30 YACHACHIKUY
¡Kausarimpunqan wañupuqniykikunaqa!
Pi familianchispas amigonchispas wañupuqtinqa sinchi llakikuymi ¿riki? Chayraykuchá Bibliaqa wañuyta juj enemigowan tupanachin (1 Corintios 15:26). 27 yachachikuypi yachamusqanchis jina, Jehová Diosqa chinkachipunqan wañuytaqa. Ichaqa ¿imataq pasanqa wañupuq runakunawanri? Chaytan kaypi yachasun. Bibliaq nisqan jina, Jehová Diosqa mana yupay atiy wañusqakunatan kausarichimpunqa wiñaypaq kausanankupaq. ¿Cheqaqchu chay kanman? ¿Maypin tiyanqaku kausarimpuqkuna, cielopichu icha kay pachapichu? Chaykunamantan kaypi yachasun.
1. ¿Imatan Jehová Dios ruwayta munashan wañusqakunapaq?
Jehová Diosqa maytan munashan wañupuq runakunata kausarichiyta. Bibliapin willan Job sutiyoq runamanta, payqa tukuy sonqon Diospi iñirqan, confiarqanmi wañupunmanña chaypas Dios kausarichimpunanpi, chaymi Diosta nirqan: “Qanmi wajamuwanki noqataq [Sepulturamanta] kutichimusayki”, nispa (leey Job 14:13-15).
2. ¿Kausarinmanpunichu wañusqakuna?
Jehová Diosmi Jesusman atiyta qorqan wañupuqkunata kausarichinanpaq. Chaymi payqa chunka iskayniyoq watanpi kashaq sipaschatapas kausarichimpurqan; kausarichillarqantaqmi juj viudaq wawantapas (Marcos 5:41, 42; Lucas 7:12-15). Jesusqa amigon Lazarotapas tawa p’unchayña wañusqa kasharqan chaypas kausarichirqanmi. Diosmanta mañakuspan payqa Lazaroq sepulturanpa ñaupanpi fuerteta nirqan: “¡Lázaro, lloqsimuy!”, nispa. “Jinan chay wañusqa runaqa [...] lloqsimurqan” (Juan 11:43, 44). Chayta rikuspaqa maytachá Lazaroq familianpas amigonkunapas kusikurqanku.
3. ¿Kausarimpunqakuchu wañuqninchiskuna?
Bibliaq nisqan jina, wañupuqkunaqa kausarimpunqakun (Hechos 24:15). Jesuspa kausarichisqan runakunapi piensasun, paykunaqa manan janaq pachapichu maypichu kasharqanku, kay jallp’apin kasharqanku (Juan 3:13). Chaymi kausarichisqa kaspankuqa anchatapuni kusikurqanku. Jamuq tiempopipas Jesusqa mana yupay atiy wañusqakunatan kausarichimpunqa kay pachapi wiñaypaq kusisqa kausanankupaq. Jesusmi nirqan: “Yuyarina sepulturakunapi llapa kaqkunan [...] lloqsimunqaku”, nispa (Juan 5:28, 29, willakuy). Chay yuyarina sepulturaqa Diospa yuyayninmi. Qonqapurqanña runakuna paykunata chaypas, Diosqa manan qonqanchu.
ASTAWAN YACHASUNCHIS
¿Kausarinqakupunichu wañusqakuna? ¿Imaynatan yanapawasunman wañusqakunaq kausarimpunanmanta yachay? Chaykunamanta astawan yachasun.
4. Jesusqa atiyniyoqmi wañuqkunata kausarichinanpaq
¿Imatan Jesús ruwarqan amigon Lazaropaq? Leeychis Juan 11:14, 38-44 textota, jinaspa jamuq tapuykunaman jina parlariychis:
¿Wañusqapunichu kasharqan Lázaro? (leeychis Juan 11:39 textota).
Cielopichus Lázaro kashanman karqan chayqa, ¿yanapashanmanchu karqan Jesús kay pachaman kutichimuspa?
5. ¡Askha runakunan kausarimpunqaku!
Leeychis Salmos 37:29 textota, jinaspa jamuq tapuyman jina parlariychis:
Ancha askha runakunataq kausarimpunqaku chayqa, ¿maypin paykuna tiyanqaku?
Jesusqa manan Jehová Diosta serviq runakunallatachu kausarichinqa, payqa juj runakunatawanmi kausarichimpunqa. Leeychis Hechos 24:15 textota, jinaspa jamuq tapuyman jina parlariychis:
¿Kausarimpuqkunamanta piwanmi tupayta munawaq?
Imaynan juj taytaqa facil-llata wawanta rijch’arichinman, chhaynatan Jesuspas facil-llata wañupuqninchiskunata rijch’arichinqa.
6. Kausarimpuymanta yachayqa yanapawasunmi ama nishuta llakikunanchispaq
Jairoq ususichanta Jesuspa kausarichisqanmanta yachayqa askha runakunatan yanaparqan. Leeychis Lucas 8:40-42, 49-56 textota.
Jairoq ususichanta manaraq kausarichishaspan Jesusqa payta nirqan: “Ama manchakuychu, iñillay qanqa”, nispa (leeychis Lucas 8:50 textota). ¿Yanapasunkimanchu wañupuqkuna kausarimpunanmanta yachay...
... familiaykimanta pipas wañupuqtin?
... wañuy patapi tarikushaqtiyki?
VIDEOTA qhawaychis, jinaspa jamuq tapuyman jina parlariychis:
¿Imaynatan Phelicity iñiqmasiq taytanta mamantapas yanaparqan kausarimpuypi iñisqanku?
WAKIN RUNAKUNAN NINKU: “Manan wañupuqkunaqa kausarimpunkumanchu, chayqa cuentollan”, nispa.
¿Imaninkitaq chaymanta?
¿Bibliapi mayqen textotan qhawachiwaq pimanpas kausarimpuymanta willanaykipaq?
IMATAN YACHAMURQANCHIS
Bibliaq nisqan jina, waranqa-waranqa runakunan kausarimpunqanku. Jehová Diosqa maytan munashan chayta, chaymi Jesusmanpas atiyta qorqan wañusqakunata kausarichimunanpaq.
Yuyarisun
¿Munashankuchu Jehová Diospas Jesuspas wañupuqkunata kausarichiyta? ¿Imaniwaqmi?
¿Maypin tiyanqaku kausarimpuqkuna, kay pachapichu icha janaq pachapichu? ¿Imaraykun chayta ninki?
¿Kausarimunmanpunichu wañupuqniykikuna? ¿Imaninmi Biblia chaymanta?
ASTAWAN YACHANAYKIPAQ
¿Iman yanapasunkiman wañupuq familiaykimanta ama sinchita llakikunaykipaq? Chaymantan kay qelqapi yachanki.
“¿Iman yanapanman wañuqniyoqkunata?” (¡Rijch’ariy!, 2018 watapi núm. 3)
¿Yanapawasunmanchu Biblia mayqen familianchispas wañupuqtin?
¿Imaynatan wawakunata yanapasunman mayqen familianchispas wañupuqtin?
¿Pikunan janaq pachapaq kausarinqaku? ¿Llapa wañupuqkunachu kausarimpunqaku? Chaymantan kaypi yachanki.