan (m.J.h.). Chay rayku Mesías rikhurimunanpaq Danielpa profetizasqan yupakuyta qallariran 455 watamantapacha (m.J.h.).

Danielqa willaranña hayk’a tiempomanta “Diospa akllasqan Kamachikuq” rikhurimunanta. Profecian niran, “qanchis semanan kanqa soqta chunka iskayniyoq semanapiwan”, nispa, llapanpiqa 69 semanakunan. ¿Hayk’a tiempotaq chay 69 semanakuna? Huk Bibliakuna nisqan hina, manan qanchis p’unchay semanakunachu, aswanmi watapi yupasqa semanakuna. Sapanka semanataq tupan qanchis watawan. Ñawpa judiokunaqa qanchis watatan yuparanku huk semanata hina. Yachanapaq, sapa qanchis watan huk watata waqaycharanku, chay watatan suticharanku sábado wata nispa (Éxodo 23:10, 11). Chay 69 semanakunan tupan 483 watakunawan.

455 watamantapacha (m.J.h.), 483 watakunata yupaspan 29 wataman chayanchis (J.h.q.), chay watapin Jesús bautizakuspa Mesiasman tukupuran (Lucas 3:1, 2, 21, 22).a Arí, chay profeciaqa k’apaktan hunt’akuran.

QESPICHIQ Mesiasmantan Jehová Diosqa profetankunaman willaranña. Willaranmi imayna nacenanmanta, predicananmanta, wañunanmantapas chaykunawanqa manan sasatachu Mesiasta reqsisun. Chay profeciakunaqa llapallanmi musphanapaq hinaraq Jesucristopi hunt’akuran. Nacesqanmanta erqe kasqanmantapas willasqanpin reparasun chay profeciakuna k’apak kasqanta.

Profeta Isaiasmi willaranña Davidpa ayllunmanta Mesías nacenanta (Isaías 9:7). Jesusmi chay kamachikuqpa mirayninmanta karan (Mateo 1:1, 6-17).

Profeta Miqueaspas willaranñan “Belén Efrata” llaqtapi Mesías nacenanta kamachikuq kanantapas (Miqueas 5:2). Kay pachaman Jesús hamushaqtinqa Israel suyupin iskay llaqtakuna karan Belén sutiyoqkama. Hukmi Nazaret llaqtaq qayllanpi karan, huknintaq Judá llaqtapi Jerusalenpa qayllanpi. Jerusalenpa qayllanpi llaqtatan ñawpaqpi sutichakuran Belén Efrata, nispa. Chay llaqtapin Jesús naceran, chhaynapin hunt’akuran profeciaq nisqan (Mateo 2:1).

Huk profecian willallarantaq “Egipto suyumanta” Churin lloqsimunanpaq Diospa waqyananta. Chhaynan karan, wawallaraq kashaqtinmi tayta-maman Egipto suyuman aparanku, kamachikuq Herodes wañupuqtintaq Israel suyuman kutinpuranku. Chhaynapin chay profecía hunt’akuran (Oseas 11:1; Mateo 2:15).

Mesiasmanta willaq profeciakuna nisqa recuadropin tarinki Mesiasmanta willaq profeciakunata, “Profecía” nisqa simiq uranpin kashan Mesiasmanta willaq textokuna. Chay textokunata tupachiy “Hunt’akusqan” nisqa simiq uranpi textokunawan. Chaymi yanapasunki Diospa Simin Qelqa cheqaq willasqanpi iñinaykipaq.

Chay textokunata t’aqwishaspan yuyarinayki chay profeciakuna Jesuspa nacesqanmanta pachak-pachak watakuna ñawpaqtaraq qelqakusqanta. Jesuspuni niran: ‘Hunt’akunanpunin [karan] Moisespa kamachikuy qelqanpi, profetakunaq qelqanpi, Salmo qelqasqakunapipas ñoqamanta llapan qelqasqakuna’, nispa (Lucas 24:44). Bibliaykiwan tupachispan reparanki chay profeciakuna lliwpi hunt’akusqanta.