“Ama manchakuychu, noqan yanapasayki”

TUTAPI purishawaq juj callenta, qhepaykitataq juj runa qatipamushasunkiman. Qan sayaykuqtiyki paypas sayaykullanmantaq, usqhaylla puriqtiykin paypas usqhaylla purillanmantaq. ¿Imatan ruwawaq chhaynapi tarikuspa? Usqhayllachá phawawaq chayneqpi tiyaq amigoykiq wasinta. Wasinman jaykuspañan chayraq thaj kawaq ¿riki?

Manaña chhaynapichu tarikuranki chaypas, kashanchá imaymana llakikuyniykikuna. Yaqapaschá juj ruwaypi mejoranayki kashan, manataq atishankichu imayna mejorayta. Yaqapaschá unayña llank’anata maskhashanki, manataq tarinkichu. Yaqapaschá edadniyoqña kapushanki, manchakushankitaq imawanpas onqoyta. Chhayna llakikuyniykikunaqa kashanpunichá.

Llakikuykunapi tarikuspanchisqa juj amigonchis sumaqta yanapawananchistan munasunman ¿riki? Chhaynatan Jehová Diosqa sapankanchista yanapawasunchis, imaynan Abrahantapas yanaparan jinata. Chaytan willakushan Isaías 41:8-13, NM textopi. 10, 13 versiculokunapin Jehová Dios niran: “Ama manchakuychu, qanwanmi noqaqa kashani, ama pisipaychu, noqaqa Diosniykin kani, noqan kallpachasaykipas yanapasqaykipas, noqan chanin paña makiywan jap’iykusayki. Noqa Jehová Diosniykin paña makiykimanta jap’ishayki, noqan niyki: ‘Ama manchakuychu, noqan yanapasayki’”, nispa.

‘NOQAN QAQATA JAP’IYKUSAYKI’

Ladonchispi puriq amigonchis paña makinwan makinchista jap’iykuwasunman chayqa, lloq’e makinchistan jap’inman, manan paña makinchistachu ¿riki? Chhaynaqa, ¿piwanmi Jehová Dios comparakushan: ‘Paña makiywan paña makiykita jap’iykusayki’ nispa nisqanwan? Ima peligromantapas ñaupanchismanta aysawaqninchis amigowanmi. Arí, ñaupanchismantapas aysawashasunman jinan payqa niwanchis: “Ama manchakuychu, noqan yanapasayki”, nispa. ¡Ima munaymá chay nisqanqa!

¿Imaynatan Jehová Diosta qhawarinchis? ¿Munakuq papanchista, munakuq amigonchista jinachu? Llakikuykuna jamuqtinpas, ¿confianchischu pay yanapawananchispi? Jehová Diosqa llakikunmi noqanchismanta, cheqaqtapunin munakuwanchispas, chaymi sasachakuykunapi tarikuqtinchis thaj kananchista munan. Arí, Jehová Diosqa “llaki-phutiyninchispi usqhaylla yanapaykuwaqninchismi” (Sal. 46:1).

¿ÑAUPA JUCHANCHISKUNAMANTACHU LLAKIPAKUSHANCHIS?

Wakinqa manan qonqayta atinkuchu ñaupa tiempopi juchallikusqankuta, chaymi manapas Dios perdonanmanchu karan jina sientekunku. Chhaynata sientekushanki chayqa, yuyarinaykin ‘llapa runakuna juchallikuq kasqanchista’ (Rom. 3:23). Jobpas juchallikuranmi wayna kashaspa (Job 13:26, NM). Kaqllataq rey Davidpas, chaymi Diosta niran: “Amaña wayna kasqay juchaykunatapas pantasqaykunatapas yuyariychu”, nispa (Sal. 25:7).

Isaías 41 capitulopi sumaq simikunaqa Israel runakunapaqmi qelqasqa karan. Paykunaqa sinchitapunin juchallikuranku, chaymi Jehová Dios paykunata juchacharan Babilonia llaqtaman apasqa kanankupaq (Is. 39:6, 7). Ichaqa prometeranmi payman kutirikuqkunata kutichimpunanpaq (Is. 41:8, 9; 49:8). Chhayna munakuywan khuyapayakuywan iman Jehová Diosqa kunanpas qhawarin payman kutirikuqkunata (Sal. 51:1).

Albertomanta yachasunchis.a Payqa watasqa jinan kasharan “pornografía” nisqaman, “masturbación” nisqamanwan. Chaymi payqa niran: “Mana valeqpaqmi sientekuq kani chay viciokunaman urmaspa, chaymi Jehová Diosmanta perdonta mañakuq kani, paytaq sumaqta kallpachawaq”, nispa. Umalliqkunas payta nisqaku: “Imaynapipas chay vicioman urmaspaqa wajawankikupunin”, nispa. Chaymantan Alberto niran: “Sasapunin karan umalliqkunata wajayqa. Wajaqtiymi ichaqa anchata kallpachawaqku”, nispa. Juj kutinmi umalliqkuna watukuq umalliqta Albertoman kacharanku. Chay umalliqtaq payta niran: “Manan noqallamantachu jamushani, umalliqkunan kachamuwashanku”, nispa. Chaykunata yuyarispan Alberto nin: “Chay viciokunaman urmashaqtiypas Jehová Diosqa umalliqkunawanmi yanapawaran”, nispa. Tiempowanmi Albertoqa jujpaqkama saqepuran chay viciokunata, jinaspa precursor regular kapuran, kunantaq juj sucursalpi kashan. Jehová Diosmi chay hermanotaqa yanaparan, chhaynatan noqanchistapas yanapawasun ima juchamanpas urmaqtinchis.

