Tiemponchista allinta cuidasun
1. ¿Ima problemapin llapa runa tarikun?
1 Kay tiempopiqa askha aparatokunan kan tiempotapas llank’anatapas ahorranapaq, askha runan ichaqa cuentata qokunku imaymana ruwanayoq kasqankuta, chaykuna ruwanankupaq pisi tiempoyoq kasqankutapas. ¿Sasachu ñoqanchispaq espiritual ruwaykunapaq programanchis kasukuy? ¿Munanchischu servicionchispi yapayta? ¿Imaynatan tiemponchista aypachikusunman imaymana ruwananchispaq? (Sal. 90:12; Fili. 1:9-11.)
2, 3. ¿Ima problemakunatan ri- khurichin wakin aparatokuna, imaynatan sapankanchis examinakuswan?
2 Reparakusun iman tiemponchista usuchishan. Llapanchismi sapa kutin allinta piensananchis tiemponchiswan ima ruwasqanchispi. Biblian anyawanchis: “Chayrayku, allintapuni reparakuychis imaynatachus kawsasqaykichista, ama mana yuyayniyoq hinaqa kawsaychischu, aswanpas yachayniyoq hina kawsaychis. Tiempota ama usuchiychischu, kay p’unchaykuna mana allin kasqanrayku.” (Efe. 5:15, 16, QC). Piensasun informática nisqaq avanzasqan problemakuna qallarichisqanpi. Yanapanña ima ruwaypipas computadorakuna, maquinakuna, huk aparatokuna chaypas, trampa hinan kanman tiemponchista mana cuidaqtinchisqa. (1 Cor. 7:29, 31).
3 Sapankanchismi tapukunanchis: “¿Sapa p’unchaychu unayta tiempota qokuni correo electrónico nisqapi mana yanapaq yanqa mensajekuna leenaypaq otaq kutichinaypaqpas? ¿Unaytachu telefonopi rimani, icha sapa kutinchu mensajekunata apachini mana valorniyoq cosaskunamanta? (1 Tim. 5:13.) ¿Internetpichu tiempoyta usuchishani icha televisionpichu huk, huk canalkunata maskhashani? ¿Computadorapi pukllasqaywanchu manaña tiempoy kanpas Diospa Palabran estudianaypaq?”. Chay ruwaykunan pantachiwaswan espiritualpi ruwananchiskunata (Pro. 12:11).
4. ¿Imatan huk wayna ruwasqa, imarayku?
4 Tiemponchista yachaywan usasun. Wakin aparatokunaqa manan tiempollatachu usuchin, pantachinmi atencionninchistapas. Videojuego nisqa viciopi urmaq waynan kayta nin: “Mayninpiqa pukllaqmi kani manaraq predicaq rishaspa, otaq manaraq reunionman rishaspa, reunionpipas serviciopipas manan atiendeyta atiqchu kani. Yaqa tukuy tiempon piensarani wasiman chayaspa pukllasqaypi imayna atipanayta. Manañan tiempoy karanchu sapallaypi estudianaypaqpas, Biblia leenaypaqpas, Diosta servispapas manañan kusikuyta tariranichu”. Kay waynaqa cuentatan qokusqa ima ruwananmanta, chaymi computadoranmanta borrasqa llapanta chay videojuegokunata. “Manan ichaqa facilchu karan —nispan yuyarin—, sinchitan viciowan hap’ichikusqani. Borrasqay qhepamanmi ichaqa kusikuni atipasqaymanta, allinniypaq kasqanta reparaspa.” (Mat. 5:29, 30.)
5. ¿Imaynatan tiempota ‘rantisunman’ espiritual ruwaykunapaq, ima beneficiokunatan chaskisun chayta ruwaspa?
5 Ñoqanchispas chayman rikch’akuqtapaschá imatapas ruwananchis kanqa. ¿Atisunmanchu yanqa ruwaykunamanta sapa p’unchay media hora tiempo rantiyta? Chay tiempotan necesitanchis huk watallapi Bibliata llapanta leenanchispaq, chayta ruwaspaqa askhatan espiritualpi beneficiakusun (Sal. 19:7-11; 119:97-100). T’aqasun tiempota Biblia leenanchispaq, reunionkunapaq preparakunapaq, predicanapaqpas (1 Cor. 15:58). Chhaynatan allinta controlasun tiempo usuchiq ruwaykunata hinaspan reparasun “Jehová Diospa munaynin imachus kasqanta” (Efe. 5:17).