Lección 6
¿Imataq Diospa Reinonri?
¿Maypin kashan Diospa Reinon? (1)
¿Pitaq Reyninri? (2)
¿Hukkunapiwanchu kamachimunqa? Chhayna kaqtinri, ¿hayk’ataq kanku? (3)
¿Imaynatan yachanchis p’uchukay tiempopi kasqanchista? (4)
¿Imatan Diospa Reinon runakunapaq ruwanqa? (5-7)
1. Allpapi kashaspan Jesusqa, discipulonkunaman yachachiran Diospa Reinon hamunanpaq mañakunankuta. Castellanopi reino simiqa reywan kamachikuq gobierno ninantan. Chaymi Diospa Reinonqa sumaq gobierno. Cielopi takyasqan kashan, chaymantan Allpata kamachimunqa. Diospa sutintan ch’uyanchanqa. Diospa munaynintan kay Allpapi ruwachinqa cielopi hina. (Mateo 6:9, 10.)
2. Diosmi prometeran Reinonpa Reynin Jesús kananpaq. (Lucas 1:30-33.) Allpapi kashaspan Jesusqa rikuchiran sumaq, chanin, ch’uya Gobernante kananta. Cieloman kutispaqa, manan Diospa Reinonpi kamachiran pachachu. (Hebreos 10:12, 13.) 1914 watapin, Jehová qoran Jesusman prometesqan autoridadta. Chaymanta pachan, nombrasqa Rey hina Jesusqa cielopi gobernashan. (Daniel 7:13, 14.)
3. Jehovaqa akllallarantaqmi Allpamanta fiel qharikunata warmikunatapas cieloman rinankupaq. Paykunapas Jesuswan kuskan kay pachapi runakunata gobernamunqaku reykuna, juezkuna, sacerdotekuna hina. (Lucas 22:28-30; Revelación 5:9, 10.) Jesusmi paywan kuska gobernaqkunata suticharan “pisi huñu”, nispa. Llapanpiqa 144.000 runakunan. (Lucas 12:32; Revelación 14:1-3.)
4. Rey kaspa hinan Jesusqa, cielomanta kay Allpaman wikch’umun Satanasta millay angelninkunantinta. Chayraykun 1914 watamantapacha problemakunaqa astawan yapakushan. (Revelación 12:9, 12.) Guerrakuna, yarqaykuna, onqoykuna, millay kawsaypa yapasqankunan..., Jesuspa gobernasqan rikuchiq “señalqa”, p’uchukay tiempopiña kay pacha kasqanta rikuchiqpas. (Mateo 24:3, 7, 8, 12; Lucas 21:10, 11; 2 Timoteo 3:1-5.)
5. Jesusqa runakunatan juzganqaña hinaspan michiq hina cabrakunamanta ovejakunata t’aqanqa. Kamachisqanta hunt’a sonqowan kasukuqkunatan payqa “ovejata” hina rikunqa, paykunamanmi kay Allpapi wiñay kawsayta qonqa. Diospa Reinonta rechazaqkunan “cabra” hina kanqaku. (Mateo 25:31-34, 46.) Jesusqa wañuchinqañan cabraman rikch’akuq runakunata. (2 Tesalonicenses 1:6-9.) Jesuspa “ovejan” kayta munanki chayqa, Reinomanta willakuykunatan uyarinayki yachasqaykiman hinataq kawsanaykipas. (Mateo 24:14.)
6. Allpaqa askha nacionkunapin t’aqasqa kashan, sapankataq gobiernoyoqkama. Paykuna puran maqanakunku. Diospa Reinonmi ichaqa llapa gobiernokunata reemplazanqa. Chay gobiernollan Allpantinta kamachinqa. (Daniel 2:44.) Manañan kanqachu guerrakunapas, wañuchinakuypas, millay kawsaypas. Llapa runan huk nisqalla sumaqta kawsanqaku. (Miqueas 4:3, 4.)
7. Jesuspa kamachisqan Waranqa watapiqa, perfecton fiel runakunaqa kanqaku, Allpataqmi sumaq paraisoman tukupunqa. Waranqa wata tukukuypaqmi Jesusqa ruwanqa Diospa imaymana munasqanta. Chaymantataq Taytanman Reinota entreganqa. (1 Corintios 15:24.) ¿Willawaqchu familiaykikunaman amigoykikunamanpas Diospa Reinonpa ruwananmanta?
[13 paginapi dibujo]
Jesús gobernamuqtinqa manañan cheqninakuypas kanqachu