¿LLANK’ANAMANTACHU LLAKIPAKUSHANCHIS?

Wakinqa sinchitan llakikunku mana llank’anayoq rikukuspa. Maytaña maskhanku chaypas, manan llank’anata tariyta atinkuchu. Chaymi paykunaqa mana valeqpaq sientekunku. Chhaynapi tarikushanki chayqa, Jehová Diosmi yanapasunki wakin textokunata yuyarinaykipaq. Juj textopin nishan: “Waynallan karani, kunantaq machuyapuniña, manan jayk’aqpas rikuranichu chanin runata Señor Diospa saqerparisqanta, manan jayk’aqpas rikuranichu wawankunatapas mijuna mañapakushaqta”, nispa (Sal. 37:25). Chaypi nisqan jina, Jehová Diosqa ancha valorniyoqpaqmi qhawarisunki, chaymi “paña makinwan” yanapasunki mana imapas faltanasuykipaq.

Sara hermananchismanta yachasunchis. Payqa juj empresapin ch’isiyaq llank’aq, allin pagasqataqmi karanpas. Ichaqa Jehová Diospaq astawan llank’ayta munaspan llank’ananmanta lloqsipuran, jinaspa precursora kapuran. Ichaqa manan tariranchu kuskan p’unchayllapaq llank’anata. Chaymi juj negociochata kicharan, ichaqa fracasaranmi chaywan. Kinsa watan mana llank’anayoq kasharan, ichaqa Jehová Diospa yanapayninwanmi aguantaran. Chay pasasqanwanmi payqa yacharan paqarin p’unchaymanta mana nishuta llakikuspa imachus kapuqnillanwan kausayta (Mat. 6:33, 34). Chaymantañan ñaupa patronnin payta wajaran kaq llank’anallanpi llank’ananpaq. Jinan Saraqa niran: “Kuskan p’unchaykamallan llank’ayta atisaq, chaymantapas permisotan necesitasaq juñunakuyniykunapaq”, nispa. Chhaynata rimanakuspan Saraqa kunan kaq llank’anallanpi kashan. Pisillataña ganashan chaypas, payqa precursoran kashan, anchatataqmi kusikun Jehová Dios yanapasqanmanta.

¿MACHUYAPUYTACHU MANCHAKUSHANCHIS?

Wakinqa machuyapushankuñan otaq payayapushankuña. Chaymi llakikunku: “¿Pitaq edadniyoq kaqtiy qhawariwanqa? ¿Onqoqtiypas pin yanapawanqa?”, nispa. Chhaynatan salmo takita qelqaqpas llakikuran, chaymi Jehová Diosta niran: “Machuña kaqtiypas ama qhawarpariwaychu, kallpay pisiyapuqtinpas ama saqerpariwaychu”, nispa (Sal. 71:9, 18). Rey Davidmi chaytaqa ninman karan.

¿Imatan kuraq hermanokuna ruwananku mana manchakunankupaq? Iñiyninkutan wiñachinanku. Jehová Diosqa qollanqan imachus necesitasqankutaqa. Chaymantapas yachanankun pisillawan kausayta. Qolqechankuqa manapaschá aypanqachu askha aychata rantikunankupaq, chaymi ichaqa allin kanman saludninkupaq. Bibliaq nisqan jina, paykunapaqqa ‘yuyu mijuymi aswan allin kanman wira waka aycha mijuymantaqa’ (Prov. 15:17). Sichus Jehová Dios serviypi ocupasqa kashanqaku chayqa, manan ima necesitasqankutapas Diosqa faltachinqachu edadniyoq kaqtinku.

Kunanqa yachasunchis Josemanta Rosemantawan. Paykunaqa iskayninkun warmi-qhari 65 wata masña Jehová Diosta tukuy tiemponkuwan servishanku. Ichaqa sasachakuykunapin tarikuranku. Juj tiempon ch’isiyaq sapa p’unchay cuidaranku Roseq papanta. Chaymantapas Josepin cáncer onqoyta tariranku, chaymi operaranku, jinaspa sasa tratamientota qoranku. Jehová Diosmi ichaqa paykunata yanaparan warmi-qhari iskay cristianokunawan. Paykunan karanku Tony, Wendypiwan. Chay hermanokunan Joseta Rosetawan wasinkupi alojaranku. Tonyqa escuelapi kashasparaqsi paykunata rikuq tukuy tiempo predicaqta, chaymi payqa ancha allinpaq paykunata qhawariq. Paykunaqa tukuy tiempon Jehová Diosta servispallapuni karanku, chaymi Antonioqa señoranpiwan 15 wataña wasinkupi alojashanku. Josewan Rosewanqa 85 watayoq jinañan kashanku. Paykunaqa Jehová Diospa regalonta jinan qhawarinku Tonyta Wendytawan.

Kaypi yachasqanchis jina, Jehová Diosmi prometewanchis: “Ama manchakuychu, noqan yanapasayki”, nispa. Chaymantapas paymi ‘paña makinta’ jaywarimuwanchis yanapawananchispaq. ¿Yanapachikusunchu paywan?